ചിക്കൻ പ്രേമികൾക്ക് ‘ലോട്ടറി’; കോഴി വില കൂപ്പുകുത്തി! മുട്ടയ്ക്കും വില കുറഞ്ഞു
കൊല്ലം:
ക്രിസ്മസും ന്യൂയറും കഴിഞ്ഞിട്ടും ഉയർന്ന നിലയിൽ തുടരുകയായിരുന്ന ഇറച്ചിക്കോഴി വില ജില്ലയിൽ പെട്ടെന്ന് കുത്തനെ കുറഞ്ഞു.
കിലോയ്ക്ക് ഏകദേശം 50 രൂപയോളം ഇടിഞ്ഞത് ഉപഭോക്താക്കൾക്ക് വലിയ ആശ്വാസമായി.
ക്രിസ്മസ് കാലത്ത് ഇറച്ചിക്കോഴി വില കിലോയ്ക്ക് 160 രൂപയായിരുന്നു.
പിന്നീട് 20 രൂപയോളം വർധിച്ച് കഴിഞ്ഞ മാസം ലൈവ് ചിക്കൻ വില 185–190 രൂപ വരെ എത്തിയിരുന്നു. എന്നാൽ ഇന്നലെ ജില്ലയിൽ ഇറച്ചിക്കോഴി വില 135–140 രൂപ നിരക്കിലായിരുന്നു (പ്രാദേശികത അനുസരിച്ച് വ്യത്യാസം ഉണ്ടാകാം).
സാധാരണയായി കച്ചവടം കൂടുകയോ ക്ഷാമം നേരിടുകയോ ചെയ്യുന്ന സമയങ്ങളിലാണ് വില ഉയരാറുള്ളത്.
ഇപ്പോൾ ആവശ്യത്തിന് കോഴി ലഭ്യമായിരിക്കെ, വിപണിയിലെ ആവശ്യകത കുറഞ്ഞതാണ് വില ഇടിയാൻ പ്രധാന കാരണം. അതേസമയം നാടൻ കോഴിയുടെ വിലയിൽ മാറ്റമില്ല. കിലോയ്ക്ക് ഇപ്പോഴും 220–230 രൂപ നിരക്കിലാണ് വ്യാപാരം.
ചൂട് കൂടിയതോടെ മുട്ടവിലയിലും ഇടിവ് രേഖപ്പെടുത്തി.
കഴിഞ്ഞ മാസം മൊത്തവില 7.10 രൂപയായിരുന്ന മുട്ടയുടെ നിരക്ക് ഇപ്പോൾ 6.20 രൂപയായി. ദക്ഷിണേന്ത്യയിലെ പ്രധാന കോഴിമുട്ട ഉത്പാദന കേന്ദ്രമായ നാമക്കൽ-ൽ കഴിഞ്ഞ ദിവസം മുട്ടയുടെ വില 5.50 രൂപയായിരുന്നു.
കേരളത്തിലേക്ക് മുട്ട കൊണ്ടുവരുമ്പോൾ വാഹനച്ചെലവ്, കയറ്റിറക്കുകൂലി, ഏജന്റുമാരുടെ ലാഭം തുടങ്ങിയവ കൂട്ടിച്ചേർക്കുന്നതിനാൽ ഇവിടെ എത്തുമ്പോൾ വില 6.10 രൂപയാകും.
നിലവിൽ 6.20 രൂപ നിരക്കിലാണ് മൊത്തക്കച്ചവടം നടക്കുന്നത്. കടകളിൽ മുട്ടയ്ക്ക് 7 മുതൽ 7.50 രൂപ വരെയാണ് ഈടാക്കുന്നത്.
കഴിഞ്ഞ നവംബറിൽ മുട്ടയുടെ വില 6.50 രൂപയായിരുന്നു. ഡിസംബർ 15 ഓടെ ഇത് 8 രൂപയിലേക്കും ഉയർന്നു.
അന്ന് ഉത്തരേന്ത്യൻ സംസ്ഥാനങ്ങളിലടക്കം ആവശ്യകത വർധിച്ചതും ആഭ്യന്തര വിപണി ശക്തമായതും ലഭ്യത കുറഞ്ഞതുമാണ് വില വർധനയ്ക്ക് കാരണമായത്.
കേരളത്തിന് ആവശ്യമായ മുട്ടയുടെ ഭൂരിഭാഗവും എത്തുന്നത് തമിഴ്നാട് സംസ്ഥാനത്തിലെ നാമക്കലിൽ നിന്നാണ്.
വിലക്കുറവ് ഉപഭോക്താക്കൾക്ക് ആശ്വാസമാണെന്നും, ചൂടുകാലവും നോമ്പുകാലവും ആരംഭിക്കുന്നതിനാൽ മുട്ടയുടെ വില ഇനിയും താഴാനിടയുണ്ടെന്നും ഓൾ കേരള പൗൾട്രി ഫെഡറേഷൻ സംസ്ഥാന ജനറൽ സെക്രട്ടറി കൂടിയായ നാഷണൽ എഗ്ഗ് കോ ഓർഡിനേഷൻ കമ്മിറ്റി അംഗം എസ്.കെ. നസീർ പറഞ്ഞു.
ഡിമാൻഡ് കുറഞ്ഞതും ഉത്പാദനം വർധിച്ചതുമാണ് ഇറച്ചിക്കോഴി വില ഇടിയാൻ കാരണമായതെന്ന് വ്യാപാരി വൈശാഖും വ്യക്തമാക്കി.
ചിക്കൻ വില വരും ദിവസങ്ങളിൽ വീണ്ടും ഉയരാനിടയുണ്ടെന്നും അദ്ദേഹം പറഞ്ഞു.
English Summary
Chicken prices in Kollam have dropped sharply by nearly ₹50 per kg after remaining high through Christmas and New Year. Reduced market demand and higher production have led to the fall, while country chicken prices remain unchanged. Egg prices have also declined due to rising temperatures. Most eggs supplied to Kerala come from Namakkal in Tamil Nadu, and prices may fall further during the summer and fasting season.
kollam-chicken-egg-price-drop-namakkal-kerala-news
Kollam, chicken price, egg price, poultry market, Namakkal, Tamil Nadu, Kerala news, consumer relief, poultry federation, food prices
