ആറ്റുകാലിലേക്ക് ഭക്തജനപ്രവാഹം; പൊങ്കാല മഹോത്സവത്തിന് കെ.എസ്.ആർ.ടി.സിയുടെ സ്പെഷ്യൽ പ്ലാൻ! റൂട്ടുകളും പാർക്കിംഗും ഇങ്ങനെ…

തിരുവനന്തപുരം: ലോകപ്രസിദ്ധമായ ആറ്റുകാൽ പൊങ്കാല മഹോത്സവം മാർച്ച് 3-ന് നടക്കും.

ലക്ഷക്കണക്കിന് ഭക്തജനങ്ങളാണ് ഈ ദിനം അനന്തപുരിയിലേക്ക് ഒഴുകിയെത്തുക.

ഉത്സവത്തിരക്ക് പരിഗണിച്ച് ഭക്തർക്ക് സുഗമമായ യാത്ര ഉറപ്പാക്കാൻ വിപുലമായ സജ്ജീകരണങ്ങളാണ് കെ.എസ്.ആർ.ടി.സി ഒരുക്കിയിരിക്കുന്നത്.

വിവിധ ഡിപ്പോകളിൽ നിന്നുള്ള അധിക സർവീസുകൾക്ക് പുറമെ, പൊങ്കാല നിവേദ്യത്തിന് ശേഷം ഭക്തരെ തിരികെ എത്തിക്കാൻ നഗരത്തിന്റെ വിവിധ ഭാഗങ്ങളിൽ ബസുകൾ മുൻകൂട്ടി സജ്ജമാക്കും.

ഉള്ളൂർ, എം.സി റോഡ്, പേരൂർക്കട ഭാഗങ്ങളിലേക്കുള്ള യാത്രക്കാർക്കായി വികാസ് ഭവൻ കേന്ദ്രീകരിച്ചുള്ള ക്രമീകരണങ്ങൾ

നഗരത്തിന്റെ വടക്കൻ മേഖലകളായ ഉള്ളൂർ, ശ്രീകാര്യം, പേരൂർക്കട എന്നിവിടങ്ങളിലേക്ക് പോകേണ്ട ഭക്തർക്കായി വികാസ് ഭവൻ കേന്ദ്രീകരിച്ചാണ് പ്രധാനമായും ബസുകൾ ക്രമീകരിച്ചിരിക്കുന്നത്.

നിവേദ്യത്തിന് രണ്ട് മണിക്കൂർ മുൻപ് തന്നെ ബസുകൾ ഗവ. ലോ കോളേജ്, ബാർട്ടൻഹിൽ സ്‌കൂൾ ഗ്രൗണ്ട്, പാറ്റൂർ,

വഞ്ചിയൂർ, ഫോർട്ട് സ്കൂൾ, അട്ടക്കുളങ്ങര, കിഴക്കേകോട്ട വഴി പഴവങ്ങാടി വരെ ലൈൻ അപ്പ് ചെയ്യും.

പൊങ്കാലയ്ക്ക് ശേഷം ഈസ്റ്റ് ഫോർട്ട് നോർത്ത് സ്റ്റാൻഡിൽ നിന്നും ഈ ഭാഗങ്ങളിലേക്ക് തുടർച്ചയായി സർവീസുകൾ ലഭ്യമായിരിക്കും.

നെയ്യാറ്റിൻകര, നേമം, കമലേശ്വരം ഭാഗങ്ങളിലേക്ക് പ്രത്യേക കോറിഡോറുകൾ; മരുതൂർക്കടവ് വഴി അധിക സർവീസുകൾ

തെക്കൻ മേഖലകളിലേക്ക് പോകുന്നവർക്കായി കരമന – പി.ആർ.എസ് ആശുപത്രി – കിള്ളിപ്പാലം റൗണ്ട് കേന്ദ്രീകരിച്ച് പ്രത്യേക പാർക്കിംഗ് ഒരുക്കും.

നെയ്യാറ്റിൻകര, നേമം ഭാഗങ്ങളിൽ നിന്നുള്ള ബസുകൾ കൈമനം, കരുമം വഴി കാലടി സ്‌കൂൾ മുതൽ മരുതൂർക്കടവ് പാലം വരെ മുൻകൂട്ടി പാർക്ക് ചെയ്യും.

