സി പി രാധാകൃഷ്ണൻ ഉപരാഷ്ട്രപതി

സി പി രാധാകൃഷ്ണൻ ഉപരാഷ്ട്രപതി

ന്യൂഡൽഹി: രാജ്യത്തിന്റെ 15–ാം ഉപരാഷ്ട്രപതിയായി സി.പി.രാധാകൃഷ്ണൻ (67) തിരഞ്ഞെടുക്കപ്പെട്ടു. നിലവിൽ മഹാരാഷ്ട്ര ഗവർണർ ആണ് അദ്ദേഹം. 452 വോട്ട് നേടിയാണ് സി.പി.രാധാകൃഷ്ണൻ വിജയിച്ചത്.

767 പാർലമെന്റംഗങ്ങൾ ആണ് ഉപരാഷ്ട്രപതി തെരഞ്ഞെടുപ്പിൽ വോട്ട് രേഖപ്പെടുത്തിയത്. പ്രതിപക്ഷ സ്ഥാനാർഥിയായ സുപ്രീം കോടതി മുൻ ജ‍ഡ്ജി ജസ്റ്റിസ് ബി.സുദർശൻ റെഡ്ഡിക്കു 300 വോട്ട് ആണ് ലഭിച്ചത്.

തിരുപ്പൂർ സ്വദേശിയായ രാധാകൃഷ്ണൻ കോയമ്പത്തൂരിൽ നിന്ന് രണ്ടു തവണ ലോക്സഭയിലേക്കു തിരഞ്ഞെടുക്കപ്പെട്ടിരുന്നു. 2020 മുതൽ രണ്ടു വർഷം കേരളത്തിലെ ബിജെപിയുടെ പ്രഭാരിയായിരുന്നു അദ്ദേഹം. കയർ ബോർഡ് മുൻ ചെയർമാനാണ്.

ജാർഖണ്ഡ് ഗവർണർ സ്ഥാനത്തു നിന്നാണ് സി.പി.രാധാകൃഷ്ണൻ മഹാരാഷ്ട്ര ഗവർണറായത്. കൂടാതെ തെലങ്കാനയുടെ അധികച്ചുമതലയും വഹിച്ചിരുന്നു.

ഉപരാഷ്ട്രപതി പദവിയിൽ 2 വർഷം ബാക്കി നിൽക്കെ, ജഗദീപ് ധൻകർ രാജിവെച്ചതിനെ തുടർന്നാണ് ഒഴിവ് വന്നത്. ജൂലൈ 21നാണ് ആരോഗ്യപരമായ കാരണങ്ങൾ ചൂണ്ടിക്കാട്ടി ജഗ്ദീപ് ധൻകർ ഉപരാഷ്ട്രപതി പദം രാജിവച്ചത്.

നേപ്പാൾ പ്രധാനമന്ത്രി കെ.പി. ശർമ ഒലി രാജിവച്ചു

കാഠ്മണ്ഡു: നേപ്പാളിൽ ആളിപ്പടർന്ന ജെൻ സി വിപ്ലവത്തിനൊടുവിൽ പ്രധാനമന്ത്രി സ്ഥാനത്ത് നിന്ന് കെ.പി. ശർമ ഒലി രാജിവച്ചു. അഴിമതിക്കും ഫെയ്സ്ബുക്ക്, വാട്സാപ്പ്, ഇൻസ്റ്റഗ്രാം എന്നിവയുൾപ്പെടെ 26 സാമൂഹികമാധ്യമങ്ങൾ നിരോധിച്ച സർക്കാർ നടപടിക്കുമെതിരെയാണ് യുവാക്കളുടെ പ്രക്ഷോഭം.

പ്രധാനമന്ത്രിയുടെയും പ്രസിഡന്റിന്റെയും വസതികളടക്കം പ്രക്ഷോഭകർ അഗ്നിക്കിരയാക്കിയിരുന്നു. പ്രക്ഷോഭം കലാപമായി മാറിയതോടെയാണ് പ്രധാനമന്ത്രി സ്ഥാനത്ത് നിന്ന് കെ.പി ശർമ ഒലി രാജിവച്ചത്.

