തിരുവനന്തപുരം: പൊതുവിതരണ രംഗത്ത് കേരളം ഇന്ത്യക്ക് മാതൃകയാണെന്ന് ഭക്ഷ്യമന്ത്രി ജി.ആര്‍. അനില്‍. വില കയറ്റം രാജ്യവ്യാപകമാണെന്നും കേരളത്തില്‍ അത് തടയാനുള്ള ഫലപ്രദമായ നടപടികളാണ് സര്‍ക്കാര്‍ എടുത്ത് വരുന്നതെന്നും ഭക്ഷ്യമന്ത്രി നിയമസഭയില്‍ അറിയിച്ചു. പൊതുവിതരണ രംഗത്ത് കേരളത്തിന് പുറത്ത് മെച്ചപ്പെട്ട ഒരു മാതൃക ചൂണ്ടിക്കാണിക്കാന്‍ പ്രതിപക്ഷത്തിന് സാധിക്കുമോയെന്നും മന്ത്രി ചോദിച്ചു. വിലകയറ്റം സംബന്ധിച്ച് പ്രതിപക്ഷം കൊണ്ടുവന്ന പ്രമേയത്തിന് മറുപടി നല്‍കുകയായിരുന്നു മന്ത്രി ജി.അനില്‍.
കോണ്‍ഗ്രസ് ഭരിക്കുന്ന കര്‍ണാടകയില്‍ തക്കാളി ലഭിക്കുന്നതിനേക്കള്‍ കുറഞ്ഞ വിലയ്ക്കാണ് കേരളത്തില്‍ സപ്ലൈകോ ഔട്ട്ലെറ്റുകളില്‍ വില്‍ക്കുന്നത്. ഇത്തരത്തിലുള്ള സപ്ലൈകോയെ അടച്ചാക്ഷേപിക്കുന്നത് ആര്‍ക്കുവേണ്ടിയാണെന്നും മന്ത്രി ചോദിച്ചു. 2016 മുതല്‍ കോടികളാണ് പൊതുവിപണി രംഗത്ത് സര്‍ക്കാര്‍ ചെലവഴിച്ചത്. 12000 കോടിയോളം രൂപ ഇക്കാലയളവില്‍ പൊതുവിപണിയിലെ ഇടപെടലിനും സബ്സിഡിക്കുമായി ചെലവഴിച്ചിട്ടുണ്ട്.
സപ്ലൈകോ ഔട്ട്ലെറ്റുകളില്‍ ഡിമാന്‍ഡ് കൂടുമ്പോള്‍ സാധനങ്ങള്‍ തീര്‍ന്ന് പോകും. ജൂലായില്‍ അത്തരത്തില്‍ ചില പ്രയാസങ്ങളുണ്ടായി എന്നത് യാഥാര്‍ഥ്യമാണ്. തീര്‍ന്ന സാധനങ്ങള്‍ വേഗത്തില്‍ എത്തിക്കാനുള്ള നടപടികള്‍ എടുത്തിട്ടുണ്ടെന്നും അദ്ദേഹം വ്യക്തമാക്കി.
എന്നാല്‍, വിലകയറ്റം എല്ലാ സീമകളും ലംഘിക്കുമ്പോള്‍ സര്‍ക്കാര്‍ ജനങ്ങളെ നോക്കി പരിഹസിക്കുകയാണെന്ന് പി.സി.വിഷ്ണുനാഥ് പറഞ്ഞു. മന്ത്രിയും മുഖ്യമന്ത്രിയും പറഞ്ഞ സബ്സഡി സാധനങ്ങളൊന്നും സപ്ലൈകോ ഔട്ട്ലെറ്റില്‍ ഇല്ലെന്നും വിഷ്ണുനാഥ് വ്യക്തമാക്കി. നിയമസഭയുടെ തൊട്ട് സമീപമുള്ള ഔട്ട്ലെറ്റില്‍ പോയാല്‍ തന്നെ മന്ത്രിക്ക് കാര്യങ്ങള്‍ ബോധ്യപ്പെടുമെന്നും അദ്ദേഹം കൂട്ടിച്ചേര്‍ത്തു.
