ഡി​ഗ്രി കഴിഞ്ഞിട്ടും ജോലിയൊന്നുമായില്ല, അവസാന ശ്രമമെന്നോണം പി.എസ്.സി പരിശീലനം; ആത്മഹത്യാകുറിപ്പെഴുതി വെച്ച് യുവാവ് ജീവനൊടുക്കി

തിരുവനന്തപുരം: ‍ഡി​ഗ്രി കഴിഞ്ഞിട്ടും ജോലിയൊന്നുമായില്ല, ആത്മഹത്യാകുറിപ്പെഴുതി വെച്ച് യുവാവ് ജീവനൊടുക്കി. കിളിമാനൂർ മടവൂരിലാണ് സംഭവം.മടവൂർ കക്കോട് സുജിത്ത് ഭവനിൽ തുളസി-സുനിത ദമ്പതിമാരുടെ മകൻ സുജിത്ത് (26) നെയാണ് ആത്മഹത്യ ചെയ്ത നിലയിൽ കണ്ടെത്തിയത്. മടവൂർ കക്കോടുള്ള പാറക്കുളത്തിലാണ് മൃതദേഹം കണ്ടെത്തിയത്. തിങ്കളാഴ്ച ഉച്ചയ്ക്കു ശേഷം മുതൽ സുജിത്തിനെ കാണാതായിരുന്നു. തുടർന്ന് നടത്തിയ തിരച്ചിലിൽ പാറക്കുളത്തിൽ മൃതദേഹം കണ്ടെത്തിയത്. നാവായിക്കുളത്തുനിന്ന് ഫയർഫോഴ്‌സ് സ്റ്റേഷൻ ഓഫീസർ പ്രദീപ് കുമാറിന്റെയും തിരുവനന്തപുരത്തുനിന്ന് സുഭാഷിന്റെ നേതൃത്വത്തിൽ സ്കൂബ സംഘവും എത്തിയാണ് മൃതദേഹം പുറത്തെടുത്തത്
ജോലി ലഭിക്കാത്തതിലുള്ള മനോവിഷമമാണ് മരണത്തിന് കാരണമെന്ന് സൂചിപ്പിച്ച് സുജിത്ത് എഴുതിയതെന്ന് കരുതുന്ന കത്തും കണ്ടെത്തിട്ടുണ്ട്. ഡിഗ്രി കഴിഞ്ഞ സുജിത്ത് പി.എസ്.സി പരിശീലനത്തിന് പോകുകയായിരുന്നു. മൃതദേഹം പാരിപ്പള്ളി മെഡിക്കൽ കോളേജ് ആശുപത്രി മോർച്ചറിയിലേക്ക് മാറ്റി. സഹോദരി സുജി (മാളു). പള്ളിക്കൽ പോലീസ് കേസെടുത്തു.