മണിപ്പൂര്‍: ഉഖ്‌റുല്‍ ജില്ലയിലെ കുക്കി തോവൈ ഗ്രാമത്തില്‍ വെള്ളിയാഴ്ച നടന്ന വെടിവെയ്പ്പില്‍ മൂന്ന് പേര്‍ കൊല്ലപ്പെട്ടു. അക്രമം വ്യാപിക്കാതിരിക്കാന്‍ സുരക്ഷ ശക്തമാക്കിയിട്ടുണ്ട്. കുക്കി വിഭാഗത്തില്‍പ്പെട്ട താങ്ഖോകൈ ഹാകിപ് (31), ജാംഖോഗിന്‍ ഹാക്കിപ് (35), ഹോളന്‍സണ്‍ ബെയ്റ്റ് (20) എന്നിവരാണ് കൊല്ലപ്പെട്ടത്. ആയുധങ്ങളുമായെത്തിയ അജ്ഞാതരായ അക്രമികളുടെ വെടിവെയ്പിലാണ് യുവാക്കള്‍ കൊല്ലപ്പെട്ടത്.
കനത്ത വെടിയൊച്ച കേട്ടതിനെ തുടര്‍ന്ന് മൂന്ന് പേരെ കാണാതായി. തുടര്‍ന്ന് നടത്തിയ അന്വേഷണത്തില്‍ മൃതദേഹങ്ങള്‍ കണ്ടെത്തിയതായാണ് അധികൃതര്‍ അറിയിച്ചത്. മൃതദേഹങ്ങളില്‍ നിന്ന് കാലുകള്‍ മുറിച്ചു മാറ്റിയിരുന്നു. ശരീരമാകെ കുത്തി മുറിവേല്‍പ്പിക്കുകയും ചെയ്തിട്ടുണ്ടായിരുന്നുവെന്നാണ് ലഭിക്കുന്ന വിവരം.
മേയ് മൂന്നു മുതല്‍ നടക്കുന്ന കലാപത്തില്‍ ഉഖ്രുല്‍ ജില്ലയില്‍ ഇതുവരെ അക്രമം റിപ്പോട്ട് ചെയ്തിരുന്നില്ല. സംസ്ഥാനത്ത് അക്രമം പൊട്ടിപ്പുറപ്പെട്ടതിന് ശേഷം 120-ലധികം ആളുകള്‍ മരിക്കുകയും 3,000-ത്തിലധികം പേര്‍ക്ക് പരിക്കേല്‍ക്കുകയും ചെയ്തിട്ടുണ്ട്. പൊലീസിന് പുറമെ 40,000 കേന്ദ്ര സുരക്ഷാ ഉദ്യോഗസ്ഥരെയും അക്രമം നിയന്ത്രിക്കാനും സംസ്ഥാനത്ത് സാധാരണ നിലയിലേക്ക് കൊണ്ടുവരാനും വിന്യസിച്ചിട്ടുണ്ട്.
