വീണ്ടും ജീവനെടുത്ത് കാട്ടാന
പാലക്കാട്: സംസ്ഥാനത്ത് വീണ്ടും കാട്ടാന ആക്രമണത്തിൽ ഒരാൾ കൊല്ലപ്പെട്ടു. പാലക്കാട് മുണ്ടൂരിലാണ് കാട്ടാനയുടെ ആക്രമണം ഉണ്ടായത്.
ഞാറക്കോട് സ്വദേശി കുമാരൻ (61) ആണ് കൊല്ലപ്പെട്ടത്. ഇന്നു പുലർച്ചെ 3.30നായിരുന്നു സംഭവം. വീടിനു സമീപത്ത് എത്തിയ കാട്ടാനകുമാരനെ ആക്രമിക്കുകയായിരുന്നു.
ആന ഇപ്പോഴും ജനവാസ മേഖലയിൽ തുടരുകയാണെന്നാണ് വിവരം. ഇതേ തുടർന്ന് പ്രദേശവാസികൾ ഭീതിയിലാണ്. പ്രദേശത്ത് നാട്ടുകാരുടെ പ്രതിഷേധവും നടക്കുന്നുണ്ട്.
കളക്ടര് എത്താതെ കുമാരന്റെ മൃതദേഹം മാറ്റാന് അനുവദിക്കില്ലെന്ന നിലപാടിലാണ് നാട്ടുകാര്. പ്രദേശത്ത് റെയില് ഫൈന്സിങ് ഒരുക്കുമെന്ന് ഉറപ്പ് ലഭിക്കണമെന്നാണ് നാട്ടുകാർ ഉയർത്തുന്ന ആവശ്യം.
അതിനുശേഷം മാത്രമേ മൃതദേഹം ആശുപത്രിയിലേക്ക് മാറ്റുകയുള്ളുവെന്നാണ് നാട്ടുകാരുടെ നിലപാട്. 2017ല് ഉത്തരവായിട്ടും ഉദ്യോഗസ്ഥര് റെയില് ഫെന്സിംഗ് സ്ഥാപിച്ചില്ലെന്ന് നാട്ടുകാര് ആരോപിച്ചു.
പ്രദേശത്ത് സ്ഥിരമായി കാട്ടാന എത്തുന്നുണ്ടെന്നും വനം വകുപ്പ് ഉദ്യോഗസ്ഥര് കാര്യമായി പ്രവര്ത്തിക്കുന്നില്ലെന്നുമാണ് നാട്ടുകാർ പറയുന്നത്.
ഞാറക്കോട് പ്രദേശത്തെത്തിയ കാട്ടാനയെ ഇന്നലെ കാട് കയറ്റിയിരുന്നുവെന്ന് പാലക്കാട് ഡിഎഫ്ഒ ജോസഫ് തോമസ് പ്രതികരിച്ചു.
എന്നാല് പുലര്ച്ചയോടെ ആന തിരികെയെത്തുകയായിരുന്നു. ആനയുടെ സാന്നിധ്യം സംബന്ധിച്ച് ജനങ്ങള്ക്ക് വിവരം നല്കിയിരുന്നുവെന്നും തഹസില്ദാര് ഉള്പ്പെടെയുള്ള ഉദ്യോഗസ്ഥരെത്തിയ ശേഷം തുടര്നടപടികള് സ്വീകരിക്കുമെന്നും അദ്ദേഹം വ്യക്തമാക്കി.
അതേസമയം കാട്ടാന ആക്രമണത്തിൽ കൊല്ലപ്പെട്ട കുമാരന് വനംവകുപ്പിന്റെ മുന് താത്കാലിക വാച്ചറായിരുന്നുവെന്ന് വനം വകുപ്പ് ഉദ്യോഗസ്ഥര് അറിയിച്ചു.
വീട്ടമ്മയുടെ മരണം കൊലപാതകം; ഭര്ത്താവ് അറസ്റ്റില്
ഒരു മാസത്തിനിടെ പാലക്കാട് ജില്ലയില് കാട്ടാന ആക്രമണത്തില് കൊല്ലപ്പെട്ടത് മൂന്ന് പേരാണ്. ഇന്ന് മരിച്ച ഞാറക്കോട് സ്വദേശി കുമാരന്, എടത്തുനാട്ടുകര സ്വദേശി ഉമ്മര് (മെയ് 19), അട്ടപ്പാടി സ്വദേശി മല്ലന് (മെയ് 31) എന്നിവരാണ് കാട്ടാന ആക്രമണത്തില് മരിച്ചത്.
