യു.എസിന്റെ വടക്കുകിഴക്കൻ മേഖലയിൽ ശക്തമായ ശൈത്യകാല കൊടുങ്കാറ്റ്;അടിയന്തരാവസ്ഥ
ന്യൂയോർക്ക്: യു.എസിന്റെ വടക്കുകിഴക്കൻ മേഖലയിൽ മഞ്ഞും ഐസും കലർന്ന ശക്തമായ ശൈത്യകാല കൊടുങ്കാറ്റ് ആഞ്ഞടിച്ചതായി റിപ്പോർട്ടുകൾ.
വെള്ളിയാഴ്ച പുലർച്ചെ മുതൽ ശക്തമായ കാറ്റിനൊപ്പമാണ് മഞ്ഞുവീഴ്ച ആരംഭിച്ചത്. അവധിക്കാല വാരാന്ത്യം ലക്ഷ്യമിട്ട് യാത്ര ചെയ്യാനിരുന്ന ആയിരക്കണക്കിന് ആളുകളുടെ യാത്രാപദ്ധതികളെയാണ് ഈ കാലാവസ്ഥാ ദുരന്തം തകർത്തത്.
ന്യൂയോർക്ക്, ന്യൂജേഴ്സി സംസ്ഥാനങ്ങളിൽ അധികൃതർ കാലാവസ്ഥാ അടിയന്തരാവസ്ഥ പ്രഖ്യാപിച്ചു. കടുത്ത ശീതകാലാവസ്ഥ വിമാനഗതാഗതത്തെ വൻതോതിൽ ബാധിച്ചു.
വെള്ളിയാഴ്ച മാത്രം അമേരിക്കയ്ക്കകത്തും പുറത്തുമുള്ള 1,600ലധികം വാണിജ്യ വിമാന സർവിസുകൾ റദ്ദാക്കേണ്ടിവന്നു. ഇതിന് പുറമെ, 7,800ലധികം വിമാനങ്ങൾ വൈകിയതായും ഫ്ലൈറ്റ് ട്രാക്കിംഗ് സേവനമായ ‘ഫ്ലൈറ്റ് അവെയർ’ അറിയിച്ചു.
പ്രധാന വിമാനത്താവളങ്ങളായ ജെഎഫ്കെ, ലഗ്വാർഡിയ, ന്യൂവാർക്ക് എന്നിവിടങ്ങളിൽ യാത്രക്കാരുടെ നീണ്ട ക്യൂകളും കനത്ത തിരക്കുമാണ് അനുഭവപ്പെട്ടത്.
നാഷനൽ വെതർ സർവിസ് (NWS) ന്യൂയോർക്ക് സംസ്ഥാനത്തും കണക്റ്റിക്കട്ട് ഉൾപ്പെടെയുള്ള സമീപ പ്രദേശങ്ങളിലുമെല്ലാം ഐസ്-ശീത കൊടുങ്കാറ്റ് മുന്നറിയിപ്പുകൾ പ്രഖ്യാപിച്ചിട്ടുണ്ട്.
യു.എസിന്റെ വടക്കുകിഴക്കൻ മേഖലയിൽ ശക്തമായ ശൈത്യകാല കൊടുങ്കാറ്റ്;അടിയന്തരാവസ്ഥ
പല നഗരങ്ങളും മഞ്ഞിനടിയിലായി. ചില പ്രദേശങ്ങളിൽ ഒരു അടി വരെ മഞ്ഞുവീഴ്ച ഉണ്ടാകാൻ സാധ്യതയുണ്ടെന്ന് മുന്നറിയിപ്പിൽ പറയുന്നു.
അപകടകരമായ സാഹചര്യങ്ങൾ കണക്കിലെടുത്ത് അനാവശ്യ യാത്രകൾ ഒഴിവാക്കണമെന്ന് ജനങ്ങൾക്ക് നിർദേശം നൽകിയിട്ടുണ്ട്.
ന്യൂയോർക്ക് നഗരത്തിൽ 2022ന് ശേഷം രേഖപ്പെടുത്തിയ ഏറ്റവും ഉയർന്ന മഞ്ഞുവീഴ്ചയാണിതെന്ന് അധികൃതർ അറിയിച്ചു. റോഡുകൾ മഞ്ഞും ഐസും നിറഞ്ഞതോടെ വാഹനാപകട സാധ്യതകൾ വർധിച്ചതായി ഗവർണർ മുന്നറിയിപ്പ് നൽകി.
ഹൈവേകളിലും പ്രധാന റോഡുകളിലും വാഹനഗതാഗതം നിയന്ത്രിക്കേണ്ടിവന്നിട്ടുണ്ട്. പല സ്കൂളുകളും സർക്കാർ ഓഫീസുകളും അടച്ചിടാൻ നിർദേശിച്ചു.
ചില പ്രദേശങ്ങളിൽ മഞ്ഞുവീഴ്ചയ്ക്കൊപ്പം മഴയും ഉണ്ടാകുമെന്നതിനാൽ ‘ഫ്രീസിങ് റെയിൻ’ മൂലമുള്ള വൈദ്യുതി മുടക്കങ്ങൾക്കും മരക്കൊമ്പുകൾ ഒടിഞ്ഞുവീഴുന്നതിനും സാധ്യതയുണ്ടെന്നാണ് കാലാവസ്ഥാ വിദഗ്ധർ ചൂണ്ടിക്കാട്ടുന്നത്.
വൈദ്യുതി വിതരണ സംവിധാനങ്ങൾ തകരാറിലാകാനുള്ള സാധ്യത കണക്കിലെടുത്ത് അടിയന്തര സേവനങ്ങൾ സജ്ജമാണെന്ന് അധികൃതർ അറിയിച്ചു.
ശൈത്യകാല കൊടുങ്കാറ്റ് അടുത്ത ദിവസങ്ങളിലും തുടരുമെന്നാണ് കാലാവസ്ഥാ പ്രവചനം. ജനങ്ങൾ സുരക്ഷാ നിർദേശങ്ങൾ കർശനമായി പാലിക്കണമെന്നും ആവശ്യമില്ലാത്ത യാത്രകൾ ഒഴിവാക്കണമെന്നും ഭരണകൂടം അഭ്യർത്ഥിച്ചു.
