‘അത്രയ്ക്ക് കഷ്ടപ്പെട്ടാണ് ഞാൻ ജീവിച്ചത്; എന്നിട്ടും നിങ്ങളെല്ലാവരും എന്നെ വേശ്യയെന്ന് വിളിക്കുന്നു, അത് അത്യന്തം വേദനാജനകം’; ശ്രീലക്ഷ്മി അറയ്ക്കൽ

‘അത്രയ്ക്ക് കഷ്ടപ്പെട്ടാണ് ഞാൻ ജീവിച്ചത്; എന്നിട്ടും നിങ്ങളെല്ലാവരും എന്നെ വേശ്യയെന്ന് വിളിക്കുന്നു, അത് അത്യന്തം വേദനാജനകം’; ശ്രീലക്ഷ്മി അറയ്ക്കൽ

ആക്ടിവിസ്റ്റ് ശ്രീലക്ഷ്മി അറയ്ക്കൽ പങ്കുവെച്ച സോഷ്യൽ മീഡിയ കുറിപ്പുകൾ വലിയ വിവാദങ്ങൾക്ക് വഴിവെച്ചതിന് പിന്നാലെ, കടുത്ത സൈബർ ആക്രമണങ്ങൾക്ക് ഇരയായ അനുഭവം തുറന്നു പറഞ്ഞ് ശ്രീലക്ഷ്മി അറയ്ക്കൽ.

അപകീർത്തികരമായ അധിക്ഷേപങ്ങൾക്കെതിരെ പ്രതികരിക്കവെ വികാരാധീനയായി പൊട്ടിക്കരഞ്ഞാണ് താൻ കടന്നുവന്ന ജീവിത സാഹചര്യങ്ങൾ അവർ വിശദീകരിച്ചത്.

ദീപക് എന്ന വ്യക്തിയുടെ മരണവുമായി ബന്ധപ്പെട്ട് ശ്രീലക്ഷ്മി പങ്കുവെച്ച കുറിപ്പാണ് വിവാദങ്ങൾക്ക് തുടക്കമായത്.

ബസിൽ സ്ത്രീകൾ നേരിടുന്ന ലൈംഗികാതിക്രമങ്ങൾക്കെതിരെ പ്രതികരിക്കുന്നവരെ പിന്തുണച്ച് എഴുതിയ കുറിപ്പിൽ, “ഇനി എങ്കിലും ബസുകളിൽ സ്ത്രീകളെ ആക്രമിക്കാൻ വരുന്നവർ കൈയും കാലും അടക്കി വെക്കട്ടെ” എന്ന പരാമർശം വ്യാപക വിമർശനങ്ങൾക്ക് ഇടയാക്കി.

ഇതോടെയാണ് ശ്രീലക്ഷ്മിക്കെതിരെ ശക്തമായ സൈബർ ആക്രമണങ്ങളും വ്യക്തിപരമായ അധിക്ഷേപങ്ങളും ആരംഭിച്ചത്.

ഈ പശ്ചാത്തലത്തിലാണ്, “ഞാൻ ജീവിച്ചത് അത്യന്തം കഷ്ടപ്പെട്ടാണ്. രാവിലെ അഞ്ച് മണിക്ക് എഴുന്നേറ്റ് ട്യൂഷന് പോയി, അവിടെ നിന്ന് ബിഎഡ് കോളേജിൽ പഠിച്ച്, വീണ്ടും ട്യൂഷൻ എടുത്ത് രാത്രിവരെ ജോലി ചെയ്തു.

അങ്ങനെ ജീവിച്ച ഒരാളെ വേശ്യയെന്ന് വിളിക്കുന്നത് ഭയങ്കരമായി വേദനിപ്പിക്കുന്നതാണ്” എന്ന് ശ്രീലക്ഷ്മി പ്രതികരിച്ചത്.

9-ാം ക്ലാസ് മുതൽ ട്യൂഷൻ എടുത്താണ് ജീവിതം മുന്നോട്ട് കൊണ്ടുപോയതെന്നും, ഇന്ന് 30 വയസ്സായിട്ടും സ്വന്തമായി ജീവിക്കുന്നത് സ്വന്തം കഴിവിന്റെ ബലത്തിലാണെന്നും അവർ പറഞ്ഞു.

അമ്മ അങ്കണവാടി അധ്യാപികയായിരുന്ന കാലത്ത് മാസവരുമാനം 600 രൂപ മാത്രമായിരുന്നുവെന്നും, ഭക്ഷണത്തിനായി അമ്മ സക്കാത്ത് വാങ്ങാൻ വരെ പോയ സാഹചര്യങ്ങൾ ഉണ്ടായിരുന്നുവെന്നും ശ്രീലക്ഷ്മി തുറന്നുപറഞ്ഞു.

“അങ്ങനെയുള്ള അമ്മയെക്കുറിച്ച് മോശമായി പറയരുത്” എന്നും അവർ അഭ്യർത്ഥിച്ചു.

അതേസമയം, ബസിൽ ലൈംഗികാതിക്രമം ആരോപിച്ച് പ്രതികരിച്ച ഷിംജിതയ്ക്ക് എതിരെ കേസെടുക്കരുതെന്ന നിലപാടിൽ ശ്രീലക്ഷ്മി ഉറച്ചുനിൽക്കുകയാണ്.

“പ്രതികരിക്കുന്ന സ്ത്രീയെ ക്രിമിനലൈസ് ചെയ്താൽ നാളെ ഒരു സ്ത്രീക്കും ബസിൽ ഉണ്ടായ അതിക്രമത്തിന് എതിരെ ശബ്ദമുയർത്താൻ കഴിയില്ല. വർഷങ്ങളായുള്ള പോരാട്ടത്തിന് ശേഷമാണ് സ്ത്രീകൾ വീഡിയോ എടുത്ത് പ്രതികരിക്കാൻ പോലും ധൈര്യം നേടിയത്” എന്നും അവർ വ്യക്തമാക്കി.

ലൈംഗികാതിക്രമം നേരിടുന്ന സ്ത്രീകൾ വെറുതെ വീഡിയോ എടുത്ത് പോസ്റ്റ് ചെയ്യില്ലെന്നും, അതിന് പിന്നിൽ യഥാർത്ഥ അനുഭവങ്ങൾ ഉണ്ടാകുമെന്നും ശ്രീലക്ഷ്മി ചൂണ്ടിക്കാട്ടി.

“ഇപ്പോൾ തന്നെ ആ പെൺകുട്ടി കടുത്ത സൈബർ ആക്രമണം നേരിടുകയാണ്. അതിന് മേൽ ഒരു കേസ് കൂടി എടുത്ത് പ്രതികരിക്കുന്ന സ്ത്രീകളുടെ വായടപ്പിക്കാൻ കൂട്ടുനിൽക്കരുത്” എന്നും ശ്രീലക്ഷ്മി അറയ്ക്കൽ പറഞ്ഞു.

English Summary

Activist Sreelakshmi Arakkal broke down while responding to intense cyber abuse following her controversial social media posts supporting a woman who reacted to alleged sexual harassment on a bus. She strongly condemned personal attacks labeling her a prostitute and shared her struggles of growing up in poverty, working from a young age to survive. Sreelakshmi reiterated that women who speak up against abuse should not be criminalized, warning that filing cases against them would silence future victims. She emphasized that women do not record such videos casually and urged society not to suppress voices that resist harassment.

sreelakshmi-arakkal-cyber-attack-emotional-response-bus-harassment-controversy

Sreelakshmi Arakkal, cyber attack, social media abuse, women rights, sexual harassment, bus harassment, Kerala news, gender justice