പണ്ടത്തെ ‘പുണ്യാഹം’ ഇപ്പോഴും റെഡി; ദേവസ്വം ബോർഡിൽ പൂജാരിയാകാൻ ജാതി സർട്ടിഫിക്കറ്റ് പോരാ, തൊലിക്കട്ടിയും വേണം!

വിഴിഞ്ഞം, തിരുവല്ലം ഭാഗങ്ങളിലേക്കുള്ള ബസുകൾ കമലേശ്വരം സ്കൂൾ കേന്ദ്രീകരിച്ച് വൺവേ സർവീസുകൾ നടത്തും.

ഈ പോയിന്റുകളിലെല്ലാം ഭക്തരെ സഹായിക്കാൻ സ്റ്റേഷൻ മാസ്റ്റർ ഓഫീസുകൾ പ്രവർത്തിക്കും.

കാട്ടാക്കട, മലയിൻകീഴ് ഭാഗങ്ങളിലേക്ക് ബേക്കറി ജംഗ്ഷൻ വഴി യാത്ര; ഫാസ്റ്റ് പാസഞ്ചറുകൾക്കായി പ്രത്യേക മേഖല

മലയിൻകീഴ്, കാട്ടാക്കട ഭാഗങ്ങളിലേക്ക് പോകുന്ന ബസുകൾ ബേക്കറി ജംഗ്ഷനിൽ പാർക്ക് ചെയ്ത് നിവേദ്യത്തിന് ശേഷം സർവീസ് തുടങ്ങും.

കെ.എസ്.ആർ.ടി.സി സെൻട്രൽ സ്റ്റാൻഡിൽ നിന്നുള്ള ദീർഘദൂര സർവീസുകൾ മുടക്കമില്ലാതെ നടക്കാനുള്ള ക്രമീകരണങ്ങൾ ചെയ്തിട്ടുണ്ട്.

ഹ്രസ്വദൂര ഫാസ്റ്റ് പാസഞ്ചറുകൾ പാളയം മുതൽ പനവിള വരെ നിരയായി നിർത്തിയിടും. തിരക്ക് കൂടുന്നതിനനുസരിച്ച് തമ്പാനൂർ യൂണിറ്റിലേക്ക് ബസുകൾ പ്രവേശിപ്പിച്ച് യാത്രക്കാരെ കയറ്റി വിടും.

സ്വകാര്യ വാഹനങ്ങൾക്ക് കർശന നിയന്ത്രണം; ഏഴ് കേന്ദ്രങ്ങളിൽ കെ.എസ്.ആർ.ടി.സി കൺട്രോൾ റൂമുകൾ

ഉത്സവം തുടങ്ങുന്ന ഫെബ്രുവരി 23 മുതൽ കെ.എസ്.ആർ.ടി.സി ബസുകൾക്കായി നീക്കിവെച്ചിട്ടുള്ള സ്ഥലങ്ങളിൽ മറ്റ് വാഹനങ്ങൾ പാർക്ക് ചെയ്യുന്നത് കർശനമായി നിരോധിച്ചിട്ടുണ്ട്.

പാർക്കിംഗിനായി നിശ്ചയിച്ചിട്ടുള്ള ഏഴ് പ്രധാന പോയിന്റുകളിലും പ്രത്യേക ഓഫീസുകൾ പ്രവർത്തിക്കും.

ഭക്തരുടെ സുരക്ഷയും സുഗമമായ യാത്രയും കണക്കിലെടുത്ത് നിർദ്ദേശങ്ങൾ പാലിക്കണമെന്ന് അധികൃതർ അറിയിച്ചു.

English Summary

KSRTC has finalized a massive transportation strategy for the Attukal Pongala on March 3rd. To manage the influx of millions of devotees, buses will be pre-parked at key locations like Vikas Bhavan, Bakery Junction, and Kamaleswaram two hours before the ‘Nivedyam’ ceremony. Specific corridors have been established for routes towards Neyyattinkara, Kattakada, and northern suburbs to avoid gridlock.