ഗുരുവായൂരില് പഴകിയ അവില് സമര്പ്പിക്കരുത്
ഗുരുവായൂര്: ഗുരുവായൂര് ശ്രീകൃഷ്ണ ക്ഷേത്രത്തില് വഴിപാട് സമര്പ്പണമായി പഴകിയതും ഉപയോഗശൂന്യവുമായ അവില് സമര്പ്പിക്കുന്നത് ഒഴിവാക്കണമെന്ന് ഭക്തരോട് ഗുരുവായൂര് ദേവസ്വം ബോര്ഡ്.
ക്ഷേത്രത്തിലെത്തുന്ന ഭക്തർ ഗുണമേന്മ കുറഞ്ഞതും പഴകിയതുമായ അവില് സമര്പ്പിക്കുന്നത് ആവര്ത്തിക്കുന്ന സാഹചര്യത്തിലാണ് ദേവസ്വം ബോര്ഡ് അഭ്യര്ത്ഥനയുമായി രംഗത്തെത്തിയത്.
ഭക്ഷ്യ സുരക്ഷാ ചട്ടങ്ങള് പാലിക്കാതെയും തുണിയിലും കവറിലും പൊതിഞ്ഞ അവിലുകള് സമര്പ്പിക്കുന്നത് ഭക്തര് ഒഴിവാക്കണം. ദിനംപ്രതി ചാക്കുകണക്കിന് അവിലാണ് ഭക്തർ ക്ഷേത്രത്തില് സമര്പ്പിക്കുന്നത്. പൊതിഞ്ഞാണ് വഴിപാടായി അവില് സമര്പ്പിക്കുന്നത്.
എന്നാൽ ചിലര് പ്ലാസ്റ്റിക് കവറുകളിലാക്കിയും സമര്പ്പിക്കുന്നുണ്ട്. എന്നാല് ഇവയിലേറെയും പഴകി പ്യൂപ്പല് ബാധിച്ചതും ഗുണനിലവാരം കുറഞ്ഞതുമാണ്.
ഉല്പ്പാദിച്ച തീയതിയോ ഉപയോഗിക്കാവുന്ന കാലാവധിയോ രേഖപ്പെടുത്തിയിട്ടില്ല. സ്ഥാപനത്തിന്റെ പേരോ അഡ്രസോ കവറില് ഉണ്ടാകാറില്ലെന്നും ദേവസ്വം ബോര്ഡ് വ്യക്തമാക്കി.
ഭക്ഷ്യ സുരക്ഷാ ചട്ടങ്ങള് പാലിക്കാതെ വില്ക്കുന്ന അവിലുകള് വാങ്ങി സമര്പ്പിക്കുന്നത് ഭക്തര് ഒഴിവാക്കേണ്ടത്. ഇക്കാര്യത്തില് നിതാന്ത ജാഗ്രത പുലര്ത്തണം.
മാത്രമല്ല ഇത്തരത്തില് ക്ഷേത്രത്തില് ലഭിച്ച ഉപയോഗശൂന്യമായ ക്വിന്റല് കണക്കിന് അവില് നിര്മ്മാര്ജ്ജനം ചെയ്യുന്നത് ദേവസ്വത്തിന് അധികബാധ്യതയായി മാറിയിരിക്കുകയാണ്.
ആകയാല് ഗുണമേന്മയുള്ളതും ഭക്ഷ്യ സുരക്ഷാചട്ടങ്ങള് പാലിച്ച് വിതരണത്തിനെത്തിക്കുന്നതുമായ അവില് സമര്പ്പിക്കാന് ഭക്തജനങ്ങള് ശ്രദ്ധിക്കണമെന്നും ദേവസ്വം ബോര്ഡ് അഭ്യര്ത്ഥിച്ചു.
ഭക്ത ജനങ്ങളുടെ അഭ്യര്ത്ഥന പ്രകാരം ഗുണമേന്മയുള്ള അവില് സമര്പ്പണത്തിന് ലഭ്യമാക്കാന് ദേവസ്വം നടപടി സ്വീകരിക്കുമെന്ന് ചെയര്മാന് ഡോ.വി കെ വിജയന്, അഡ്മിനിസ്ട്രേറ്റര് ഒ ബി അരുണ്കുമാര് എന്നിവര് അറിയിച്ചു.
