തിരുവനന്തപുരം: മുസ്‌ലിം ലീഗുമായി സിപിഎമ്മിന് യാതൊരുവിധ തൊട്ടുകൂടായ്മയുമില്ലെന്ന് സിപിഎം സംസ്ഥാന സെക്രട്ടറി എം.വി.ഗോവിന്ദന്‍. ഏക വ്യക്തിനിയമ വിഷയത്തില്‍ യോജിച്ചു പോകാന്‍ സാധിക്കുന്ന എല്ലാവരുമായും യോജിച്ച് പ്രവര്‍ത്തിക്കുമെന്ന് ഗോവിന്ദന്‍ വ്യക്തമാക്കി. ഇതുമായി ബന്ധപ്പെട്ട നീക്കങ്ങള്‍ പ്രശ്‌നാധിഷ്ഠിതമാണെന്നും രാഷ്ട്രീയമില്ലെന്നും അദ്ദേഹം പറഞ്ഞു. തിരഞ്ഞെടുപ്പുകള്‍ മുന്‍നിര്‍ത്തി പാലമിടാനുള്ള ശ്രമമാണ് നടത്തുന്നത് എന്നത് വെറും രാഷ്ട്രീയ ആരോപണം മാത്രമാണ്. ഏക വ്യക്തി നിയമത്തില്‍ കോണ്‍ഗ്രസിന് വിവിധ സംസ്ഥാനങ്ങളില്‍ വ്യത്യസ്ത നിലപാടുകളാണെന്നും ഗോവിന്ദന്‍ ചൂണ്ടിക്കാട്ടി.
”മുസ്‌ലിം ലീഗിനെ സംബന്ധിച്ച് ഞങ്ങളുടെ നിലപാട് വളരെ വ്യക്തമായി പറഞ്ഞല്ലോ. ഞങ്ങള്‍ക്ക് ലീഗിനോട് ഒരു തൊട്ടുകൂടായ്മയുമില്ല. ലീഗ് കൈക്കൊള്ളുന്ന ഏതൊരു ശരിയായ നിലപാടിനെയും ഞങ്ങള്‍ മുന്‍പും പിന്തുണച്ചിട്ടുണ്ട്, ഇപ്പോഴും പിന്തുണയ്ക്കുന്നുണ്ട്, ഇനിയും പിന്തുണയ്ക്കും. മുന്നണിയിലേക്കു വരണോ എന്ന കാര്യത്തില്‍ തീരുമാനം പറയേണ്ടത് ഞാനല്ല. അപ്പുറത്തെ മുന്നണിയില്‍ നില്‍ക്കുന്ന ഒരു പാര്‍ട്ടിയെ സംബന്ധിച്ച് ഇപ്പുറത്തു നില്‍ക്കുന്ന ഞാനാണോ പറയേണ്ടത്? അത് അവര്‍ കൈക്കൊള്ളേണ്ട തീരുമാനമാണ്. രാഷ്ട്രീയ തീരുമാനമാണ്.” – ഗോവിന്ദന്‍ ചൂണ്ടിക്കാട്ടി.
”കോണ്‍ഗ്രസിന് ഏക വ്യക്തിനിയമത്തിന്റെ കാര്യത്തില്‍ ഇപ്പോഴും വ്യക്തതയില്ല. ദേശീയ തലത്തില്‍ ഞങ്ങള്‍ ഒരേ നിലപാട് സ്വീകരിക്കുന്നു എന്ന് കോണ്‍ഗ്രസ് പറഞ്ഞാല്‍ അവരെയും ഇതിനെതിരായ മുന്നേറ്റത്തിലേക്ക് ക്ഷണിക്കുന്ന കാര്യം ആലോചിക്കും. ഇപ്പോള്‍ കേരളത്തില്‍ ഏക വ്യക്തിനിയമത്തിനെതിരെ സംസാരിക്കാന്‍ ഞങ്ങള്‍ക്ക് അനുവാദം തന്നിട്ടുണ്ട് എന്നാണ് അവര്‍ പറയുന്നത്. അതായത്, ഛത്തീസ്ഗഡ് ഉള്‍പ്പെടെയുള്ള വിവിധ സംസ്ഥാനങ്ങളില്‍ ഇതിനെ അനുകൂലിക്കുന്ന നിലപാടാണ് കോണ്‍ഗ്രസ് കൈക്കൊണ്ടിട്ടുള്ളത്. അങ്ങനെയുള്ള ഒരു പാര്‍ട്ടിയുമായി ചേര്‍ന്ന് നമുക്ക് മുന്നോട്ടു പോകാനാകില്ല’ – ഗോവിന്ദന്‍ ചൂണ്ടിക്കാട്ടി.
