മുടി സ്ട്രെയിറ്റ് ചെയ്താൽ കാഴ്ച പോകുമോ? ‘ബ്രോക്കർ ബ്രോ’യിൽ തൃശൂർ സ്വദേശിയുടെ വെളിപ്പെടുത്തൽ
മുടി സ്ട്രെയിറ്റ് ചെയ്താൽ കണ്ണിന്റെ കാഴ്ച മങ്ങുമോ എന്ന സംശയം സോഷ്യൽ മീഡിയയിൽ വീണ്ടും ചർച്ചയാകുന്നു. തൃശൂർ കേച്ചേരി സ്വദേശിയായ സഹദ് എന്ന യുവാവ് പങ്കുവച്ച അനുഭവമാണ് സൗന്ദര്യപ്രേമികളിൽ ആശങ്ക സൃഷ്ടിച്ചിരിക്കുന്നത്.
തലമുടി സ്ട്രെയിറ്റ് ചെയ്തതിന് പിന്നാലെ തന്റെ ഇടതു കണ്ണിന്റെ കാഴ്ച മങ്ങിത്തുടങ്ങിയെന്നാണ് സഹദിന്റെ ആരോപണം.
‘ബ്രോക്കർ ബ്രോ’ എന്ന ഇൻസ്റ്റഗ്രാം പേജിൽ പങ്കുവച്ച വിഡിയോയിലൂടെയാണ് സഹദ് തന്റെ അവസ്ഥ വിശദീകരിക്കുന്നത്.
മുടി സ്ട്രെയിറ്റ് ചെയ്യുന്നതിനിടെ സ്ട്രെയിറ്റനിങ് മെഷീൻ അമിതമായി ചൂടായതിനെ തുടർന്ന് കണ്ണിലേക്കുള്ള നാഡിക്ക് കേടുപാടുണ്ടായെന്നും അതാണ് കാഴ്ച മങ്ങാൻ കാരണമെന്നും സഹദ് വിഡിയോയിൽ പറയുന്നു.
ജന്മനാ കാഴ്ച സംബന്ധമായ ചില പ്രശ്നങ്ങൾ ഉണ്ടായിരുന്നുവെങ്കിലും, മുടി സ്ട്രെയിറ്റ് ചെയ്തതോടെ അവ കൂടുതൽ സങ്കീർണമാവുകയായിരുന്നുവെന്നാണ് അവകാശവാദം.
സംരംഭകനായ സഹദിന് അനുയോജ്യയായ വധുവിനെ തേടിയുള്ള വിഡിയോയിലൂടെയാണ് ‘ബ്രോക്കർ ബ്രോ’ ഈ വിഷയവും മുന്നോട്ടുവച്ചത്.
https://www.instagram.com/reel/DTSP8UwkTO_/?utm_source=ig_web_button_share_sheet
ഇതിനകം തന്നെ വിഡിയോ സോഷ്യൽ മീഡിയയിൽ വലിയ ചർച്ചകൾക്ക് വഴിവെച്ചിരിക്കുകയാണ്.
അതേസമയം, മുടി സ്ട്രെയിറ്റ് ചെയ്തതുകൊണ്ട് കാഴ്ച നഷ്ടപ്പെടുമെന്ന വാദത്തിന് ശാസ്ത്രീയ അടിസ്ഥാനം ഇല്ലെന്ന പ്രതികരണവുമായാണ് മറ്റൊരു വിഭാഗം രംഗത്തെത്തിയിരിക്കുന്നത്.
വിഡിയോയിൽ ഉന്നയിക്കുന്ന ആരോപണങ്ങൾക്ക് വൈദ്യപരമായ തെളിവുകൾ ഉണ്ടോയെന്ന് ചിലർ ചോദിക്കുന്നു.
ഹെയർ ട്രീറ്റ്മെന്റ് രംഗത്ത് 25 വർഷത്തെ അനുഭവമുള്ള ഷീനു ആനന്ദ് എന്ന വ്യക്തി, നല്ല ഗുണമേന്മയുള്ള ഉൽപ്പന്നങ്ങൾ ഉപയോഗിച്ച് ശരിയായ രീതിയിൽ ചെയ്താൽ ഹെയർ സ്ട്രെയിറ്റനിങ് അപകടകരമല്ലെന്ന് അഭിപ്രായപ്പെട്ടു.
കണ്ണിൽ കെമിക്കൽസ് നേരിട്ട് വീഴുന്ന സാഹചര്യമില്ലെങ്കിൽ ഇത്തരം ചികിത്സകൾ സുരക്ഷിതമാണെന്നും അദ്ദേഹം വ്യക്തമാക്കി.
വിദഗ്ധ ഡോക്ടർമാരും സമാനമായ നിലപാടാണ് പങ്കുവയ്ക്കുന്നത്.
മുടി സ്ട്രെയിറ്റ് ചെയ്യുന്നതും കാഴ്ച നഷ്ടപ്പെടുന്നതും തമ്മിൽ നേരിട്ടുള്ള ബന്ധമുണ്ടെന്നതിന് തെളിവുകളില്ലെന്നും, കാഴ്ച പ്രശ്നങ്ങൾക്ക് പിന്നിൽ മറ്റ് ആരോഗ്യ കാരണങ്ങൾ ഉണ്ടാകാമെന്നുമാണ് അവരുടെ വിശദീകരണം.
English Summary
A video shared by a Thrissur-based youth, Sahad, claiming that his eyesight deteriorated after hair straightening has gone viral on social media. He alleges that excessive heat from the straightening device damaged a nerve connected to his left eye. While the video has sparked concern among beauty enthusiasts, experts and professionals have dismissed the claim, stating there is no scientific evidence linking hair straightening to vision loss unless chemicals directly enter the eyes. Doctors suggest that other underlying medical conditions could be responsible for the visual impairment.
hair-straightening-eyesight-viral-video-kerala
Hair Straightening, Vision Loss, Viral Video, Social Media Debate, Beauty Treatments, Kerala News, Health Myths, Eye Care
