കാറിലെത്തി എട്ടാംക്ലാസുകാരിയെ തട്ടിക്കൊണ്ടുപോകാൻ ശ്രമിച്ചയാൾ പിടിയിൽ. നാട്ടകത്ത് നടന്ന സംഭവത്തിൽ അതിരമ്പുഴ സ്വദേശിയെയാണ് ചിങ്ങവനം പോലീസ് പിടികൂടിയത്. കഴിഞ്ഞ ബുധനാഴ്ചയായിരുന്നു സംഭവം. A young man tried to carry a girl in a car in Kottayam
സ്കൂൾ വിട്ടു വരുന്നതിനിടെ, യുവാവ് താൻ കുട്ടിയുടെ അച്ഛന്റെ സുഹൃത്താണെന്നു പറഞ്ഞ് കാറിൽ കയറാൻ നിർബന്ധിക്കുകയായിരുന്നു. എന്നാൽ, കുട്ടി കാറിൽ കയറാൻ തയ്യാറാവാതെ വീട്ടിലേക്ക് ഓടി രക്ഷപ്പെടുകയായിരുന്നു.
കുട്ടിയുടെ രക്ഷിതാക്കളുടെ പരാതിയിൽ നടത്തിയ അന്വേഷണത്തിൽ, ചൊവ്വാഴ്ച രാത്രിയോടെയാണ് യുവാവിനെ അറസ്റ്റുചെയ്തത്. ഭാരതീയ ന്യായസംഹിതയിലെ 78, 137 വകുപ്പുകൾ പ്രകാരമാണ് ഇയാൾക്കെതിരേ പോലീസ് കേസെടുത്തത്.
വൈകീട്ട് ട്യൂഷൻ കഴിഞ്ഞുവരുമ്പോൾ കാർ സമീപത്തെ ക്ഷേത്രത്തിനടുത്ത് നിർത്തിയിട്ടിരിക്കുകയായിരുന്നു. കാറിലൂണ്ടായിരുന്ന ആൾ കഞ്ഞിക്കുഴിക്ക് പോകുന്ന വഴി ചോദിച്ചു. പിന്നീട് വീട്ടിൽക്കൊണ്ടുപോയി വിടണമോയെന്നും ചോദിച്ചു.
പെൺകുട്ടി വേണ്ടെന്നുപറഞ്ഞതോടെ,. അച്ഛൻ പറഞ്ഞിട്ടാണ് വന്നതെന്നും അച്ഛന്റെ സുഹൃത്താണെന്നും ഇയാൾ പറഞ്ഞു. കാറിൽ കയറാൻ കുറേ നിർബന്ധിച്ചു. ഇയാളുടെ കൈയിൽ ഒരു സ്പ്രേ കുപ്പിയും ഉണ്ടായിരുന്നതായി പെൺകുട്ടി പറയുന്നു.
തുടർന്ന് വേഗത്തിൽ നടന്ന പെൺകുട്ടിയുടെ അരികിലൂടെ സ്പീഡിൽ പോയ കാർ റോഡിന്റെ വശത്ത് നിർത്തിയിട്ടു. ഇതോടെ ഭയന്ന പെൺകുട്ടി വീട്ടിൽ എത്തി രക്ഷിതാക്കളോട് വിവരം പറയുകയായിരുന്നു. പ്രതിയെ ബുധനാഴ്ച കോടതിയിൽ ഹാജരാക്കും.
