ബാർ സമയം കഴിഞ്ഞെന്ന് പറഞ്ഞത് ഇഷ്ടപ്പെട്ടില്ല; ജീവനക്കാരന് നേരെ വെടിയുതിർത്ത് മദ്യപൻ; സംഭവം കോട്ടയത്ത്
കോട്ടയം: ബാർ സമയം കഴിഞ്ഞതിനാൽ പുറത്തേക്ക് പോകണമെന്ന് ആവശ്യപ്പെട്ട ജീവനക്കാരന് നേരെ മദ്യപൻ വെടിയുതിർത്ത സംഭവത്തിൽ അന്വേഷണം തുടങ്ങി. പുതുപ്പള്ളി കൈതേപ്പാലത്തെ ഒരു ബാറിലാണ് തിങ്കളാഴ്ച രാത്രി 11ഓടെ സംഭവം നടന്നത്.
സമയം കഴിഞ്ഞതിനാൽ ബിൽ അടച്ച് പുറത്തേക്ക് പോകണമെന്ന് ബാറിൽ മദ്യപിച്ചുകൊണ്ടിരുന്ന നാലംഗ സംഘത്തോട് ജീവനക്കാരൻ ആവശ്യപ്പെട്ടതോടെയാണ് തർക്കം തുടങ്ങിയത്. ഇതിനെ തുടർന്ന് സംഘത്തിലെ രണ്ടുപേർ ജീവനക്കാരനെ കയ്യേറ്റം ചെയ്യാൻ ശ്രമിച്ചതായാണ് വിവരം.
തർക്കത്തിനുശേഷം സംഘം ബാറിന് പുറത്തേക്ക് പോയെങ്കിലും അവരിൽ ഒരാൾ പാർക്കിങ് ഏരിയയിൽ നിന്ന് ജീവനക്കാരന് നേരെ തോക്കുചൂണ്ടി. സംഘത്തിലെ മറ്റ് രണ്ട് പേർ തടയാൻ ശ്രമിച്ചെങ്കിലും ഇയാൾ വെടിയുതിർക്കുകയായിരുന്നുവെന്ന് പരാതിയിൽ പറയുന്നു.
അദ്ഭുതകരമായി ബാർ ജീവനക്കാരന് പരിക്കേൽക്കാതെ രക്ഷപ്പെടുകയായിരുന്നു. സംഭവത്തിന് പിന്നാലെ പ്രതികൾ സ്ഥലത്തുനിന്ന് കടന്നുകളഞ്ഞു.
ബാർ മാനേജ്മെന്റ് നൽകിയ പരാതിയുടെ അടിസ്ഥാനത്തിൽ ഈസ്റ്റ് പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു. എയർ പിസ്റ്റൾ ഉപയോഗിച്ചാണ് വെടിവെച്ചതെന്നാണ് പൊലീസിന്റെ പ്രാഥമിക നിഗമനം. പ്രതികളെ തിരിച്ചറിഞ്ഞതായും ഉടൻ പിടികൂടുമെന്നും പൊലീസ് അറിയിച്ചു.
അതേസമയം, ബാറിലെ വനിതാ ജീവനക്കാരോടു സംഘത്തിലെ ചിലർ മോശമായി പെരുമാറിയതാണ് തർക്കത്തിനിടയാക്കിയതെന്നാരോപണവും ഉയർന്നിട്ടുണ്ട്.
English Summary
A bar employee in Kottayam narrowly escaped after a drunken man allegedly fired a shot at him following an argument over closing time. The incident occurred around 11 pm at a bar in Kaithapalam, Puthuppally.
