വീടിനടുത്തുള്ള വെള്ളക്കെട്ടിൽ കുളിക്കാൻ ഇറങ്ങിയ ദമ്പതികളും ബന്ധുവായ യുവതിയും മക്കളുടെ കൺമുന്നിൽ വച്ച് മുങ്ങി മരിച്ചു. കൊട്ടിയം നെടുമ്പന പഞ്ചായത്തിലെ മുട്ടക്കാവ് പാക്കിസ്ഥാൻ മുക്ക് കാഞ്ഞിരവയലിൽ ഇന്നലെ വൈകിട്ട് 6 30നാണ് നാടിനെ നടുക്കിയ ദാരുണ സംഭവം അരങ്ങേറിയത്. പാകിസ്ഥാൻ മുക്കിൽ തൈക്കാവന സമീപം വാടകയ്ക്ക് താമസിക്കാൻ എത്തിയ സബീർ, സുമയ്യ, കായംകുളം താമരക്കുളം സ്വദേശി അർഷാദിന്റെ ഭാര്യ ഷജീന എന്നിവരാണ് മരിച്ചത്.
വെള്ളിയാഴ്ച വൈകിട്ട് മുളയറക്കുന്നിലെ വണ്ടിചാലിൽ ഇവർ കുളിക്കാൻ ഇറങ്ങിയപ്പോൾ ചളിയിൽ മുങ്ങി പോവുകയായിരുന്നു. സബീറിനെയും സുമയ്യയെയും കുളത്തിൽ നിന്ന് പുറത്തെടുത്ത് കൊട്ടിയത്തെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും മരണമടഞ്ഞു. തുടർന്ന് നാട്ടുകാരും ഫയർഫോഴ്സും ചേർന്ന് നടത്തിയ തിരച്ചിലിൽ സജീനയുടെ മൃതദേഹവും കണ്ടെത്തി. സജീനക്കും ദമ്പതികൾക്കും രണ്ടു കുട്ടികൾ വീതമുണ്ട്. കായംകുളത്തു നിന്നും ഒരാഴ്ച മുൻപാണ് ഇവർ ഇവിടെ താമസമാക്കിയത്.
