ശബരിമല ദർശനം നടത്തി നടൻ ദിലീപ്; സന്നിധാനത്ത് എത്തിയത് ഇന്ന് പുലർച്ചെ
പത്തനംതിട്ട: പ്രശസ്ത സിനിമാതാരം ദിലീപ് ശബരിമല ക്ഷേത്ര ദർശനത്തിനായി സന്നിധാനത്ത് എത്തി. ഇന്ന് പുലർച്ചെയാണ് താരം ശബരിമലയിൽ ദർശനത്തിനായി എത്തിയത്.
ആദ്യം ലഭിച്ച വിവരങ്ങൾ പ്രകാരം കഴിഞ്ഞ രാത്രിയോടെ എത്തുമെന്നായിരുന്നു പ്രതീക്ഷിച്ചിരുന്നത്. എന്നാൽ രാവിലെ ദിലീപ് സന്നിധാനത്തെ പി.ആർ.ഒ ഓഫീസിൽ എത്തുകയും തുടർന്ന് തന്ത്രിയുടെ ഓഫീസിൽ സന്ദർശനം നടത്തുകയും ചെയ്തു.
അടുത്തിടെ നടിയെ ആക്രമിച്ച കേസിൽ എട്ടാം പ്രതിയായിരുന്ന ദിലീപിനെ കോടതി കുറ്റവിമുക്തനാക്കിയിരുന്നു.
ഇതിന് പിന്നാലെയാണ് താരം ശബരിമല ദർശനത്തിനായി എത്തിയത്. ദിലീപിനൊപ്പം അടുത്ത സുഹൃത്തുക്കളും പരിചയക്കാരുമുണ്ടായിരുന്നു.
മുന്പ് ശബരിമല സന്ദർശനത്തിനിടെ ദിലീപിന് വിഐപി പരിഗണന ലഭിച്ചതും പത്ത് മിനിറ്റിലധികം ശ്രീകോവിലിന് മുന്നിൽ നിന്നതും വലിയ വിവാദമായിരുന്നു. ഹൈക്കോടതിയടക്കം വിഷയത്തിൽ വിമർശനം ഉന്നയിച്ചിരുന്നു.
ഇത്തവണ ആ വിവാദങ്ങൾ ആവർത്തിക്കാതിരിക്കാനാണ് ശ്രമം. ദേവസ്വം ബോർഡ് ഉദ്യോഗസ്ഥരുടെ സാന്നിധ്യമില്ലാതെയും ഔദ്യോഗിക പൊലീസ് സുരക്ഷയില്ലാതെയുമാണ് ദിലീപ് ദർശനം നടത്തിയത്.
ഇരുമുടി കെട്ടാതെ, പതിനെട്ടാം പടി ചവിട്ടാതെയാണ് ജീവനക്കാരുടെ ഗേറ്റ് വഴി സന്നിധാനത്തെ സോപാനത്തിലേക്ക് താരം എത്തിയത്.
🛕 എറണാകുളത്തപ്പൻ ക്ഷേത്ര പരിപാടിയിൽ നിന്ന് പിന്മാറ്റം
നടിയെ ആക്രമിച്ച കേസിലെ വിധിയെ തുടർന്നുണ്ടായ വിവാദങ്ങൾക്കിടയിൽ, എറണാകുളത്തപ്പൻ ക്ഷേത്രത്തിലെ ഒരു ഉദ്ഘാടന ചടങ്ങിൽ നിന്ന് ദിലീപ് പിന്മാറിയതും ശ്രദ്ധേയമായി.
ഉത്സവത്തോടനുബന്ധിച്ചുള്ള കൂപ്പൺ വിതരണ ഉദ്ഘാടനത്തിൽ പങ്കെടുക്കാനായിരുന്നു ആദ്യം തീരുമാനിച്ചിരുന്നത്.
എന്നാൽ സാമൂഹിക മാധ്യമങ്ങളിലും ക്ഷേത്രവുമായി ബന്ധപ്പെട്ട ചില വൃത്തങ്ങളിലുമുണ്ടായ എതിർപ്പിനെ തുടർന്നാണ് താരം അവസാന നിമിഷം ചടങ്ങിൽ നിന്ന് പിന്മാറിയത്.
ദിലീപിനെ ഉദ്ഘാടകനാക്കിയത് ക്ഷേത്ര ഉപദേശക സമിതിയുടെ തീരുമാനമാണെന്നും, കൊച്ചിൻ ദേവസ്വം ബോർഡിന്റെ തീരുമാനമല്ലെന്നും ഉപദേശക സമിതി പ്രസിഡന്റ് എസ്. അശോക് കുമാർ വ്യക്തമാക്കി.
പിന്നീട് പ്രശ്നം രമ്യമായി പരിഹരിക്കാൻ ദേവസ്വം ബോർഡ് ഇടപെട്ടതായും, ചടങ്ങ് തന്ത്രി ഉദ്ഘാടനം ചെയ്യുമെന്നും അറിയിച്ചു.
കോടതി വിധിയെ അനുകൂലിച്ചും എതിര്ത്തും സാമൂഹിക മാധ്യമങ്ങളിൽ ശക്തമായ ചർച്ചകൾ തുടരുന്നതിനിടെയാണ് ശബരിമല ദർശനവും ക്ഷേത്ര പരിപാടിയിൽ നിന്നുള്ള പിന്മാറ്റവും നടന്നത്.
English Summary
Actor Dileep visited the Sabarimala temple early Wednesday morning, shortly after being acquitted in the actress assault case. Avoiding any VIP treatment amid past controversies, he entered the temple through the staff gate without official security or Devaswom Board officials accompanying him. Meanwhile, Dileep withdrew at the last moment from an inauguration event at the Ernakulathappan Temple following public objections and social media debate over his participation. The temple advisory committee clarified that the decision to invite him was theirs, not the Devaswom Board’s.
dileep-sabarimala-darshan-after-acquittal
Dileep, Sabarimala, actress assault case verdict, temple controversy, VIP darshan, Ernakulathappan temple, Kerala news
