തിരുവനന്തപുരം: വീട്ടിൽ കുപ്പിയിൽ സൂക്ഷിച്ചിരുന്ന മണ്ണെണ്ണ കുടിച്ച് ചികിത്സയിലിരുന്ന രണ്ട് വയസ്സുകാരൻ മരിച്ചു. കേരള-തമിഴ്നാട് അതിർത്തിയായ കുന്നത്തുകാൽ ചെറിയകൊല്ല ദേവിയോട് പനച്ചക്കാല വീട്ടില് അനില്- അരുണ ദമ്പതികളുടെ മകന് ആരോൺ ആണ് മരിച്ചത്. കഴിഞ്ഞ ദിവസമായിരുന്നു സംഭവം.
വീട്ടുകാർ പതിവായി കുട്ടിക്ക് സെവനപ്പ് വാങ്ങി കൊടുക്കാറുണ്ട്. ഇതേ തുടർന്ന് മണ്ണെണ്ണ സൂക്ഷിച്ചിരുന്ന കുപ്പി കണ്ട് സെവൻഅപ്പാണന്ന് കരുതി കുട്ടി എടുത്ത് കുടിക്കുകയായിരുന്നു എന്നാണ് വിവരം. കൂലിപ്പണിക്കാരനായ പിതാവ് അനിൽരണ്ടുവര്ഷം മുമ്പ് മാവില് നിന്ന് വീണ് നട്ടെല്ലിന് ക്ഷതമേറ്റ് കിടപ്പിലാണ്. സംഭവ സമയത്ത് കുട്ടിയുടെ അമ്മയും വീട്ടിലുണ്ടായിരുന്നു.
അടുക്കളയുടെ സമീപത്ത് കിടന്ന കസേരയെ നീക്കി അലമാരയ്ക്ക് താഴെയെത്തിച്ച് അതില് കയറിയാണ് കുഞ്ഞ് അലമാരയില് കരുതിയിരുന്ന മണ്ണെണ്ണ എടുത്തു കുടിച്ചത്. ഉടന്തന്നെ കുട്ടിയെ കാരക്കോണം മെഡിക്കല് കോളേജിലും തുടര്ന്ന് തിരുവനന്തപുരം മെഡിക്കല് കോളേജിലും എത്തിച്ച് ചികിത്സ നൽകിയെങ്കിലും ജീവന് രക്ഷിക്കാനായില്ല.
