തിരുവനന്തപുരം: സംസ്ഥാനത്ത് നിയമസഭാ തെരഞ്ഞെടുപ്പിന്റെ മാതൃകാ പെരുമാറ്റച്ചട്ടം നിലവിൽ വന്നതോടെ സോഷ്യൽ മീഡിയ ഉപയോഗിക്കുന്നവർക്ക് കർശന താക്കീതുമായി കേരള പോലീസ്.
ഡിജിറ്റൽ ഇടങ്ങളിലെ ഓരോ ചലനവും നിരീക്ഷണത്തിലാണെന്നും നിയമലംഘനം നടത്തുന്നവർക്കെതിരെ ജാമ്യമില്ലാ വകുപ്പുകൾ പ്രകാരം നടപടി സ്വീകരിക്കുമെന്നും പോലീസ് അറിയിച്ചു.
എഐ (AI) ഉപയോഗിച്ചുള്ള വ്യാജ പ്രചാരണങ്ങൾ: സാങ്കേതിക വിദ്യയെ ദുരുപയോഗം ചെയ്താൽ കഠിന ശിക്ഷ
ആർട്ടിഫിഷ്യൽ ഇന്റലിജൻസ് (AI), ഡീപ് ഫേക്ക് എന്നിവ ഉപയോഗിച്ച് രാഷ്ട്രീയ നേതാക്കളുടെ വ്യാജ വീഡിയോകളും ഓഡിയോകളും നിർമ്മിക്കുന്നത് ഈ തെരഞ്ഞെടുപ്പ് കാലത്ത് വലിയ വെല്ലുവിളിയാണ്.
തെരഞ്ഞെടുപ്പ് കമ്മീഷന്റെ നിർദ്ദേശപ്രകാരമുള്ള ‘AI ജനറേറ്റഡ്’ ലേബൽ ഇല്ലാത്ത സംശയാസ്പദമായ ഏത് പ്രചാരണവും നിയമനടപടിക്ക് വിധേയമാകും.
ഇത്തരം ഉള്ളടക്കങ്ങൾ നിർമ്മിക്കുന്നവർ മാത്രമല്ല, അവ ഷെയർ ചെയ്യുന്നവരും കുടുങ്ങും.
ഗ്രൂപ്പ് അഡ്മിൻമാരുടെ ഉത്തരവാദിത്തം: കോടതി വിധി ഉണ്ടെങ്കിലും കുറ്റകൃത്യത്തിന് കൂട്ടുനിന്നാൽ ക്രിമിനൽ നടപടി
ഗ്രൂപ്പിലെ ഓരോ അംഗത്തിന്റെയും പോസ്റ്റിന് അഡ്മിൻ നേരിട്ട് ഉത്തരവാദിയല്ലെന്ന കോടതി നിരീക്ഷണം നിലവിലുണ്ടെങ്കിലും ചില പ്രത്യേക സാഹചര്യങ്ങളിൽ അഡ്മിൻമാർ പ്രതിക്കൂട്ടിലാകും.
നിയമവിരുദ്ധമായ സന്ദേശങ്ങൾ ശ്രദ്ധയിൽപ്പെട്ടിട്ടും അവ നീക്കം ചെയ്യാതിരിക്കുക, വ്യാജ വാർത്തകൾ പ്രചരിപ്പിക്കാൻ അഡ്മിൻ ബോധപൂർവ്വം കൂട്ടുനിൽക്കുക,
ഐടി ആക്ട് പ്രകാരം പോലീസ് നൽകുന്ന നോട്ടീസുകളോട് സഹകരിക്കാതിരിക്കുക തുടങ്ങിയവ അഡ്മിൻമാരെ കുടുക്കിയേക്കാം.
വർഗീയതയും വിഭാഗീയതയും: ഭാരതീയ ന്യായ സംഹിത (BNS 196) പ്രകാരം കേസെടുക്കും
ജാതി, മതം, വർഗ്ഗം എന്നിവയുടെ പേരിൽ സമൂഹത്തിൽ ഭിന്നതയോ ശത്രുതയോ ഉണ്ടാക്കുന്ന തരത്തിലുള്ള സന്ദേശങ്ങൾ പ്രചരിപ്പിക്കുന്നത് അതീവ ഗുരുതരമായ കുറ്റമാണ്.
BNS 196-ാം വകുപ്പ് പ്രകാരം ഇത്തരം പ്രവൃത്തികൾ ചെയ്യുന്നവർക്കെതിരെ കർശന നടപടിയുണ്ടാകും.
വർഗീയ ചേരിതിരിവ് ഉണ്ടാക്കുന്ന പഴയ വീഡിയോകളോ ചിത്രങ്ങളോ കുത്തിപ്പൊക്കുന്നതും നിരീക്ഷണത്തിലാണ്.
നിശബ്ദ പ്രചാരണ കാലം (Silence Period): 48 മണിക്കൂർ നേരത്തെ ഡിജിറ്റൽ നിയന്ത്രണങ്ങൾ
വോട്ടെടുപ്പ് അവസാനിക്കുന്നതിന് 48 മണിക്കൂർ മുമ്പ് ‘സൈലൻസ് പീരിയഡ്’ ആരംഭിക്കും.
ഈ സമയത്ത് യാതൊരുവിധത്തിലുള്ള രാഷ്ട്രീയ പ്രചാരണങ്ങളും സോഷ്യൽ മീഡിയ ഗ്രൂപ്പുകളോ പേജുകളോ വഴി നടത്താൻ പാടില്ല.
വോട്ടെടുപ്പ് തീയതിയെക്കുറിച്ചോ സ്ഥാനാർത്ഥികളെക്കുറിച്ചോ ഉള്ള സ്ഥിരീകരിക്കാത്ത വിവരങ്ങൾ പ്രചരിപ്പിക്കരുതെന്നും പോലീസ് ഓർമ്മിപ്പിച്ചു.
English Summary
Following the implementation of the Model Code of Conduct for the upcoming Assembly Elections, the Kerala Police has issued a comprehensive advisory for social media users and group administrators. The guidelines strictly prohibit the circulation of unlabelled AI-generated content or deepfakes intended for political smear campaigns. While group admins are generally protected by court rulings regarding individual member posts, they can face criminal charges if they facilitate fake news or fail to remove illegal content after being notified.
