തിരുവനന്തപുരം: വെഞ്ഞാറമ്മൂട് കൂട്ടക്കൊലപാതകക്കേസിലെ പ്രതി അഫാനെ റിമാന്ഡ് ചെയ്തു. പതിനാല് ദിവസത്തേയ്ക്ക് ആണ് പ്രതിയെ റിമാൻഡ് ചെയ്തത്. എലി വിഷം കഴിച്ചതിനെ തുടര്ന്ന് ചികിത്സയില് കഴിയുന്ന പ്രതിയെ തിരുവനന്തപുരം മെഡിക്കല് കോളേജ് ആശുപത്രിയില് എത്തിയാണ് മജിസ്ട്രേറ്റ് റിമാന്ഡ് ചെയ്തത്.
റിമാൻഡിലായ പ്രതി ആശുപത്രിയിലെ പ്രത്യേക സെല്ലില് ഇയാള് തുടരും. പിതൃമാതാവ് സല്മാ ബീവിയെ കൊലപ്പെടുത്തിയ കേസില് അഫാന്റെ അറസ്റ്റ് രേഖപ്പെടുത്തിയിരുന്നു. ഇതിന് പിന്നാലെയാണ് നെടുമങ്ങാട് കോടതി രണ്ട് മജിസ്ട്രേറ്റ് പി ആര് അക്ഷയ മെഡിക്കല് കോളേജ് ആശുപത്രിയില് എത്തി പ്രതിയെ റിമാന്ഡ് ചെയ്തത്.
ഇക്കഴിഞ്ഞ തിങ്കളാഴ്ചയായിരുന്നു നാടിനെ നടുക്കിയ വെഞ്ഞാറമ്മൂട് കൂട്ടക്കൊലപാതകം നടന്നത്. പിതൃമാതാവ് സല്മാ ബീവി, പിതൃസഹോദരന് ലത്തീഫ്, ഭാര്യ ഷാഹിദ, സഹോദരന് അഫ്സാന്, പെണ്സുഹൃത്ത് ഫര്സാന എന്നിവരെയാണ് അഫാൻ അതിക്രൂരമായി കൊലപ്പെടുത്തിയത്.
