ചെണ്ടയും ചേങ്ങിലയും മനപാഠമാക്കിയ എം.കൊം വിദ്യാർഥിനി ഇനി പഞ്ചായത്ത് പ്രസിഡൻ്റ്

തിരുവനന്തപുരം: ശിങ്കാരി മേളം തന്നെ ജീവിതമാർഗമാക്കിയ 27 കാരി രേഷ്മയ്ക്ക് അരുവാപ്പുലം ഗ്രാമപഞ്ചായത്ത് പ്രസിഡന്റെന്ന പുതിയ ഉത്തരവാദിത്തം.

പത്തനംതിട്ട ജില്ലയിലെ അരുവാപ്പുലം ഗ്രാമപഞ്ചായത്തിൽ യു.ഡി.എഫ് ഭൂരിപക്ഷത്തോടെ അധികാരം നേടിയപ്പോൾ, കോൺഗ്രസ് പ്രതിനിധിയായി മത്സരിച്ച് വിജയിച്ച ബി. രേഷ്മയാണ് പ്രസിഡന്റായി തെരഞ്ഞെടുക്കപ്പെട്ടത്.

പഞ്ചായത്ത് പ്രസിഡന്റ് പദവി ഇത്തവണ പട്ടികജാതി വനിതാ സംവരണമായതോടെയാണ് കൊക്കാത്തോട് നെല്ലിക്കാപ്പാറ സ്വദേശിയായ രേഷ്മയ്ക്ക് അവസരം ലഭിച്ചത്.

യു.ഡി.എഫ് ഭരണത്തിലുള്ള ഈ പഞ്ചായത്തിലെ ഏക പട്ടികജാതി വനിതാ അംഗവുമാണ് രേഷ്മ. സംസ്ഥാനത്തെ ഏറ്റവും പ്രായം കുറഞ്ഞ പഞ്ചായത്ത് പ്രസിഡന്റായിരുന്ന മറിയം റോയിയുടെ പിൻഗാമിയായാണ് രേഷ്മ അധികാരമേൽക്കുന്നത്.

ചെണ്ടയും ചേങ്ങിലയും അഭ്യസിച്ച രേഷ്മ കഴിഞ്ഞ അഞ്ച് വർഷമായി കേരളത്തിലും തമിഴ്നാട്ടിലുമായി നിരവധി ശിങ്കാരി മേളം പരിപാടികളിൽ പങ്കെടുത്തിട്ടുണ്ട്.

അമ്മ രാധാമണിയുടെ സഹോദരി കമലമ്മയോടൊപ്പം നെല്ലിക്കാപ്പാറ–മുണ്ടപ്ലാവ് പ്രദേശത്തെ കലാകാരികളെ ഉൾപ്പെടുത്തി ‘ശ്രീബുദ്ധ’ എന്ന പേരിൽ ശിങ്കാരി മേളം കലാസമിതിയും രൂപീകരിച്ചിട്ടുണ്ട്.

സംഗീതത്തിനൊപ്പം പഠനവും ഒരുപോലെ മുന്നോട്ട് കൊണ്ടുപോകുന്ന രേഷ്മ, പത്തനംതിട്ടയിലെ സ്വകാര്യ കോളേജിൽ നിന്ന് ബിരുദം നേടി. ഇപ്പോൾ ശ്രീനാരായണ ഓപ്പൺ യൂണിവേഴ്സിറ്റിയിൽ എംകോം അവസാന സെമസ്റ്റർ വിദ്യാർഥിനിയാണ്.

പരീക്ഷയ്ക്ക് തയ്യാറെടുക്കുന്നതിനിടെയായിരുന്നു തദ്ദേശ തിരഞ്ഞെടുപ്പ്. പരേതനായ ബാബുവാണ് രേഷ്മയുടെ പിതാവ്.

English Summary

Reshma, a 27-year-old shinkari melam artiste who earns her livelihood through percussion performances, has been elected as the president of Aruvappulam grama panchayat in Pathanamthitta. Representing the Congress under the UDF banner, she won the local body election from a panchayat reserved for Scheduled Caste women. Alongside her artistic career, Reshma is pursuing an M.Com degree and is among the youngest panchayat presidents in the state.

Slug

youngest-shinkari-melam-artiste-reshma-aruvappulam-panchayat-president