ബ്രിട്ടനിൽ ഒളിക്യാമറ ദൃശ്യങ്ങളിലൂടെ മാഫിയ സംഘങ്ങൾ സമ്പാദിക്കുന്നത് കോടികൾ
ബ്രിട്ടനിലെ പ്രമുഖ നഗരങ്ങളിൽ രാത്രികാലങ്ങളിൽ പുറത്തിറങ്ങുന്ന സ്ത്രീകളെയും വിദ്യാർത്ഥിനികളെയും ലക്ഷ്യമിട്ട് നടക്കുന്ന ‘ഡിജിറ്റൽ വോയറിസം’ (Voyeurism) എന്ന ഭീകരമായ സൈബർ വേട്ടയുടെ വിവരങ്ങൾ പുറത്തുവരുമ്പോൾ അത് മലയാളി സമൂഹത്തിനിടയിലും വലിയ ആശങ്ക പടർത്തുന്നു.
മാഞ്ചസ്റ്റർ, ലണ്ടൻ തുടങ്ങിയ നഗരങ്ങൾ കേന്ദ്രീകരിച്ച് പ്രവർത്തിക്കുന്ന മാഫിയ സംഘങ്ങൾ സ്ത്രീകളുടെ അനുവാദമില്ലാതെ അവരുടെ സ്വകാര്യ ദൃശ്യങ്ങൾ പകർത്തി സോഷ്യൽ മീഡിയ വഴി കോടിക്കണക്കിന് രൂപയാണ് സമ്പാദിക്കുന്നത്.
അന്താരാഷ്ട്ര മാധ്യമങ്ങൾ നടത്തിയ ഒളിക്യാമറ ഓപ്പറേഷനിലൂടെയാണ് വസ്ത്രധാരണത്തെയും നടത്തത്തെയും അശ്ലീല ചുവയോടെ ചിത്രീകരിക്കുന്ന ഈ ഗൂഢസംഘങ്ങളെക്കുറിച്ചുള്ള വിവരങ്ങൾ പുറംലോകം അറിഞ്ഞത്.
പ്രധാനമായും യുട്യൂബ്, ടിക് ടോക് തുടങ്ങിയ പ്ലാറ്റ്ഫോമുകൾ ഉപയോഗപ്പെടുത്തിയാണ് ഈ സംഘങ്ങൾ തങ്ങളുടെ ഇരകളെ കണ്ടെത്തുന്നത്.
കഴിഞ്ഞ മൂന്ന് വർഷത്തിനിടെ മാത്രം അറുപത്തിയഞ്ചോളം ചാനലുകളിലായി മൂന്ന് ബില്യനിലധികം ആളുകളാണ് ഇത്തരം ദൃശ്യങ്ങൾ കണ്ടിരിക്കുന്നത്.
ഒരു വിഡിയോയ്ക്ക് ഒരു മില്യൻ വ്യൂസ് ലഭിക്കുമ്പോൾ ഏകദേശം അഞ്ച് ലക്ഷത്തിലധികം രൂപയാണ് നിർമ്മാതാക്കൾക്ക് വരുമാനമായി ലഭിക്കുന്നത്.
വളരെ താഴ്ന്ന ആംഗിളുകളിൽ ക്യാമറ വെച്ച് ഒളിഞ്ഞുനോട്ടമെന്ന രീതിയിൽ ചിത്രീകരിക്കുന്ന ഈ വീഡിയോകൾക്ക് അശ്ലീലമായ തലക്കെട്ടുകൾ നൽകിയാണ് സോഷ്യൽ മീഡിയയിൽ പ്രചരിപ്പിക്കുന്നത്.
ഈ ഡിജിറ്റൽ അതിക്രമത്തിന്റെ ഇരകളാക്കപ്പെട്ട പല യുവതികളും തങ്ങളുടെ ദൃശ്യങ്ങൾ ഓൺലൈനിൽ പ്രചരിക്കുന്നത് കാണുന്നതുവരെ ഇതേക്കുറിച്ച് അറിഞ്ഞിരുന്നില്ല.
ഇത്തരം ദൃശ്യങ്ങൾ കണ്ടതിനുശേഷം മാനസികമായി തകർന്ന അമ്പതോളം യുവതികളെ മാധ്യമസംഘം നേരിട്ട് കണ്ടെത്തിയിട്ടുണ്ട്.
തങ്ങൾ എപ്പോഴും ആരുടെയോ നിരീക്ഷണത്തിലാണെന്ന ഭയം കാരണം പുറത്തിറങ്ങാൻ പോലും സാധിക്കാത്ത അവസ്ഥയിലാണ് പലരും.