പ്രക്ഷോഭം കടുക്കുകയും, പാർലമെൻ്റ് മന്ദിരം, നേതാക്കളുടെ വസതികൾ എന്നിവയുൾപ്പെടെ നിരവധി സുപ്രധാന ഓഫീസുകൾ പ്രക്ഷോഭകർ തകർക്കുകയും പ്രതിഷേധം മറ്റ് നഗരങ്ങളിലേക്ക് വ്യാപിക്കുകയും ചെയ്തതിന് പിന്നാലെയാണ് ഈ പ്രഖ്യാപനം.

പ്രക്ഷോഭത്തിന്റെ തുടക്കം

നേപ്പാളിലെ യുവാക്കൾക്കിടയിൽ വ്യാപകമായ അസന്തോഷത്തിനും കോപത്തിനും വഴിവെച്ചത് സർക്കാർ എടുത്ത 26 സോഷ്യൽ മീഡിയ പ്ലാറ്റ്ഫോമുകളുടെ നിരോധനമായിരുന്നു.

ഫെയ്‌സ്ബുക്ക്, വാട്ട്സാപ്പ്, ഇൻസ്റ്റഗ്രാം തുടങ്ങിയ ജനപ്രിയ പ്ലാറ്റ്ഫോമുകൾ നിരോധിച്ചതോടെ രാജ്യത്തെ വിദ്യാർത്ഥികളും തൊഴിലാളികളും ചെറുപ്പക്കാരും തെരുവിലിറങ്ങി.

‘ജെൻ സി വിപ്ലവം’ എന്ന പേരിൽ ആരംഭിച്ച പ്രതിഷേധം ആദ്യം സമാധാനപരമായിരുന്നു. എന്നാൽ, പ്രതിഷേധക്കാരെ ശക്തമായി അടിച്ചമർത്താൻ പോലീസ് നീങ്ങിയപ്പോൾ സ്ഥിതി നിയന്ത്രണാതീതമായി.

കലാപത്തിലേക്ക്

വെള്ളിയാഴ്ച ആരംഭിച്ച പ്രക്ഷോഭം പിന്നീട് മുഴുവൻ രാജ്യത്തേക്കും വ്യാപിച്ചു. പ്രധാനമന്ത്രിയുടെയും പ്രസിഡന്റിന്റെയും വസതികളടക്കം നിരവധി സർക്കാർ ഓഫീസുകൾക്കും നേതാക്കളുടെ വീടുകൾക്കും നേരെ അക്രമസംഭവങ്ങൾ നടന്നു. പാർലമെന്റ് മന്ദിരം ഉൾപ്പെടെ രാജ്യത്തിന്റെ അധികാര കേന്ദ്രങ്ങൾ പ്രതിഷേധക്കാർ ലക്ഷ്യമാക്കി.

അക്രമത്തിനിടെ 19 പേർ കൊല്ലപ്പെടുകയും 347 പേർക്ക് പരിക്കേൽക്കുകയും ചെയ്തു. സ്ഥിതി നിയന്ത്രിക്കാനാകാതെ വന്നപ്പോൾ സർക്കാർ സൈന്യത്തെ വിന്യസിച്ചു. മന്ത്രിമാരെയും ഉന്നത ഉദ്യോഗസ്ഥരെയും ഹെലികോപ്റ്ററുകൾ വഴി സുരക്ഷിത കേന്ദ്രങ്ങളിലേക്ക് മാറ്റേണ്ടിവന്നു.

രാഷ്ട്രീയ പ്രതിസന്ധി

പ്രക്ഷോഭത്തിന്റെ സമ്മർദ്ദത്തിൽ ആഭ്യന്തര മന്ത്രി രമേഷ് ലേഗഖ് രാജിവെച്ചു. തുടർന്ന് അടിയന്തരമായി വിളിച്ചുചേർത്ത മന്ത്രിസഭാ യോഗത്തിൽ സർക്കാർ സോഷ്യൽ മീഡിയ നിരോധനം പിൻവലിച്ചെങ്കിലും പ്രതിഷേധം അവസാനിച്ചില്ല.

സ്ഥിതി കടുത്തതോടെ ഒടുവിൽ പ്രധാനമന്ത്രി കെ.പി. ശർമ്മ ഒലി രാജി പ്രഖ്യാപിക്കേണ്ടിവന്നു.

Summary: C.P. Radhakrishnan has been elected as the 15th Vice President of India. Currently serving as the Governor of Maharashtra, he secured victory with 452 votes.