ഭാരതപ്പുഴയിൽ ഇനി ഭക്തിയുടെ ആറാട്ട്; കേരളത്തിന്റെ കുംഭമേളയ്ക്ക് ഇന്ന് തുടക്കമാകും

ഭാരതപ്പുഴയിൽ ഇനി ഭക്തിയുടെ ആറാട്ട്; കേരളത്തിന്റെ കുംഭമേളയ്ക്ക് ഇന്ന് തുടക്കമാകും

തിരുനാവായ: കേരളത്തിന്റെ കുംഭമേളയായി വിശേഷിപ്പിക്കപ്പെടുന്ന മഹാമാഘ മഹോത്സവത്തിന് ഇന്ന് തിരുനാവായയിൽ തുടക്കമാകും.

 വെള്ളിയാഴ്ച ഭാരതപ്പുഴയുടെ തീരത്ത് പ്രത്യേക പൂജകളും ആചാരാനുഷ്ഠാനങ്ങളുമോടെയാണ് മഹോത്സവത്തിന് ആത്മീയ തുടക്കം കുറിക്കുന്നത്. 

ഔപചാരിക ഉദ്ഘാടനം ജനുവരി 19-ന് രാവിലെ 11-ന് നാവാമുകുന്ദ ക്ഷേത്രപരിസരത്ത് നടക്കും. ഗവർണർ രാജേന്ദ്ര വിശ്വനാഥ് ആർലേക്കർ മഹോത്സവം ഉദ്ഘാടനം ചെയ്യും.

മഹാമാഘവുമായി ബന്ധപ്പെട്ട എല്ലാ ഒരുക്കങ്ങളും പൂർത്തിയായതായി മഹാമാഘം സഭാപതി മഹാമണ്ഡലേശ്വർ സ്വാമി ആനന്ദവനം ഭാരതി അറിയിച്ചു.

 ജനുവരി 19 മുതൽ ഫെബ്രുവരി 3 വരെ നീളുന്ന മഹോത്സവം, നാടിന്റെ ആത്മീയ–സാംസ്കാരിക പാരമ്പര്യങ്ങളുടെ സംഗമകേന്ദ്രമായി തിരുനാവായയെ മാറ്റും.

വെള്ളിയാഴ്ച രാവിലെ സ്വാമി അഭിനവ ബാലാനന്ദ ഭൈരവയുടെ കാർമികത്വത്തിൽ നടക്കുന്ന ചടങ്ങുകളോടെയാണ് മഹാമാഘത്തിന് തുടക്കം. 

കേരളത്തിലെ വിവിധ ഹിന്ദു സമ്പ്രദായങ്ങളിൽപ്പെട്ട ഭക്തർ തങ്ങളുടെ അനുഷ്ഠാനങ്ങളനുസരിച്ച് തിരുനാവായയിൽ ദേവതാവന്ദനങ്ങളും പിതൃകർമങ്ങളും നിർവഹിക്കും. 

രാവിലെ ആറുമുതൽ ആയിനിപ്പുള്ളി വൈശാഖിന്റെ ആചാര്യകാർമികത്വത്തിൽ വീരസാധനക്രിയയും നടക്കും.

ശനിയാഴ്ച രാവിലെ ചെറുമുക്ക് വൈദികൻ വല്ലഭൻ അക്കിത്തിരിപ്പാട് ആചാര്യനായി വൈദിക ശ്രാദ്ധകർമം നടത്തും.

 ഇതോടെയാണ് തിരുനാവായയിലെ കുംഭമേള ചടങ്ങുകൾക്ക് ഔപചാരിക തുടക്കം കുറിക്കുക.

ഇതിനിടെ, മഹോത്സവത്തിനായി ഭാരതപ്പുഴയിൽ നടന്ന നിർമാണപ്രവർത്തനങ്ങൾക്ക് നേരത്തെ റവന്യൂ വകുപ്പ് സ്റ്റോപ്പ് മെമ്മോ നൽകിയിരുന്നു. 

ഇതിനെത്തുടർന്ന് മഹാമാഘമഹോത്സവ സമിതി ചെയർമാൻ അരീക്കര സുധീർ നമ്പൂതിരിയുടെ നേതൃത്വത്തിൽ സംഘാടകർ വ്യാഴാഴ്ച ജില്ലാ കളക്ടർ വി.ആർ. വിനോദുമായി നടത്തിയ ചർച്ചകൾക്കുശേഷം, കർശന നിബന്ധനകളോടെ പ്രവർത്തനങ്ങൾ തുടരാനും ചടങ്ങുകൾ നടത്താനും ജില്ലാഭരണകൂടം വാക്കാൽ അനുമതി നൽകി.

സുരക്ഷാ ക്രമീകരണങ്ങളുടെ ഭാഗമായി മലപ്പുറം ജില്ലാ പൊലീസ് മേധാവി ആർ. വിശ്വനാഥിന്റെ നേതൃത്വത്തിലുള്ള സംഘം വ്യാഴാഴ്ച വൈകീട്ട് മേളാപരിസരവും സുരക്ഷാസംവിധാനങ്ങളും പരിശോധന നടത്തി. 

ഭാരതപ്പുഴയുടെ തീരത്ത് ആത്മീയതയും പാരമ്പര്യവും ഒരുമിക്കുന്ന ദിനങ്ങളാണ് ഇനി തിരുനാവായയെ കാത്തിരിക്കുന്നത്.

English Summary:

The Maha Magha festival, known as Kerala’s Kumbh Mela, begins today at Thirunavaya with special rituals on the banks of the Bharathapuzha river. The official inauguration will be held on January 19, with Kerala Governor Rajendra Vishwanath Arlekar inaugurating the event. The festival will continue until February 3 with elaborate spiritual, cultural, and security arrangements in place.

maha-magha-festival-thirunavaya-kerala-kumbh-mela-begins

Maha Magha Festival, Thirunavaya, Kerala Kumbh Mela, Bharathapuzha, Navamukunda Temple, Spiritual Festival, Malappuram News, Kerala Culture