തിരുവനന്തപുരം: തിരുവനന്തപുരം മെഡിക്കല് കോളേജ് ആശുപത്രിയില് നഴ്സിനെ കയ്യേറ്റം ചെയ്യാൻ ശ്രമിച്ചതായി പരാതി. ജഗില് ചന്ദ്രന് എന്ന മെയില് നഴ്സ് ആണ് പരാതിയുമായി രംഗത്തെത്തിയത്. രോഗിയുടെ കൂട്ടിരിപ്പുകാര് അക്രമിച്ചെന്നാണ് ജഗിലിന്റെ പരാതി.
വെള്ളിയാഴ്ചയാണ് സംഭവം നടന്നത്. ചികിത്സ തേടിയെത്തിയ നവാസ് (52) എന്ന രോഗിക്കൊപ്പം പത്തില് കൂടുതല് കൂട്ടിരിപ്പുകാര് ഉണ്ടായിരുന്നു. ചികിത്സയ്ക്ക് ബുദ്ധിമുട്ട് നേരിട്ടതിനാല് രണ്ടുപേര് മാത്രം നിന്നിട്ട് ബാക്കിയുള്ളവരോട് പുറത്തേക്ക് പോകാന് ജഗില് ആവശ്യപ്പെട്ടു. ഇതില് പ്രകോപിതരായ കൂട്ടിരിപ്പുകാര് കൂട്ടം ചേര്ന്ന് തെറിപറയുകയും തല്ലുകയുമായിരുന്നെന്നും പിടിച്ചുമാറ്റാന് ചെന്ന ഡ്യൂട്ടിയുള്ള നഴ്സിനെയും സംഘം തെറിവിളിച്ചെന്നും പരാതിയിൽ പറയുന്നു.
ആക്രമണത്തിൽ മാനസികമായും ശാരീരികമായും ബുദ്ധിമുട്ട് ഉണ്ടായതായും തക്കതായ നടപടികള് സ്വീകരിക്കണമെന്നും ജഗില് ചന്ദ്രന് പറഞ്ഞു. തിരുവനന്തപുരം മെഡിക്കല് കോളേജിലെ മെഡിക്കല് സൂപ്രണ്ടന്റിന് ആണ് നഴ്സ് പരാതി നൽകിയത്.
