കൊച്ചി: മേക്കപ്പ് സാധനങ്ങൾ എന്ന പേരിൽ ഹൈബ്രിഡ് കഞ്ചാവ് കടത്താൻ ശ്രമിച്ച രണ്ട് യുവതികൾ നെടുമ്പാശ്ശേരി വിമാനത്താവളത്തിൽ പിടിയിൽ.
15 കിലോ ഹൈബ്രിഡ് കഞ്ചാവാണ് എയർപോർട്ടിലെ കസ്റ്റംസ് ഉദ്യോഗസ്ഥര പിടികൂടിയത്.
ബാങ്കോക്കിൽ നിന്നെത്തിയ ഇതര സംസ്ഥാനക്കാരായ രണ്ട് യുവതികളിൽ നിന്നാണ് മാർക്കറ്റിൽ നാലരക്കോടി രൂപയോളം വിലവരുന്ന ഹൈബ്രിഡ് കഞ്ചാവ് പിടികൂടിയത്.
രാജസ്ഥാനിൽ നിന്നുള്ള മാൻവി ചൗധരി, ഡൽഹി സ്വദേശിനി ഛിബെറ്റ് സ്വാതി എന്നിവരാണ് പിടിയിലായത്. ഇവരിൽ സ്വാതി മേക്കപ്പ് ആർട്ടിസ്റ്റാണ്.
മേക്കപ്പ് സാമഗ്രികളെന്ന പേരിൽ വൃത്തിയായി പായ്ക്ക് ചെയ്ത നിലയിലായിരുന്നു കഞ്ചാവ് കണ്ടത്തിയത്.
സംശയം തോന്നി കസ്റ്റംസ് നടത്തിയ വിശദമായ പരിശോധനയിലാണ് കഞ്ചാവ്ക്കടത്ത് തെളിഞ്ഞത്. പിടിയിലായ മാൻവി ഫാഷൻ മോഡലാണ്.
യുവതികൾ എങ്ങോട്ടാണ് ലഹരി കൊണ്ടുവന്നത്, ആർക്കാണ് സപ്ലൈ ചെയ്യുന്നത് തുടങ്ങിയ കാര്യങ്ങൾ ഉൾപ്പെടെ അന്വേഷിക്കുമെന്ന് കസ്റ്റംസ് അധികൃതർ അറിയിച്ചു.
കഴിഞ്ഞ വർഷം സെപ്റ്റംബർ മുതൽ ബാങ്കോക്കിൽ നിന്ന് കടത്തിയ ഏകദേശം 85 കിലോഗ്രാം ഹൈബ്രിഡ് കഞ്ചാവ് ആണ് കസ്റ്റംസ് പിടിച്ചെടുത്തത്. ഇതിൽ15 പേരെ അറസ്റ്റ് ചെയ്തിരുന്നു.
