ചെലവ് നിയന്ത്രിക്കുക എന്ന അടിസ്ഥാന മാര്‍ഗതോടൊപ്പം ചെറിയ ചില കാര്യങ്ങള്‍ കൂടി പ്രവര്‍ത്തിയിൽ വരുത്തിയാല്‍ സമ്പത്ത് വർദ്ധിക്കാനും ചെലവ് നിയന്ത്രിക്കാനും സാധിക്കുമെന്നാണ് പറയുന്നത്. സമ്പന്നനാകാന്‍ വാസ്തുപ്രകാരം മാറ്റങ്ങള്‍ വരുത്തിയാല്‍ മതിയെന്നും വിശ്വാസമുണ്ട്. നമ്മുടെ സാമ്പത്തിക സ്ഥിതിയില്‍ പേഴ്സിന് വളരെയധികം പ്രാധാന്യമാണ് ഉള്ളത്.
ധനാകര്‍ഷണത്തിന് ചില നിറങ്ങളിലുള്ള പേഴ്സ് നല്ലതാണെന്ന് പറയപ്പെടുന്നു. ചുവപ്പ്, മഞ്ഞ, പച്ച, ഗോള്‍ഡന്‍, കറുപ്പ്, പിങ്ക് എന്നീ നിറങ്ങള്‍ ധനാകര്‍ഷണത്തിന് വളരെ നല്ലതാണ് എന്നാണ് വിശ്വാസം. മഞ്ഞ, സ്വര്‍ണം എന്നീ നിറങ്ങള്‍ ഭാഗ്യം, അഭിവൃദ്ധി എന്നിവയെ സൂചിപ്പിക്കുന്നുവെന്നും ചുവപ്പ് നിറം വിജയത്തിൻ്റെയും പ്രശസ്തിയുടേയും നിറമാണെന്നും വാസ്തുശാസ്ത്രകാരന്‍മാര്‍ പറയുന്നു. മാത്രമല്ല, ഈ നിറം സ്ത്രീകള്‍ക്ക് യോജിക്കുമെന്നും പണം വന്നു ചേരുവാനും അത് ചെലവായി തീരാതെ സൂക്ഷിച്ച് വയ്ക്കുന്നത് ഉപകരിച്ചേക്കുമെന്നും വിശ്വാസമുണ്ട്.
പണത്തിൻ്റെ കൂടുതല്‍ വരവ് ഉണ്ടാകാനും അതുപോലെ ജീവിതത്തില്‍ വിജയം ഉണ്ടാക്കുവാനും പിങ്ക് നിറം വളരെ നല്ലതാണ്. പ്രത്യേകിച്ചും സ്ത്രീകളുടെ ഭാഗ്യ നിറമാണ് പിങ്കെന്ന് വിശ്വാസം. മിക്ക ആണുങ്ങളുടേയും പേഴ്സിൻ്റെ നിറം കറുപ്പ് ആയിരിക്കും. കറുപ്പിൻ്റെ മഹത്വം അറിഞ്ഞിട്ടൊന്നുമല്ലായിരിക്കും ഇവര്‍ ഈ നിറം തിരഞ്ഞെടുക്കുന്നത്. എന്തായാലും സാമ്പത്തികമായി മുന്നേറുന്നതിനും ജീവിതത്തില്‍ നല്ല പുരോഗതിയ്ക്കും ഈ നിറം സഹായിക്കുമെന്നും ആണ് വിശ്വാസം.
ജീവനേയും വളര്‍ച്ചയേയും സൂചിപ്പിക്കുന്ന നിറമാണ് പച്ച. അതുകൊണ്ടുതന്നെ കച്ചവടക്കാര്‍ക്ക് ഈ നിറം വളരെ ഉത്തമമാണ്. അതിലുപരി പേഴ്സ് വൃത്തിയായി സൂക്ഷിക്കുക എന്നതാണ് പ്രധാനം. പേഴ്സില്‍ നിന്നും മുഷിഞ്ഞ നോട്ട്, പഴയ ബില്ലുകള്‍ എന്നിവ എടുത്തുമാറ്റേണ്ടതാണ്. പേഴ്സ് സൂക്ഷിക്കുന്നത് വടക്ക് ദിശയിലാണെങ്കില്‍ നല്ലതാണെന്നാണ് വിശ്വാസം. കൂടാതെ പഴകിയതും കീറിയതുമായ പേഴ്സുകള്‍ സൂക്ഷിക്കരുത്.
