TOP NEWS
എ.ആർ.റഹ്‌മാന് ഓസ്‌കർ ഉൾപ്പെടെ നിരവധി അന്താരാഷ്ട്ര പുരസ്‌കാരങ്ങൾ നേടിക്കൊടുത്ത സ്ലം ഡോഗ് മില്യണയർ എന്ന ചിത്രത്തിലെ ‘ജയ് ഹോ’ എന്ന ഗാനം ചിട്ടപ്പെടുത്തിയത് മറ്റൊരാളാണെന്ന് വെളിപ്പെടുത്തൽ. ഫിലിം കമ്പനി എന്ന യുട്യൂബ് ചാനലിന് നൽകിയ അഭിമുഖത്തിലാണ് അദ്ദേഹം ആരോപണം ഉന്നയിച്ചത്.”ജയ് ഹോ’ യഥാർത്ഥത്തിൽ ഗായകൻ സുഖ്‌വിന്ദർ സിങ് ആണ് ചിട്ടപ്പെടുത്തിയത്. 2008ൽ സുഭാഷ് ഘായ് സംവിധാനം ചെയ്ത ‘യുവരാജ്’ എന്ന ചിത്രത്തിന് വേണ്ടിയാണ് ‘ജയ് ഹോ’ ചിട്ടപ്പെടുത്തിയത്. സുഖ്‌വിന്ദർ സിങ് ആണ് പാട്ടിനു പിന്നിൽ’. ഈ പാട്ട് ചിട്ടപ്പെടുത്തുമ്പോൾ റഹ്മാൻ ലണ്ടനിലായിരുന്നെന്നും രാം ഗോപാൽ വർമ പറഞ്ഞു. 2008ൽ പുറത്തിറങ്ങിയ യുവ്‌രാജ് എന്ന ചിത്രത്തിന് വേണ്ടിയാണ് ഈ ഗാനം ആദ്യം ചിട്ടപ്പെടുത്തിയതെന്ന് നേരത്തെ റിപ്പോർട്ടുകളുണ്ടായിരുന്നു. എന്നാൽ ജയ് ഹോ ചിട്ടപ്പെടുത്തിയത് എ.ആർ. റഹ്‌മാനല്ല, ഗായകൻ കൂടിയായ സുഖ്‌വിന്ദർ സിങ്ങിന്റെ ഈണമാണിത് എന്നാണ് രാം ഗോപാൽ വർമയുടെ ഇപ്പോഴത്തെ ആരോപണം.
സൽമാൻ ഖാനും കത്രീന കൈഫും അഭിനയിച്ച യുവ്‌രാജ് എന്ന ചിത്രത്തിൽ ഈ ഗാനം അനുയോജ്യമായി തോന്നാത്തതുകൊണ്ട് സംവിധായകൻ സുഭാഷ് ഘായി ഉപേക്ഷിച്ചതാണെന്ന് അദ്ദേഹം പറഞ്ഞു. അങ്ങനെ റഹ്മാൻ അത് സ്ലംഡോഗ് മില്യണയർ എന്ന സിനിമയിൽ ഉപയോഗിച്ചു. എന്നാൽ കോടികൾ പ്രതിഫലം വാങ്ങിയ റഹ്മാൻ നൽകിയത് സുഖ്‌വിന്ദർ ചിട്ടപ്പെടുത്തിയ ഈണമാണെന്ന് അറിഞ്ഞപ്പോൽ സുഭാഷ് ഘായ് പൊട്ടിത്തെറിച്ചെന്നും എന്ത് ധൈര്യത്തിലാണ് ഇത്തരമൊരു കാര്യം ചെയ്തതെന്ന് റഹ്മാനോട് ചോദിച്ചിരുന്നുവെന്നും രാം ഗോപാൽ വർമ ചോദിക്കുന്നു. ഇതിന് ‘സർ, നിങ്ങൾ എന്റെ പേരിനാണ് പണം നൽകുന്നത്, എന്റെ സംഗീതത്തിനല്ല. എനിക്കു വേണ്ടി മറ്റൊരാൾ ചിട്ടപ്പെടുത്തുന്ന സംഗീതം എന്റേതാണെന്നു ഞാൻ അംഗീകരിച്ചാൽ അത് എന്റെ പേരിൽ തന്നെയാകും. എന്റെ ഡ്രൈവറിനു പോലും ചിലപ്പോൾ സംഗീതം സൃഷ്ടിക്കാനാകും. അല്ലെങ്കിൽ മറ്റാർക്കെങ്കിലും. അത് എന്റെ പേരിൽ വന്നാൽ ആ ഈണം എന്റേതാണെന്ന് എഴുതപ്പെടും’ എന്നായിരുന്നു റഹ്മാന്റെ പ്രതികരണമെന്നും രാം ഗോപാൽ വർമ അഭിമുഖത്തിൽ പറയുന്നു. ‘ആ സമയത്ത് റഹ്മാൻ ലണ്ടനിലായിരുന്നു. സംവിധായകൻ തിരക്കുകൂട്ടിയപ്പോഴാണ് പാട്ട് ചെയ്യാൻ സുഖ്‌വിന്ദറിനെ ഏൽപ്പിച്ചത്. അങ്ങനെയാണ് ജയ് ഹോ പിറന്നത്. പിന്നീട് ചിത്രത്തിൽ നിന്നും പാട്ട് ഒഴിവാക്കി. തൊട്ടടുത്ത വർഷം സ്ലം ഡോഗ് മില്യണയർ എന്ന ചിത്രത്തിനു വേണ്ടി റഹ്മാൻ ഈ പാട്ട് ഉപയോഗിക്കുകയായിരുന്നു,’ എന്നും അദ്ദേഹം പറഞ്ഞു.
