“ആയുസ്സ് തീർന്നാൽ വീട്ടിലിരുന്നാലും മരണം വരും..”; സന്തോഷ് നായരുടെ വാക്കുകൾ ഇന്ന് നൊമ്പരമാകുന്നു

“ആയുസ്സ് തീർന്നാൽ വീട്ടിലിരുന്നാലും മരണം വരും..”; സന്തോഷ് നായരുടെ വാക്കുകൾ ഇന്ന് നൊമ്പരമാകുന്നു

പത്തനംതിട്ട: നടൻ സന്തോഷ് നായരുടെ അപ്രതീക്ഷിത മരണത്തിന് പിന്നാലെ, ജീവിതത്തെയും മരണത്തെയും കുറിച്ച് അദ്ദേഹം പറഞ്ഞ വാക്കുകൾ സോഷ്യൽ മീഡിയയിൽ വീണ്ടും ശ്രദ്ധനേടുന്നു. ഏതാനും ദിവസങ്ങൾക്ക് മുൻപ് നൽകിയ അഭിമുഖത്തിലെ അദ്ദേഹത്തിന്റെ ചിന്തകൾ ഇപ്പോൾ വികാരഭരിതമായ ചര്‍ച്ചകൾക്ക് വഴിയൊരുക്കിയിരിക്കുകയാണ്.

സിനിമയിലെ സംഘട്ടന രംഗങ്ങളെക്കുറിച്ചുള്ള ചോദ്യത്തിന് മറുപടിയായി, “മരണം വരണമെങ്കിൽ അത് എവിടെയായാലും വരും. വീട്ടിനുള്ളിൽ ഇരുന്നാലും അപകടം സംഭവിക്കാം. അതുകൊണ്ട് ഒരു കാര്യത്തിന് ‘നോ’ പറയാറില്ല, ചെയ്യാനാകുന്നതെല്ലാം ചെയ്യും,” എന്നായിരുന്നു സന്തോഷ് നായരുടെ വാക്കുകൾ.

ചിത്രീകരണത്തിനിടെ നേരിട്ട അപകടങ്ങളെക്കുറിച്ചും അദ്ദേഹം തുറന്നുപറഞ്ഞിരുന്നു. 1983-ൽ ഒരു ചിത്രത്തിന്റെ ഷൂട്ടിംഗിനിടെ വീണ് പരിക്കേറ്റതും, വർഷങ്ങളോളം അതേ പരിക്കോടെ പ്രവർത്തിച്ചതുമാണ് അദ്ദേഹം പറഞ്ഞത്. “ഓടാൻ പറഞ്ഞാൽ ഓടും, ചാടാൻ പറഞ്ഞാൽ ചാടും,” എന്നായിരുന്നു അദ്ദേഹത്തിന്റെ ആത്മവിശ്വാസം നിറഞ്ഞ പ്രതികരണം.

അതേസമയം, ഇന്ന് പുലർച്ചെ പത്തനംതിട്ട ഏനാത്ത് എം.സി. റോഡിൽ നടന്ന വാഹനാപകടത്തിലാണ് സന്തോഷ് നായർ മരണപ്പെട്ടത്. തിരുവനന്തപുരത്ത് നിന്ന് കോട്ടയം ഭാഗത്തേക്ക് ഭാര്യയോടൊപ്പം യാത്ര ചെയ്യുന്നതിനിടെയായിരുന്നു അപകടം. അദ്ദേഹം ഓടിച്ചിരുന്ന ഇന്നോവ കാർ എതിർദിശയിൽ വന്ന ലോറിയുമായി കൂട്ടിയിടിക്കുകയായിരുന്നു.

ഗുരുതരമായി പരിക്കേറ്റ സന്തോഷ് നായരെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഭാര്യ ശുഭശ്രീക്കും പരുക്കേറ്റിട്ടുണ്ട്. ട്രക്ക് ഡ്രൈവർക്കും പരിക്കേറ്റതായി റിപ്പോർട്ട്.

1982-ൽ പുറത്തിറങ്ങിയ ‘ഇതു ഞങ്ങളുടെ കഥ’ എന്ന ചിത്രത്തിലൂടെയാണ് സന്തോഷ് നായർ സിനിമാരംഗത്തേക്ക് എത്തിയത്. ‘മോഹിനിയാട്ടം’ ആണ് അവസാനമായി അഭിനയിച്ച ചിത്രം. വില്ലൻ, നായകൻ, സഹനടൻ, ഹാസ്യനടൻ തുടങ്ങി നൂറിലധികം സിനിമകളിൽ അദ്ദേഹം ശ്രദ്ധേയമായ വേഷങ്ങൾ കൈകാര്യം ചെയ്തിട്ടുണ്ട്.

1960 നവംബർ 12-ന് തിരുവനന്തപുരത്ത് ജനിച്ച സന്തോഷ് നായർ, എം.ജി. കോളജിൽ പഠിക്കുമ്പോൾ നടൻ മോഹൻലാലിന്റെ ജൂനിയറായിരുന്നു. അദ്ദേഹത്തിന്റെ അപ്രതീക്ഷിത വിടവ് സിനിമാ ലോകത്തെയും ആരാധകരെയും ദുഃഖത്തിലാഴ്ത്തി.

English Summary

Actor Santhosh Nair’s recent comments on life and death have gone viral after his tragic death in a road accident in Pathanamthitta. He had earlier said that death can come anytime, regardless of circumstances.

സന്തോഷ് നായർ, വാഹനാപകടം, സിനിമ വാർത്ത, വൈറൽ വാക്കുകൾ, പത്തനംതിട്ട, മലയാളം സിനിമ, അനുസ്മരണം