തൃശൂർ റെയിൽവേ സ്റ്റേഷനിലെ പാർക്കിങ് കേന്ദ്രത്തിൽ തീപിടിത്തം; കത്തി നശിച്ചത് നൂറു കണക്കിന് ബൈക്കുകൾ
തൃശൂർ: തൃശൂർ റെയിൽവേ സ്റ്റേഷനിലെ ബൈക്ക് പാർക്കിങ് കേന്ദ്രത്തിൽ ഉണ്ടായ വൻ തീപിടിത്തത്തിൽ രണ്ടാമത്തെ പ്ലാറ്റ്ഫോമിന് സമീപമുള്ള ഷെഡ് പൂർണമായും കത്തിനശിച്ചു.
ഷെഡിൽ പാർക്ക് ചെയ്തിരുന്ന നൂറുകണക്കിന് ബൈക്കുകൾ തീയിൽപെട്ടു. സമീപത്തെ മരങ്ങളിലേക്കും തീ പടർന്നെങ്കിലും ആളപായമൊന്നും റിപ്പോർട്ട് ചെയ്തിട്ടില്ല.
പാർക്കിങ് കേന്ദ്രത്തിൽ ടിക്കറ്റ് നൽകാൻ ഉണ്ടായിരുന്ന രണ്ട് സ്ത്രീകൾ സമയബന്ധിതമായി സ്ഥലത്ത് നിന്ന് മാറിയതിനാൽ രക്ഷപ്പെടുകയായിരുന്നു.
വിവരം ലഭിച്ചതോടെ അഞ്ച് യൂണിറ്റ് ഫയർഫോഴ്സ് എത്തി, മണിക്കൂറുകൾ നീണ്ട പരിശ്രമത്തിനൊടുവിലാണ് തീ നിയന്ത്രണവിധേയമാക്കിയത്.
പ്രാഥമിക നിഗമനപ്രകാരം ഷെഡിലുണ്ടായിരുന്ന അഞ്ഞൂറോളം ബൈക്കുകൾ മുഴുവനായും കത്തിനശിച്ചതായി സംശയിക്കുന്നു.
ഞായറാഴ്ചയായതിനാൽ വാഹനങ്ങളുടെ എണ്ണം കുറവായിരുന്നുവെന്നും സാധാരണ ദിവസങ്ങളിൽ ആയിരത്തോളം ബൈക്കുകൾ ഇവിടെ പാർക്ക് ചെയ്യാറുണ്ടെന്നും അധികൃതർ വ്യക്തമാക്കി.
വൈകിട്ട് ആറരയോടെയാണ് ആദ്യം പുക ഉയർന്നത്. തുടക്കത്തിൽ രണ്ട് ബൈക്കുകൾക്ക് തീപിടിക്കുകയും പിന്നീട് തീ അതിവേഗം ഷെഡിലുടനീളം പടരുകയുമായിരുന്നു.
റെയിൽവേ ലൈനിൽ നിന്നു വീണ തീപ്പൊരി ബൈക്കിന് മുകളിലേക്ക് പതിച്ചതാകാമെന്നാണ് സംശയം. ബൈക്കുകൾ ഷീറ്റ് ഉപയോഗിച്ച് മൂടിയിരുന്നതും തീ പടരാൻ കാരണമായതായി കരുതുന്നു.
“റെയിൽവേ ലൈനിൽ നിന്നാണ് തീ വീണത്. വെള്ളം ഒഴിച്ച് തീ അണയ്ക്കാൻ ശ്രമിച്ചെങ്കിലും ഫലമുണ്ടായില്ല. തുടർന്ന് ബൈക്കിന്റെ ടാങ്ക് പൊട്ടി തീ പടർന്നു. രക്ഷപ്പെടാൻ പുറത്തേക്ക് ഓടേണ്ടിവന്നു,” പാർക്കിങ് കേന്ദ്രത്തിലെ ജീവനക്കാരിയായ മല്ലിക പറഞ്ഞു.
“സ്കൂട്ടർ പാർക്ക് ചെയ്ത ശേഷം ടിക്കറ്റ് എടുക്കാൻ പോയപ്പോഴാണ് തീപിടിത്തം. തിരികെ എത്തിയപ്പോൾ തീ പൂർണമായി ആളിപ്പടർന്നിരുന്നു,” ഒരു യാത്രക്കാരൻ പ്രതികരിച്ചു.
തീപിടിത്തത്തിന്റെ കൃത്യമായ കാരണം കണ്ടെത്തുന്നതിനായി റെയിൽവേയും അഗ്നിശമന വിഭാഗവും സംയുക്തമായി അന്വേഷണം ആരംഭിച്ചിട്ടുണ്ട്.
English Summary:
A massive fire broke out at the bike parking facility of Thrissur Railway Station, completely destroying the shed near the second platform and gutting hundreds of parked motorcycles. No casualties were reported. Fire and railway authorities have launched an investigation to determine the exact cause of the blaze.
thrissur-railway-station-bike-parking-fire
Thrissur, Railway Station, Fire Accident, Bike Parking, Kerala News, Fire Force
