സന്ധിവാതം, ഉളുക്ക്, പേശിവേദന എന്നിവയെല്ലാം മാറുമെന്നാണ് അധികൃതരുടെ അവകാശവാദം
സന്ധിവാതം മാറാനായി കടുവാ മൂത്രവും വിൽപ്പനയ്ക്ക്. ചൈനയിലെ ദി യാൻ ബിഫെൻജിക്സിയ മൃഗശാലാ അധികൃതരാണ് കടുവയുടെ മൂത്രം വില്പനയ്ക്ക് വെച്ചത്. സന്ധിവാതം, ഉളുക്ക്, പേശിവേദന എന്നിവയെല്ലാം മാറുമെന്നാണ് അധികൃതരുടെ അവകാശവാദം. 250 മില്ലി ലിറ്റർ മൂത്രത്തിന് 596 രൂപയാണ് (50 യുവാൻ) വില.(Zoo sells tiger urine as a cure for arthritis)
വൈറ്റ് വൈനും ഒരു കഷ്ണം ഇഞ്ചിയും ചേർന്ന മിശ്രിതത്തില്‍ കടുവയുടെ മൂത്രം കൂടി കലർത്തി വേദനയുള്ള ഭാഗത്ത് പുരട്ടണമെന്നാണ് മൃഗശാലാ അധികൃതർ പറയുന്നത്. കടുവാമൂത്രം കുടിക്കുന്നതും നല്ലതാണെന്നും ഇവർ അവകാശപ്പെടുന്നു. എന്നാൽ എന്തെങ്കിലും വിധത്തിലുള്ള അലർജി അനുഭവപ്പെട്ടാല്‍ മൂത്രം കുടിക്കുന്നത് നിർത്തണമെന്നും മൃഗശാല അധികൃതർ മുന്നറിയിപ്പ് നൽകുന്നു.
എൻഡിടിവി ഉൾപ്പെടെയുള്ള ദേശീയ മാധ്യമങ്ങളാണ് ഇക്കാര്യം റിപ്പോർട്ട് ചെയ്തിരിക്കുന്നത്. എന്നാൽ ഇത് സംബന്ധിച്ച് ഒരു പഠനവും നടന്നിട്ടില്ലെന്നും ശാസ്ത്രീയ അടിത്തറയില്ലെന്നും ആരോഗ്യ വിദഗ്ധര്‍ വ്യക്തമാക്കി. മരുന്ന് വില്‍പ്പന സംബന്ധിച്ച് സര്‍ക്കാരിന്റെ ശക്തമായ നിയമം നിലനിൽക്കുന്ന സാഹചര്യത്തിൽ എങ്ങനെയാണ് ഇവര്‍ വില്‍പ്പന നടത്തുന്നതെന്ന് അറിയില്ലെന്നും ആരോഗ്യ വിദഗ്ധര്‍ പ്രതികരിച്ചു.