രണ്ട്മാസം മുമ്പ് കുമാരന്റെ വീടിനു സമീപമുള്ള കയറാങ്കോട് അലന് എന്ന യുവാവും കാട്ടാന ആക്രമണത്തില് കൊല്ലപ്പെട്ടിരുന്നു. അന്ന് അലന്റെ അമ്മക്ക് ഗുരുതരമായി പരിക്കേൽക്കുകയും ചെയ്തിരുന്നു.
തിരുവനന്തപുരത്തും കാട്ടാനയാക്രമണം
അതേസമയം കാട്ടാന ആക്രമണത്തില് നിന്ന് വീട്ടമ്മ തലനാരിഴക്കാണ് രക്ഷപ്പെട്ടത്. തിരുവനന്തപുരം വിതുരയിലാണ് സംഭവം. ബുധനാഴ്ച പുലര്ച്ചെയായിരുന്നു ആക്രമണം നടന്നത്.
ആലുമ്മൂട് കളമുട്ടുപ്പാറയില് രാധയാണ് കാട്ടാന ആക്രമണത്തില് നിന്ന് തലനാരിഴയ്ക്ക് രക്ഷപ്പെട്ടത്. തിരുവനന്തപുരം വിതുര മണലി ട്രൈബല് സെറ്റില്മെന്റിലെത്തിയ കാട്ടാനക്കൂട്ടം രാധയുടെ വീട് തകര്ത്തു.
ആനയെ കണ്ട് രാധ സ്ഥലത്ത് നിന്ന് ഓടി രക്ഷപ്പെടുകയായിരുന്നു. എന്നാല് ഓട്ടത്തിനിടയില് വീണ രാധയ്ക്ക് പരിക്കേറ്റിട്ടുണ്ട്. ആക്രമണത്തിൽ രാധയുടെ വീട് പൂര്ണമായി തകര്ന്നിട്ടുണ്ട്. ആക്രമണം നടന്ന സ്ഥലത്ത് വന്യമൃഗങ്ങളുടെ ആക്രമണം രൂക്ഷമാണെന്ന് നാട്ടുകാര് പറഞ്ഞു.
കണ്ണൂരിൽ അഞ്ചു വയസുകാരന് പേവിഷബാധ
കണ്ണൂർ: കണ്ണൂരിൽ തെരുവുനായയുടെ കടിയേറ്റ അഞ്ചു വയസുകാരന് പേവിഷബാധ സ്ഥിരീകരിച്ചു. തമിഴ്നാട് സ്വദേശികളായ ദമ്പതികളുടെ മകനാണ് രോഗം സ്ഥിരീകരിച്ചത്.
നായ കടിച്ചതിനെ തുടർന്ന് റാബിസ് വാക്സിനെടുത്തെങ്കിലും കുട്ടിയ്ക്ക് പേവിഷബാധ സ്ഥിരീകരിക്കുകയായിരുന്നു.
കുട്ടിയെ പരിയാരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചിരിക്കുകയാണ്.
മെയ് 31 നാണ് കുട്ടിക്ക് നായയുടെ കടിയേറ്റത്. പയ്യാമ്പലം എസ്. എൻ പാർക്കിന് സമീപത്ത് വെച്ചായിരുന്നു സംഭവം. കുട്ടിയുടെ കണ്ണിനും കാലിനും ആണ് കടിയേറ്റത്.
കണ്ണിലേറ്റ മുറിവാണ് കുട്ടിക്ക് പേവിഷബാധ സ്ഥിരീകരിക്കാൻ കാരണമായത്. സ്ഥിതി അതീവ ഗുരുതരാവസ്ഥയിലായ കുട്ടി വെന്റിലേറ്ററിൽ തുടരുകയാണ്.
Summary: A 61-year-old man, Kumaran from Njarakkode, was killed in a wild elephant attack in Mundur, Palakkad during the early hours of the morning around 3:30 AM.
