5,000 രൂപ വരെയുള്ള ഇടപാടുകൾക്ക് യുപിഐ പിൻ വേണ്ട; വിപ്ലവകരമായ മാറ്റവുമായി ഫോൺപേ
ന്യൂഡൽഹി: ഉപയോക്താക്കൾക്ക് കൂടുതൽ എളുപ്പത്തിലും വേഗത്തിലും ഇടപാടുകൾ നടത്താൻ സഹായിക്കുന്ന പുതിയ സംവിധാനവുമായി യുപിഐ പ്ലാറ്റ്ഫോമായ ഫോൺപേ.
ചെറിയ തുകയുള്ള ഇടപാടുകൾക്കുപോലും ആവർത്തിച്ച് പിൻ നൽകേണ്ട ബുദ്ധിമുട്ട് ഒഴിവാക്കാനാണ് പുതിയ ഫീച്ചർ അവതരിപ്പിച്ചത്.
വിരലടയാളമോ ഫേസ് ഐഡിയോ ഉപയോഗിച്ച് പേയ്മെന്റുകൾ സ്ഥിരീകരിക്കാനാകുന്ന ബയോമെട്രിക് പേയ്മെന്റ് സംവിധാനം വഴിയാണ് ഇനി നിർദ്ദിഷ്ട ഇടപാടുകൾ പിൻ നൽകാതെ പൂർത്തിയാക്കാൻ കഴിയുക.
പേയ്മെന്റ് പ്രക്രിയ കൂടുതൽ വേഗത്തിലും സുഗമമായും സുരക്ഷിതമായും നടത്താനാണ് ഈ സംവിധാനം രൂപകൽപ്പന ചെയ്തതെന്ന് കമ്പനി അറിയിച്ചു. യാത്രയ്ക്കിടയിലോ പൊതു ഇടങ്ങളിലോ സ്ഥിരമായി ഡിജിറ്റൽ പേയ്മെന്റ് നടത്തുന്നവർക്ക് ഇത് ഏറെ പ്രയോജനകരമാകും.
ദൈനംദിന ചെറു വാങ്ങലുകൾക്ക് യുപിഐ ഉപയോഗിക്കുന്ന ഉപയോക്താക്കൾക്ക് ഈ അപ്ഡേറ്റ് വലിയ ആശ്വാസമാകും. 5,000 രൂപ വരെ ഉള്ള ഇടപാടുകൾ ബയോമെട്രിക് സ്ഥിരീകരണത്തിലൂടെ പിൻ ഇല്ലാതെ പൂർത്തിയാക്കാം.
എന്നാൽ സുരക്ഷ ഉറപ്പാക്കുന്നതിനായി 5,000 രൂപയ്ക്ക് മുകളിലുള്ള ഇടപാടുകൾക്ക് യുപിഐ പിൻ നിർബന്ധമായിരിക്കും.
സ്മാർട്ട്ഫോണിലെ ബിൽറ്റ്-ഇൻ സ്ക്രീൻ ലോക്ക് സംവിധാനമായ വിരലടയാളമോ മുഖം തിരിച്ചറിയലോ ടു-ഫാക്ടർ ഓതന്റിക്കേഷൻ പോലെ പ്രവർത്തിക്കുന്ന തരത്തിലാണ് സംവിധാനം രൂപകൽപ്പന ചെയ്തിരിക്കുന്നത്.
നിലവിൽ ഈ സൗകര്യം ആൻഡ്രോയിഡ് ഉപയോക്താക്കൾക്കാണ് ലഭ്യമാകുന്നത്. ഫോൺപേ ആപ്പിലെ പ്രൊഫൈൽ സെക്ഷനിൽ “Manage Payments” തിരഞ്ഞെടുക്കുകയും “Biometric Pay” ഓപ്ഷൻ ആക്ടിവേറ്റ് ചെയ്യുകയും ചെയ്താൽ ലിങ്ക് ചെയ്ത ബാങ്ക് അക്കൗണ്ടിനായി ഈ സംവിധാനം ഉപയോഗിക്കാം.
English Summary
PhonePe has introduced a biometric payment feature that allows users to approve UPI transactions using fingerprint or Face ID, eliminating the need to enter a PIN for small payments. Transactions up to ₹5,000 can be completed this way, while larger payments will still require a UPI PIN for security. The feature aims to make payments faster and more convenient, especially in public places or while traveling. It is currently available only for Android users.
phonepe-biometric-payment-feature-upi-without-pin
PhonePe, UPI, Digital Payments, Biometric Authentication, Fintech, Technology News, India Payments
