വാക്കുകൾക്ക് അപ്പുറം പെൺകരുത്തിന്റെ താളം; കോവളത്ത് വിസ്മയമായി ‘ഗോസിപ്പ്’
സ്ത്രീസൗഹൃദത്തിന്റെ ശക്തിയും പെൺകരുത്തിന്റെ കഥയും വേദിയിൽ അവതരിപ്പിച്ച് കോവളം കേരള ആർട്സ് ആൻഡ് ക്രാഫ്റ്റ്സ് വില്ലേജിൽ ‘WOW – Women’s Week’ ആഘോഷങ്ങൾക്ക് തുടക്കം.
‘ഗോസിപ്പ്’ എന്ന മൂവ്മെന്റ് തിയറ്റർ നൃത്തശില്പം പ്രേക്ഷകർക്ക് പുതിയ കാഴ്ചപ്പാട് സമ്മാനിച്ചുകൊണ്ട് പരിപാടിയുടെ ഉദ്ഘാടന ദിനം ശ്രദ്ധേയമായി.
ടിക്കർ ഇവന്റ്സുമായി (tiqr events) സഹകരിച്ച് സംഘടിപ്പിച്ച ഈ പരിപാടി, കൊച്ചി–മുസിരിസ് ബിനാലെയിൽ മികച്ച പ്രതികരണം നേടിയതിനു ശേഷമാണ് കോവളത്ത് അവതരിപ്പിച്ചത്.
45 മിനിറ്റ് ദൈർഘ്യമുള്ള അവതരണം, സ്ത്രീകളെ തളച്ചിടുന്ന വെറും പാഴ് വാക്കുകളല്ല ‘ഗോസിപ്പ്’ എന്നും, മറിച്ച് പുരുഷാധിപത്യ സമൂഹത്തിൽ സ്ത്രീകൾ പരസ്പരം പങ്കിടുന്ന കരുതലിന്റെയും അതിജീവനത്തിന്റെയും ആശയവിനിമയമാണെന്നും അവതരിപ്പിച്ചു.
തുടിപ്പ് ഡാൻസ് ഫൗണ്ടേഷനിലെ കലാകാരികളായ അഞ്ജലി കൃഷ്ണദാസ്, പൊന്നു സജീവ്, ഗ്രീഷ്മ നരേന്ദ്രൻ എന്നിവർ ചേർന്നാണ് നൃത്തശില്പം അവതരിപ്പിച്ചത്.
വിവിധ ഇന്ത്യൻ നൃത്തരൂപങ്ങളുടെ സമന്വയമായ പ്രകടനം സ്ത്രീകൾ ഒത്തുചേരുന്ന ‘മൂന്നാം ഇടങ്ങൾ’ (Third Spaces) എന്ന ആശയത്തിന്റെ പ്രാധാന്യം പ്രേക്ഷകർക്കു മുന്നിൽ വെച്ചു.
ചാരു ഹരിഹരൻ ഒരുക്കിയ സംഗീതവും ഗൗരി മനോഹരിയുടെ ലൈറ്റിംഗും ശിൽപ സുഗുണന്റെ വസ്ത്രാലങ്കാരവും അവതരണത്തിന് കൂടുതൽ ഭംഗി നൽകി.
സ്ത്രീത്വത്തിന്റെ കരുത്തും സർഗാത്മകതയും ആഘോഷിക്കുന്ന സൃഷ്ടികൾക്ക് വേദിയൊരുക്കുന്നതിൽ അഭിമാനമുണ്ടെന്ന് ക്രാഫ്റ്റ്സ് വില്ലേജ് സി.ഒ.ഒ ശ്രീപ്രസാദ് ടി.യു. പറഞ്ഞു.
പാരമ്പര്യ കലകളും സമകാലിക വിഷയങ്ങളും തമ്മിലുള്ള സംവാദം സാമൂഹിക മാറ്റത്തിന് വഴിയൊരുക്കുമെന്നും അദ്ദേഹം കൂട്ടിച്ചേർത്തു.
ഇന്ന് ‘രംഗോത്സവ്’ ഹോളി ആഘോഷം
വനിതാ വാരാഘോഷങ്ങളുടെ ഭാഗമായി ഇന്ന് (മാർച്ച് 7) ‘രംഗോത്സവ് 2026’ എന്ന പേരിൽ ഹോളി ആഘോഷവും ക്രാഫ്റ്റ്സ് വില്ലേജിൽ നടക്കും.
വൈകിട്ട് 5 മുതൽ രാത്രി 10 വരെ നീളുന്ന ആഘോഷത്തിൽ ലൈവ് ഡിജെ, മ്യൂസിക് ബാൻഡ്, ലൈവ് ഡോൾ, പെർക്കഷൻ എന്നിവയും അവതരിപ്പിക്കും.
കാണികൾക്കായി റെയിൻ ഡാൻസ്, ഫോം പാർട്ടി, ലേസർ ദർബൂക്ക തുടങ്ങിയ വിനോദ പരിപാടികളും ഒരുക്കിയിട്ടുണ്ട്.
പ്രകൃതിദത്ത ഹെർബൽ കളറുകൾ ഉപയോഗിച്ചുള്ള ആഘോഷത്തിനൊപ്പം ഫുഡ് സ്റ്റാളുകൾ, ഗെയിമുകൾ, സെൽഫി പോയിന്റുകൾ തുടങ്ങിയവയും ഒരുക്കിയിട്ടുണ്ടെന്ന് സംഘാടകർ അറിയിച്ചു.
English Summary
The “WOW – Women’s Week” celebrations began at the Kerala Arts and Crafts Village in Kovalam with the movement theatre performance “Gossip.” The 45-minute dance production explored women’s friendships and support systems in a patriarchal society. Performed by artists from Thudippu Dance Foundation, the show blended multiple Indian dance forms. As part of the celebrations, the Holi event “Rangotsav 2026” will also be held with music, dance, and cultural activities.