അതേസമയം ശുദ്ധിചടങ്ങുകള് നടക്കുന്നതിനാല് ഇന്നും നാളെയും (ശനി, ഞായര്) ഗുരുവായൂര് ക്ഷേത്രത്തില് ദര്ശന നിയന്ത്രണം ഏർപ്പെടുത്തി.
ക്ഷേത്രത്തിൽ വെള്ളിയാഴ്ചത്തെ ഉദയാസ്തമനപൂജയുടെ ഭാഗമായി ശനിയാഴ്ചയും (ജൂലൈ 12) ശനിയാഴ്ചത്തെ ഗുരുവായൂരപ്പന്റെ പ്രതിമാസശുദ്ധിയുടെ ഭാഗമായി ഞായറാഴ്ചയും (ജൂലൈ 13 ) വൈകുന്നേരം ശ്രീഭൂതബലി ഉണ്ടാകും.
ഈ സമയത്തു ദര്ശന നിയന്ത്രണം ഏർപ്പെടുത്തും. ഭക്തര് സഹകരിക്കണമെന്ന് ഗുരുവായൂര് ദേവസ്വം ബോര്ഡ് അഭ്യര്ത്ഥിച്ചു.
ഗുരുവായൂരിൽ ദര്ശനം നടത്തി ഉപരാഷ്ട്രപതി
തൃശൂര്: ഗുരുവായൂര് ശ്രീകൃഷ്ണ ക്ഷേത്രത്തില് ദര്ശനം നടത്തി ഉപരാഷ്ട്രപതി ജഗദീപ് ധന്കര്. ശ്രീകൃഷ്ണ കോളജ് ഹെലിപാഡില് ഇറങ്ങിയാണ് ഉപരാഷ്ട്രപതി ക്ഷേത്ര ദര്ശനത്തിനെത്തിയത്.
ഉപരാഷ്ട്രപതിയെയും ഭാര്യ ഡോ.സുധേഷ് ധന്കറിനെയും ജനപ്രതിനിധികളും ഉന്നത ഉദ്യോഗസ്ഥരും ചേര്ന്ന് സ്വീകരിച്ചു.
ശ്രീകൃഷ്ണ കോളജ് മൈതാനത്ത് വ്യോമസേനാ ഹെലികോപ്റ്ററില് വന്നിറങ്ങിയ ഉപരാഷ്ട്രപതി ഒരു മണിയോടെ റോഡ് മാര്ഗമാണ് തെക്കേ നടയിലെ ശ്രീവത്സം അതിഥിമന്ദിരത്തിലെത്തിയത്.
ഉപരാഷ്ട്രപതി ജഗദീപ് ധന്കറെയും പത്നി ഡോ.സുദേഷ് ധന്കറിനെയും എന്.കെ.അക്ബര് എംഎല് എ ,.ദേവസ്വം ചെയര്മാന് ഡോ.വി കെ വിജയന്,
ഗുരുവായൂര് നഗരസഭാ ചെയര്മാന് എം കൃഷ്ണദാസ്, ദേവസ്വം ഭരണസമിതി അംഗങ്ങളായ സി മനോജ്, മനോജ് ബി നായര്, അഡ്മിനിസ്ട്രേറ്റര് ഒ ബി അരുണ്കുമാര് എന്നിവര് ചേർന്നാണ് സ്വീകരിച്ചത്.
തുടര്ന്ന് അല്പനേരത്തെ വിശ്രമത്തിനു ശേഷം ഉപരാഷ്ട്രപതി ദർശനത്തിനായി തെക്കേ നടയിലൂടെ ക്ഷേത്ര ദര്ശനത്തിനെത്തി.
ക്ഷേത്രം തന്ത്രിയും ദേവസ്വം ഭരണസമിതി അംഗവുമായ ബ്രഹ്മശ്രീ.പി.സി.ദിനേശന് നമ്പൂതിരിപ്പാട് ഉപരാഷ്ട്രപതിയെ പൂര്ണ്ണ കുംഭം നല്കി സ്വീകരിച്ചു.
Summary: The Guruvayur Devaswom Board has urged devotees to refrain from offering stale or poor-quality flattened rice (avil) as temple offerings at the Guruvayur Sreekrishna Temple. The appeal comes in response to repeated instances of low-quality offerings being submitted by visitors.