വീഡിയോകൾക്ക് താഴെ വരുന്ന മോശമായ കമന്റുകളും വസ്ത്രധാരണത്തെ ചൊല്ലിയുള്ള അധിക്ഷേപങ്ങളും ഇരകളെ കടുത്ത മാനസിക സമ്മർദ്ദത്തിലേക്കാണ് തള്ളിവിടുന്നത്.
യുകെയിലെ മാഞ്ചസ്റ്റർ, ലണ്ടൻ, ബക്കിങ്ങാം തുടങ്ങിയ നഗരങ്ങളിൽ വലിയൊരു മലയാളി സാന്നിധ്യമുണ്ട്. പ്രത്യേകിച്ച് രാത്രി ഷിഫ്റ്റുകളിൽ ജോലി ചെയ്യുന്ന നഴ്സുമാരും പഠനാവശ്യാർത്ഥം താമസിക്കുന്ന വിദ്യാർത്ഥിനികളും ഇവിടെ ധാരാളമാണ്.
ഈ സാഹചര്യത്തിൽ, ജോലി കഴിഞ്ഞ് മടങ്ങുമ്പോഴും വിനോദയാത്രകൾക്കിടയിലും സ്ത്രീകൾ അതീവ ജാഗ്രത പാലിക്കണമെന്ന് മലയാളി സംഘടനകൾ മുന്നറിയിപ്പ് നൽകി.
ആരെങ്കിലും പിന്തുടരുന്നുണ്ടോ എന്ന് ശ്രദ്ധിക്കണമെന്നും സംശയാസ്പദമായ രീതിയിൽ ക്യാമറയോ ഫോണോ ഉപയോഗിക്കുന്നവരെ കണ്ടാൽ ഉടൻ തന്നെ പൊലീസിൽ വിവരം അറിയിക്കണമെന്നും നിർദ്ദേശമുണ്ട്.
സ്വീഡനിൽ നിന്ന് ഇതിനായി മാത്രം ബ്രിട്ടനിലെത്തിയ സഹോദരങ്ങൾ അടക്കമുള്ളവരാണ് ഈ ക്രൂരമായ വിനോദത്തിന് പിന്നിലെന്ന് അന്വേഷണത്തിൽ കണ്ടെത്തിയിട്ടുണ്ട്.
ഫോണിൽ നോക്കുന്നതായി അഭിനയിച്ചും മാസ്ക് ധരിച്ചും സ്ത്രീകളെ പിന്തുടരുന്ന പലരെയും മാധ്യമപ്രവർത്തകർ കൈയോടെ പിടികൂടി.
ടാക്സി ഡ്രൈവർമാരും നഗരം സന്ദർശിക്കാനെത്തുന്ന വിനോദസഞ്ചാരികളും ഇത്തരം പ്രവൃത്തികളിൽ ഏർപ്പെടുന്നുണ്ടെന്നത് ഞെട്ടിക്കുന്ന വസ്തുതയാണ്.
പൊതുസ്ഥലത്ത് വീഡിയോ ചിത്രീകരിക്കുന്നത് യുകെയിൽ നിലവിൽ വലിയ കുറ്റമല്ലെങ്കിലും അത് ശല്യം ചെയ്യുന്ന രീതിയിലോ ലൈംഗിക ഉദ്ദേശ്യത്തോടു കൂടിയോ ആണെങ്കിൽ കർശനമായ നിയമനടപടികൾ സ്വീകരിക്കാൻ വ്യവസ്ഥയുണ്ട്.
മാധ്യമ റിപ്പോർട്ടുകൾ പുറത്തുവന്നതിന് പിന്നാലെ യുട്യൂബും ടിക് ടോക്കും നിബന്ധനകൾ ലംഘിച്ച നിരവധി ചാനലുകൾ നീക്കം ചെയ്തിട്ടുണ്ട്.
സ്ത്രീകളുടെ സുരക്ഷ ഉറപ്പാക്കാൻ ഹോം ഓഫിസും യുകെ ജസ്റ്റിസ് സെക്രട്ടറി ഷബാന മഹ്മൂദും വിഷയത്തിൽ ഇടപെട്ടു കഴിഞ്ഞു.
വോയറിസം പോലുള്ള സൈബർ കുറ്റകൃത്യങ്ങൾക്കെതിരെ നിലവിലുള്ള നിയമങ്ങൾ കൂടുതൽ ശക്തമാക്കുമെന്നും കുറ്റവാളികളെ മാതൃകാപരമായി ശിക്ഷിക്കുമെന്നും സർക്കാർ വക്താക്കൾ അറിയിച്ചു.
