കോട്ടയം: തിരുവാതുക്കല് ഇരട്ടക്കൊലപാതക കേസിൽ സിസിടിവിയുടെ ഹാർഡ് ഡിസ്ക് കണ്ടെത്തി. കൊല്ലപ്പെട്ട വിജയകുമാറിന്റെ വീടിനു പിന്നിലുള്ള തോട്ടിൽ നിന്നാണ് ഹാര്ഡ് ഡിസ്ക് കണ്ടെത്തിയത്.
ഹാര്ഡ് ഡിസ്ക് തോട്ടില് ഉപേക്ഷിച്ചതായി പ്രതി അമിത് ഉറാങ് പൊലീസിന് മൊഴി നല്കിയതിന്റെ അടിസ്ഥാനത്തിലാണ് തിരച്ചിൽ നടത്തിയത്. ഇതിനു പുറമെ പ്രതി ഉപേക്ഷിച്ച രണ്ട് മൊബൈല് ഫോണുകള് കണ്ടെത്താനുള്ള ശ്രമത്തിലാണ് പൊലീസ്.
പ്രതി അമിത് ഉറാങിനെ തൃശൂര് മാളയില് നിന്നാണ് അന്വേഷണ സംഘം പിടികൂടിയത്. മാളയിലെ കോഴിഫാമില് ഒളിവില് കഴിയുന്നതിനിടെയാണ് പ്രതി പിടിയിലായത്. ഝാര്ഖണ്ഡ് സ്വദേശികളായ ഇതര സംസ്ഥാന തൊഴിലാളികള്ക്കൊപ്പമായിരുന്നു പ്രതി.
പത്തിലധികം മൊബൈല് ഫോണുകളും സിം കാര്ഡുകളും ഇയാളുടെ കൈവശമുണ്ടായിരുന്നു. മൊബൈല് ഫോണ് മാറ്റി മാറ്റി ഉപയോഗിക്കുകയായിരുന്നു പ്രതി. കൊല്ലപ്പെട്ട വിജയകുമാറിന്റേയും ഭാര്യ മീരയുടേയും മൊബൈല് ഫോണ് ഇയാള് മോഷ്ടിച്ചിരുന്നു. അതില് ഒരു ഫോണ് സ്വിച്ച് ഓണ് ആയിരുന്നു. തുടർന്ന് ഫോണിന്റെ ടവര് ലൊക്കേഷന് കേന്ദ്രീകരിച്ച് നടത്തിയ അന്വേഷണത്തിലാണ് പ്രതി പിടിയിലായത്.
കോട്ടയം തിരുനക്കര ഇന്ദ്രപ്രസ്ഥം ഓഡിറ്റോറിയം ഉടമ വിജയകുമാറും ഭാര്യ മീരയുമാണ് വീട്ടിനുള്ളില് വെച്ച് കൊല്ലപ്പെട്ടത്. രാവിലെ 8.45നു വീട്ടുജോലിക്കാരി എത്തിയപ്പോഴാണ് വിവരം പുറത്തറിയുന്നത്.
