ഭക്ഷണം കഴിക്കുമ്പോൾ തുമ്മി; ശ്വാസംമുട്ടി ബോധംകെട്ടുവീണ അനുഭവം തുറന്ന് പറഞ്ഞ് കാർത്തിക് സൂര്യ
പ്രശസ്ത ലൈഫ്സ്റ്റൈൽ വ്ലോഗറും അവതാരകനുമായ കാർത്തിക് സൂര്യ കഴിഞ്ഞ ദിവസം നേരിട്ട ഭയപ്പെടുത്തുന്ന അനുഭവം സോഷ്യൽ മീഡിയയിൽ പങ്കുവെച്ചു. ഭക്ഷണം കഴിക്കുന്നതിനിടെ തുമ്മിയതിനെ തുടർന്ന് ശ്വാസംമുട്ടി ബോധംകെട്ടുവീണ നിമിഷങ്ങളാണ് താരം വിവരിച്ചത്.
സംഭവസമയത്ത് കാർത്തിക്കിനൊപ്പം ഭാര്യ വർഷ മാത്രമാണ് ഉണ്ടായിരുന്നത്. ഭക്ഷണം കഴിക്കുമ്പോൾ തുമ്മിയതോടെ വായിലുണ്ടായിരുന്ന ഭക്ഷണം ശ്വാസകോശത്തിലേക്ക് പോയതാണെന്ന് പിന്നീട് ഡോക്ടർമാർ വ്യക്തമാക്കിയതായി കാർത്തിക് പറഞ്ഞു.
“ഷൂട്ടിന് പോകാനായിരുന്നു പദ്ധതിയെങ്കിലും, രാത്രി ഭക്ഷണം കഴിക്കുമ്പോൾ ഞാൻ ഒന്ന് തുമ്മി. അപ്പോൾ ഭക്ഷണം വായിലുണ്ടായിരുന്നു. പിന്നീട് കണ്ണ് തുറന്നപ്പോൾ കണ്ടത് വർഷ എന്റെ മുതുകിൽ തട്ടിയും ഛർദ്ദിപ്പിക്കാൻ ശ്രമിക്കുന്നതുമായിരുന്നു,” എന്നാണ് കാർത്തിക് വിശദീകരിച്ചത്.
സംഭവത്തെക്കുറിച്ച് ഭാര്യ വർഷ പറയുന്നത് ഇങ്ങനെ: ഭക്ഷണം കഴിക്കുന്നതിനിടെ കാർത്തിക് തുടർച്ചയായി മൂന്നു തവണ തുമ്മി. തുടർന്ന് വെള്ളം കൊണ്ടുവരാൻ പറഞ്ഞതോടെ താൻ അടുക്കളയിലേക്ക് പോയി. തിരിച്ചെത്തിയപ്പോൾ കാർത്തിക് നിലത്ത് കുഴഞ്ഞുവീണ നിലയിലായിരുന്നു. പിടിച്ചുയർത്താൻ ശ്രമിച്ചപ്പോൾ തന്റെ ദേഹത്തേക്ക് തളർന്നുവീണെന്നും വർഷ പറഞ്ഞു.
തുടർന്ന് സമീപത്തുണ്ടായിരുന്ന രണ്ടുപേരെ വിളിച്ചുവരുത്തി. അവർ എത്തിയപ്പോഴും കാർത്തിക് ബോധരഹിതനായിരുന്നു. നെഞ്ചിൽ അമർത്തിയതിനെത്തുടർന്ന് അദ്ദേഹം ഛർദ്ദിക്കാൻ തുടങ്ങി. ബോധം വീണ്ടെടുക്കാതെ പലതവണ ഛർദ്ദിച്ചതായും വർഷ പറഞ്ഞു.
ശേഷം കാർത്തിക്കിനെ ആശുപത്രിയിൽ എത്തിച്ചു. പരിശോധനകളിൽ തുമ്മുന്നതിനിടെ ഭക്ഷണകഷണം ശ്വാസകോശത്തിലേക്ക് കയറിയതോടെ കുറച്ചുസമയം മസ്തിഷ്കത്തിലേക്കുള്ള ഓക്സിജൻ പ്രവാഹം തടസപ്പെട്ടതാണ് പ്രശ്നത്തിന് കാരണമെന്ന് ഡോക്ടർമാർ കണ്ടെത്തി.
അവസാനമായി ഛർദ്ദിക്കുമ്പോൾ തൊണ്ടയ്ക്ക് പരിക്കേറ്റ് രക്തസ്രാവം വരെ ഉണ്ടായിരുന്നുവെന്നും കാർത്തിക് പറഞ്ഞു. സമയത്ത് ആശുപത്രിയിലെത്തിയതിനാലാണ് വലിയ അപകടം ഒഴിവായതെന്നും അദ്ദേഹം വ്യക്തമാക്കി.
English Summary
Popular lifestyle vlogger and presenter Karthik Surya shared a frightening health incident he experienced recently. While eating, he sneezed and a piece of food accidentally entered his airway, causing breathing difficulty and temporary loss of consciousness. His wife Varsha noticed him collapse and sought help immediately. After being taken to the hospital, doctors confirmed that food particles had entered his lungs, temporarily blocking oxygen flow to the brain. He later recovered after treatment and said the incident was truly terrifying.
