കോഴിക്കോട്: ഇൻസ്റ്റഗ്രാം റീലിലൂടെ ലൈംഗികാതിക്രമ ആരോപണം ഉന്നയിച്ച് യുവാവിനെ പരസ്യമായി അപമാനിച്ച സംഭവത്തിൽ,
ഗോവിന്ദപുരം സ്വദേശി ദീപക് ആത്മഹത്യ ചെയ്ത കേസിലെ പ്രതി ഷിംജിത മുസ്തഫ ഒളിവിൽ.
യുവതി കേരളം വിട്ടതായും അയൽസംസ്ഥാനമായ കർണാടകയിലെ മംഗളൂരുവിലേക്ക് കടന്നതായും പൊലീസിന് രഹസ്യവിവരം ലഭിച്ചു.
ഷിംജിതയെ കണ്ടെത്താൻ അന്വേഷണം ഊർജ്ജിതമാക്കിയ പൊലീസ്, ഇവരുടെ മൊബൈൽ ഫോൺ കണ്ടെത്താനുള്ള നീക്കത്തിലാണ്.
എഡിറ്റ് ചെയ്ത വീഡിയോയിലൂടെ സൈബർ ആക്രമണം; ഒറിജിനൽ ദൃശ്യങ്ങൾക്കായി സൈബർ സെല്ലിന്റെ സഹായം തേടുന്നു
യുവതി സോഷ്യൽ മീഡിയയിൽ പ്രചരിപ്പിച്ച ദൃശ്യങ്ങൾ മനപ്പൂർവം എഡിറ്റ് ചെയ്ത് നീളം കുറച്ചതാണെന്ന് പൊലീസ് പ്രാഥമിക അന്വേഷണത്തിൽ കണ്ടെത്തിയിട്ടുണ്ട്.
ദീപക്കിനെ മോശക്കാരനായി ചിത്രീകരിക്കാൻ വീഡിയോയിൽ കൃത്രിമം കാണിച്ചോ എന്ന് കണ്ടെത്താൻ സൈബർ സെല്ലിന്റെ സഹായം തേടും.
സംഭവത്തിന്റെ യഥാർത്ഥ ചിത്രം വ്യക്തമാകണമെങ്കിൽ ഷിംജിതയുടെ മൊബൈൽ ഫോൺ കസ്റ്റഡിയിലെടുത്ത് പരിശോധിക്കേണ്ടതുണ്ട്.
ഇതിനിടെ, അറസ്റ്റ് ഭയന്ന് യുവതി കോടതി മുഖേന മുൻകൂർ ജാമ്യം നേടാൻ നീക്കം നടത്തുന്നതായും റിപ്പോർട്ടുകളുണ്ട്.
ബസ് ജീവനക്കാരുടെ മൊഴി യുവതിക്ക് തിരിച്ചടിയാകുന്നു; ആരോപിക്കപ്പെട്ട അതിക്രമം ബസിനുള്ളിൽ നടന്നതായി സൂചനയില്ല
പയ്യന്നൂർ റെയിൽവേ സ്റ്റേഷൻ റൂട്ടിലോടുന്ന ‘അൽ അമീൻ’ എന്ന സ്വകാര്യ ബസിലെ സിസിടിവി ഹാർഡ് ഡിസ്ക് മെഡിക്കൽ കോളേജ് പൊലീസ് കസ്റ്റഡിയിലെടുത്തു.
ദീപക്കും ഷിംജിതയും ബസിൽ കയറുന്നതും യാത്ര ചെയ്യുന്നതുമായ ദൃശ്യങ്ങൾ ഇതിലുണ്ട്.
എന്നാൽ, ബസിനുള്ളിൽ വെച്ച് ഇത്തരമൊരു അതിക്രമം നടന്നതായി തങ്ങളുടെ ശ്രദ്ധയിൽപ്പെട്ടിട്ടില്ലെന്ന് കണ്ടക്ടർ രാമകൃഷ്ണനും ഡ്രൈവർ പ്രകാശനും പൊലീസിന് മൊഴി നൽകി.
സാധാരണ നിലയിലുള്ള തിരക്ക് മാത്രമാണ് ബസിൽ ഉണ്ടായിരുന്നതെന്നും യുവതി ബഹളം വെക്കുകയോ പരാതിപ്പെടുകയോ ചെയ്തിട്ടില്ലെന്നും ജീവനക്കാർ വ്യക്തമാക്കുന്നു.
പരാതി നൽകാതെ റീൽസ് മാത്രം ലക്ഷ്യം വെച്ചു; യുവതിയുടെ നീക്കങ്ങളിൽ ദുരൂഹതയുണ്ടെന്ന് പോലീസ്
സംഭവം നടന്ന ദിവസം പയ്യന്നൂർ ബസ് സ്റ്റാൻഡിലെ പോലീസ് എയ്ഡ് പോസ്റ്റിലോ അടുത്തുള്ള പോലീസ് സ്റ്റേഷനിലോ പരാതി നൽകാൻ യുവതി തയ്യാറായിരുന്നില്ല.
പകരം ദൃശ്യങ്ങൾ എഡിറ്റ് ചെയ്ത് സമൂഹമാധ്യമങ്ങളിൽ പങ്കുവെച്ച് യുവാവിനെ വ്യക്തിഹത്യ ചെയ്യാനാണ് ഇവർ ശ്രമിച്ചതെന്ന് ദീപക്കിന്റെ ബന്ധുക്കൾ ആരോപിക്കുന്നു.
റെയിൽവേ സ്റ്റേഷൻ സ്റ്റോപ്പിൽ നിന്നും ദീപക് മുൻവാതിലിലൂടെയും ഷിംജിത പിൻവാതിലിലൂടെയുമാണ് ബസിൽ കയറിയത്.
ഈ ദൃശ്യങ്ങൾ ഉൾപ്പെടെയുള്ള ശാസ്ത്രീയ തെളിവുകൾ ശേഖരിച്ച് കേസ് ശക്തമാക്കാനാണ് അന്വേഷണ സംഘത്തിന്റെ തീരുമാനം.
English Summary
In the tragic case of Deepak’s suicide following a viral Instagram reel accusing him of sexual harassment, the accused woman, Shimjitha Mustafa, has reportedly fled the state to Mangaluru. Police investigation revealed that the video shared by her was edited to misrepresent the incident. CCTV footage from the ‘Al Ameen’ bus and statements from the bus crew suggest no such harassment occurred during the journey.
