തിരുവനന്തപുരം: സിനിമാ സീരിയല്‍ താരം ദിലീപ് ശങ്കറിനെ ഹോട്ടലിനുള്ളില്‍ മരിച്ച നിലയില്‍ കണ്ടെത്തി. തിരുവനന്തപുരം വാൻറോസ് ജംഗ്ഷനിലെ സ്വകാര്യ ഹോട്ടലിലാണ് ദിലീപിനെ മരിച്ച നിലയിൽ കണ്ടെത്തിയത്. എന്നാൽ മരണകാരണം വ്യക്തമായിട്ടില്ല.
നാല് ദിവസം മുമ്പാണ് ദിലീപ് ശങ്കര്‍ ഈ ഹോട്ടലില്‍ മുറിയെടുത്തത്. സീരിയൽ അഭിനയത്തിനായാണ് ഇദ്ദേഹം മുറിയെടുത്തത് എന്നാണ് പുറത്തു വരുന്ന വിവരം. എന്നാൽ രണ്ട് ദിവസമായി അദ്ദേഹം മുറിവിട്ട് പുറത്തേക്കു പോയിട്ടില്ലെന്നാണ് ഹോട്ടൽ അധികൃതർ പറയുന്നത്.
ഒപ്പം അഭിനയിക്കുന്നവര്‍ ദിലീപിനെ ഫോണില്‍ വിളിച്ചിരുന്നെങ്കിലും മറുപടി കിട്ടിയിരുന്നില്ല. ഇവർ ഹോട്ടലിലേക്ക് അന്വേഷിച്ച് എത്തിയിരുന്നു. എന്നാൽ ഇന്ന് മുറിയില്‍ നിന്ന് ദുര്‍ഗന്ധം വമിച്ചതോടെ ഹോട്ടല്‍ ജീവനക്കാര്‍ മുറി തുറന്ന് നോക്കിയപ്പോഴാണ് നടനെ മരിച്ച നിലയില്‍ കണ്ടെത്തിയത്.
വിവരമറിഞ്ഞ് പോലീസ് സ്ഥലത്തെത്തിയിട്ടുണ്ട്. മരണത്തില്‍ അസ്വാഭാവികതയില്ലെന്നാണ് പോലീസിന്‍റെ പ്രാഥമിക വിലയിരുത്തല്‍. മുറിക്കുള്ളില്‍ ഫോറന്‍സിക് സംഘം പരിശോധന നടത്തുമെന്ന് കന്‍റോൺമെന്‍റ് എസിപി അറിയിച്ചു.
