ദീപക്കിന്റെ മരണം; പ്രതി ഷിംജിതയുടെ ജാമ്യാപേക്ഷ പരിഗണിക്കുന്നത് നാളത്തേക്ക് മാറ്റി
കോഴിക്കോട് ഗോവിന്ദാപുരം സ്വദേശി ദീപക്കിന്റെ ആത്മഹത്യയുമായി ബന്ധപ്പെട്ട് അറസ്റ്റിലായ ഷിംജിത മുസ്തഫയുടെ ജാമ്യാപേക്ഷ പരിഗണിക്കുന്നത് കോടതി നാളത്തേക്ക് മാറ്റി.
കോഴിക്കോട് പ്രിൻസിപ്പൽ സെഷൻസ് കോടതിയാണ് ഈ അപേക്ഷ പരിഗണിക്കുന്നത്. കേസിൽ വാദം കേൾക്കേണ്ട ജഡ്ജി അവധിയിലായതിനാലാണ് നടപടികൾ നാളത്തേക്ക് നീട്ടിവെച്ചത്.
കഴിഞ്ഞ ദിവസം കോടതി ജാമ്യാപേക്ഷ പരിഗണനയ്ക്ക് എടുത്തിരുന്നെങ്കിലും പ്രോസിക്യൂഷന്റെയും പ്രതിഭാഗത്തിന്റെയും വാദങ്ങൾ കൂടുതൽ വിശദമായി കേൾക്കുന്നതിനായി ഇന്നത്തേക്ക് മാറ്റുകയായിരുന്നു.
നിലവിൽ ആത്മഹത്യാപ്രേരണാ കുറ്റമാണ് ഷിംജിതയ്ക്കെതിരെ ചുമത്തിയിരിക്കുന്നത്.
ബസ്സിൽ വെച്ച് തന്നോട് മോശമായി പെരുമാറി എന്നാരോപിച്ച് ഷിംജിത ദീപക്കിന്റെ വീഡിയോ പകർത്തി സമൂഹമാധ്യമങ്ങളിൽ പ്രചരിപ്പിച്ചിരുന്നു.
ഈ ദൃശ്യങ്ങൾ വൈറലായതോടെ വലിയ രീതിയിലുള്ള സൈബർ ആക്രമണമാണ് ദീപക്കിന് നേരിടേണ്ടി വന്നത്. ഇതിൽ മനംനൊന്താണ് യുവാവ് ജീവനൊടുക്കിയത്.
തുടർന്ന് നടത്തിയ അന്വേഷണത്തിലാണ് വീഡിയോ പ്രചരിപ്പിച്ച ഷിംജിതയ്ക്കെതിരെ പോലീസ് നടപടിയെടുത്തത്.
ജനുവരി 21-നാണ് വടകരയിലെ ബന്ധുവീട്ടിൽ നിന്നും ഷിംജിതയെ പോലീസ് പിടികൂടിയത്. അറസ്റ്റിന് ശേഷം കുന്ദമംഗലം ഒന്നാം ക്ലാസ് മജിസ്ട്രേറ്റ് കോടതിയിൽ ഹാജരാക്കിയ ഇവരെ 14 ദിവസത്തേക്ക് റിമാൻഡ് ചെയ്തിരുന്നു.
ഇതേത്തുടർന്നാണ് പ്രതിഭാഗം ജാമ്യാപേക്ഷയുമായി സെഷൻസ് കോടതിയെ സമീപിച്ചത്. യുവതിയുടെ മുൻകൂർ ജാമ്യാപേക്ഷ നേരത്തെ ഹൈക്കോടതി തള്ളിയിരുന്നു.
കൃത്യമായ തെളിവുകളുടെ അടിസ്ഥാനത്തിലാണ് പോലീസ് ഷിംജിതയെ അറസ്റ്റ് ചെയ്തത്. ദീപക്കിന്റെ മരണത്തിന് പിന്നാലെ സൈബർ ഇടങ്ങളിലെ വിചാരണകൾക്കെതിരെ വലിയ രീതിയിലുള്ള പ്രതിഷേധം ഉയർന്നിരുന്നു.
യാഥാർത്ഥ്യം അന്വേഷിക്കാതെ ഒരാളെ സമൂഹത്തിന് മുന്നിൽ അപരാധിയായി ചിത്രീകരിക്കുന്നത് ക്രിമിനൽ കുറ്റമാണെന്ന് പോലീസ് മുന്നറിയിപ്പ് നൽകിയിട്ടുണ്ട്.
ഷിംജിതയുടെ ജാമ്യാപേക്ഷയിൽ നാളെ കോടതി കൈക്കൊള്ളുന്ന തീരുമാനം കേസിൽ നിർണ്ണായകമാകും. നീതി ഉറപ്പാക്കണമെന്ന ആവശ്യവുമായി ദീപക്കിന്റെ കുടുംബവും രംഗത്തുണ്ട്.
