മൊറാദാബാദ്: ഉത്തര്‍പ്രദേശില്‍ ബിജെപി നേതാവ് വെടിയേറ്റ് മരിച്ചു. സംഭാല്‍ സ്വദേശിയായ അനുജ് ചൗധരി (34) ആണ് മരിച്ചത്. വ്യാഴാഴ്ച വൈകിട്ടായിരുന്നു സംഭവം. അനുജ് ചൗധരി തന്റെ അപ്പാര്‍ട്ട്‌മെന്റിന് പുറത്തുള്ള വഴിയിലൂടെ നടക്കുമ്പോള്‍ ബൈക്കിലെത്തിയ മൂന്ന് പേര്‍ പലതവണ വെടിയുതിര്‍ക്കുകയായിരുന്നു. ഇതിന്റെ സിസിടിവി ദൃശ്യങ്ങള്‍ പുറത്തുവന്നു.
പരിക്കേറ്റ അനുജ് ചൗധരിയെ മൊറാദാബാദിലെ ബ്രൈറ്റ്സ്റ്റാര്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ലെന്ന് പൊലീസ് അറിയിച്ചു. രാഷ്ട്രീയ എതിരാളികളാണ് കൊലപാതകത്തിനു പിന്നിലെന്ന് ചൗധരിയുടെ കുടുംബം ആരോപിച്ചു. കൊലപാതകത്തില്‍ അമിത് ചൗധരി, അനികേത് എന്നിവര്‍ക്ക് പങ്കുണ്ടെന്ന് കുടുംബം ആരോപിച്ചതായി പൊലീസ് അറിയിച്ചു.
സംഭവത്തില്‍ നാലു പേര്‍ക്കെതിരെ പൊലീസ് കേസെടുത്തു. പ്രതികളെ കണ്ടെത്താനുള്ള ശ്രമത്തിലാണെന്നും കര്‍ശന നടപടി സ്വീകരിക്കുമെന്നും മൊറാദാബാദ് പൊലീസ് അറിയിച്ചു. മൃതദേഹം പോസ്റ്റ്മോര്‍ട്ടത്തിന് അയച്ചു.
