“ആയുധങ്ങളല്ല, സ്നേഹമാണ് ജയിക്കേണ്ടത്!” ലോകത്തോട് മാർപാപ്പ; യുദ്ധക്കനലുകൾക്കിടെ ആദ്യ ഈസ്റ്റർ സന്ദേശം

വത്തിക്കാൻ സിറ്റി: ലോകമെമ്പാടും യുദ്ധങ്ങളും ആഭ്യന്തര കലഹങ്ങളും പടരുന്ന ഈ വർത്തമാനകാലത്ത്,

സമാധാനത്തിന്റെ പുതിയ കിരണങ്ങളുമായി ലിയോ പതിനാലാമൻ മാർപാപ്പ.

മാർപാപ്പയായി ചുമതലയേറ്റ ശേഷമുള്ള അദ്ദേഹത്തിന്റെ ആദ്യ ഈസ്റ്റർ സന്ദേശം ലോകത്തെ പിടിച്ചുലയ്ക്കുന്ന സംഘർഷങ്ങൾക്കെതിരെയുള്ള ശക്തമായ താക്കീതായി മാറി.

വത്തിക്കാനിലെ സെന്റ് പീറ്റേഴ്‌സ് ബസിലിക്കയിൽ നടന്ന ഈസ്റ്റർ ജാഗരണ ദിവ്യബലിയിൽ ആയിരക്കണക്കിന് വിശ്വാസികളെ സാക്ഷിനിർത്തിയാണ് അദ്ദേഹം തന്റെ നിലപാട് വ്യക്തമാക്കിയത്.

ലോകം മരവിച്ചുപോകരുത്; സംഘർഷങ്ങൾക്കും യുദ്ധങ്ങൾക്കും മുന്നിൽ പതറാതെ സമാധാനത്തിനായി കൈകോർക്കാം

മനുഷ്യരാശി ഇന്ന് നേരിടുന്ന ഏറ്റവും വലിയ വെല്ലുവിളി സംഘർഷങ്ങളോടുള്ള മരവിപ്പാണെന്ന് മാർപാപ്പ ഓർമ്മിപ്പിച്ചു.

വാർത്തകളിൽ കേൾക്കുന്ന യുദ്ധങ്ങളും മരണങ്ങളും നമ്മെ തളർത്തരുത്. മറിച്ച്, അവയെ പ്രതിരോധിക്കാൻ സമാധാനത്തിന്റെ ഭാഷ നാം ശീലിക്കണം.

ഐക്യത്തിന്റെയും സമാധാനത്തിന്റെയും ഈസ്റ്റർ സമ്മാനങ്ങൾ ലോകത്തിന്റെ എല്ലാ കോണുകളിലും പടരണമെന്നും,

നീതിക്ക് വേണ്ടി പോരാടിയ വിശുദ്ധരുടെ ജീവിതം നമുക്ക് മാതൃകയാകണമെന്നും അദ്ദേഹം ആഹ്വാനം ചെയ്തു.

വിദ്വേഷം വിതയ്ക്കുന്നവരെയല്ല, സ്നേഹം പങ്കുവെക്കുന്നവരെയാണ് കാലം ആവശ്യപ്പെടുന്നത്.

അധികാരഗർവിനെ തകർക്കുന്ന സ്നേഹത്തിന്റെ ശക്തി; ശക്തരെ താഴെയിറക്കാനും എളിയവരെ ഉയർത്താനും ഈസ്റ്ററിന് സാധിക്കും

ഈസ്റ്റർ എന്നത് വെറുമൊരു ആഘോഷമല്ല, മറിച്ച് അത് വിദ്വേഷത്തെയും വെറുപ്പിനെയും ഭൂമിയിൽ നിന്ന് പുറത്താക്കുന്ന വിപ്ലവമാണെന്ന് മാർപാപ്പ പറഞ്ഞു.

ഈ ലോകത്തിലെ ശക്തരെന്ന് സ്വയം വിശ്വസിക്കുന്നവരെ താഴെയിറക്കാനും പാർശ്വവൽക്കരിക്കപ്പെട്ടവരെ ഉയർത്താനും ഉയിർപ്പ് തിരുനാളിന് കഴിയും.

വിഭജനവും കൊലപാതകവും ലക്ഷ്യമിടുന്ന പാപത്തിന്റെ കാഠിന്യത്തിന് ദൈവം നൽകുന്ന മറുപടി സ്നേഹമാണെന്നും,

അത് മനുഷ്യജീവനുകളെ ഒന്നിപ്പിക്കുകയും പുനഃസ്ഥാപിക്കുകയും ചെയ്യുന്നുവെന്നും അദ്ദേഹം കൂട്ടിച്ചേർത്തു.

റസ്റ്റോറന്റിലേക്ക് വിമാനം തകർന്നുവീണു; 4 മരണം

ഇപ്പോഴും തുറക്കപ്പെടാത്ത ‘ശവകുടീരങ്ങൾ’; ഭയത്തെയും സ്വാർത്ഥതയെയും അതിജീവിച്ച് പുതിയൊരു ലോകം പണിയാം

നമ്മുടെ ഉള്ളിലെ അവിശ്വാസം, ഭയം, സ്വാർത്ഥത എന്നിവ ഇന്നും തുറക്കപ്പെടാത്ത ശവകുടീരങ്ങളാണെന്ന് മാർപാപ്പ ചൂണ്ടിക്കാട്ടി.

വ്യക്തിപരമായ ഇത്തരം തടവറകൾ പോലെ തന്നെ യുദ്ധം, അനീതി, ജനങ്ങളുടെയും രാഷ്ട്രങ്ങളുടെയും ഒറ്റപ്പെടൽ തുടങ്ങിയ വലിയ വിപത്തുകളും ലോകത്തിന് മുന്നിലുണ്ട്.

ഇത്തരം വെല്ലുവിളികൾക്ക് മുന്നിൽ നാം സ്തംഭിച്ചു പോകരുത്. യേശുവിന്റെ ഉയിർത്തെഴുന്നേൽപ്പ് നൽകുന്ന പ്രത്യാശ ഉപയോഗിച്ച് ഈ പ്രതിസന്ധികളെ മറികടക്കണം.

ലോകമെമ്പാടും സമാധാനം തഴച്ചുവളരാൻ ഓരോ വിശ്വാസിയും സജീവമായി ഇടപെടണമെന്ന് ലിയോ പതിനാലാമൻ മാർപാപ്പ ആവശ്യപ്പെട്ടു.

English Summary

In his historic first Easter message, Pope Leo XIV urged the global community not to grow numb to the ongoing conflicts and wars. Presiding over the Easter Vigil at St. Peter’s Basilica, the Pope emphasized that the power of love is the only answer to the gravity of sin and violence. He called for the breaking of modern “tombs” such as fear, selfishness, and national isolationism. By reflecting on the resurrection of Christ, he encouraged humanity to work collectively toward a world where peace flourishes and injustice is overcome.