‘വാട്സ്ആപ്പ് പ്ലസ്’ വരുന്നു? സബ്സ്ക്രിപ്ഷന് ഫീച്ചര് പരീക്ഷണത്തിലെന്ന് റിപ്പോര്ട്ട്
വാഷിങ്ടണ്: ലോകത്തിലെ ഏറ്റവും ജനപ്രിയമായ മെസേജിംഗ് പ്ലാറ്റ്ഫോമായ വാട്സ്ആപ്പില് സബ്സ്ക്രിപ്ഷന് അടിസ്ഥാനത്തിലുള്ള പുതിയ ഫീച്ചര് അവതരിപ്പിക്കാനൊരുങ്ങുന്നതായി റിപ്പോര്ട്ട്.
‘വാട്സ്ആപ്പ് പ്ലസ്’ എന്ന പേരിലാണ് ഈ പുതിയ പെയ്ഡ് ഓപ്ഷന് പരീക്ഷണത്തിലാണെന്ന് ടെക് ട്രാക്കിംഗ് പ്ലാറ്റ്ഫോമായ WABetaInfo റിപ്പോർട്ട് ചെയ്യുന്നത്.
ആന്ഡ്രോയിഡ്, ഐഒഎസ് ഉപകരണങ്ങള്ക്കായി ഈ പ്രീമിയം സബ്സ്ക്രിപ്ഷന് സംവിധാനം വികസിപ്പിച്ചുകൊണ്ടിരിക്കുകയാണെന്നാണ് റിപ്പോര്ട്ടുകള്.
എന്നാല് നിലവിലെ വാട്സ്ആപ്പ് സേവനം എല്ലാവര്ക്കും സൗജന്യമായി തന്നെ തുടരും. അധിക ഫീച്ചറുകള് ഉപയോഗിക്കാന് ആഗ്രഹിക്കുന്നവര്ക്കായിരിക്കും സബ്സ്ക്രിപ്ഷന് ഓപ്ഷന്.
പുതിയ ഫീച്ചറിലൂടെ ഉപയോക്താക്കള്ക്ക് ആപ്പ് കൂടുതല് ഇഷ്ടാനുസൃതമായി കസ്റ്റമൈസ് ചെയ്യാനുള്ള സൗകര്യം ലഭിക്കുമെന്നാണ് സൂചന. ആപ്പിന്റെ ഇന്റര്ഫേസിന്റെ രൂപം മാറ്റാനും ചാറ്റ് അനുഭവം വ്യക്തിഗതമാക്കാനും വിവിധ ടൂളുകള് ലഭ്യമാകും.
പ്രധാന ഫീച്ചറുകള്
റിപ്പോര്ട്ടുകള് പ്രകാരം ‘വാട്സ്ആപ്പ് പ്ലസ്’ സബ്സ്ക്രിപ്ഷനിലൂടെ ലഭിക്കാവുന്ന ചില ഫീച്ചറുകള്:
- Pinned Chats പരിധി വര്ധിപ്പിക്കല്: നിലവിലുള്ള പരിധിയേക്കാള് കൂടുതല് ചാറ്റുകള് പിന് ചെയ്യാം. ഇത് 20 ചാറ്റുകളായി ഉയര്ന്നേക്കും.
- വിഷ്വല് കസ്റ്റമൈസേഷന്: ആപ്പിന്റെ തീം മാറ്റാനും നിറങ്ങള് ക്രമീകരിക്കാനും കഴിയും.
- പുതിയ ആപ്പ് ഐക്കണുകള്: ഉപയോക്താക്കള്ക്ക് തിരഞ്ഞെടുക്കാന് 14 വ്യത്യസ്ത ഐക്കണുകള് ലഭിക്കാം.
- എക്സ്ക്ലൂസീവ് റിങ്ടോണുകള്: വാട്സ്ആപ്പ് കോളുകള് തിരിച്ചറിയാന് പ്രത്യേക റിങ്ടോണുകള്.
- പുതിയ സ്റ്റിക്കറുകള്: സബ്സ്ക്രൈബര്മാര്ക്ക് മാത്രം ലഭിക്കുന്ന പ്രത്യേക സ്റ്റിക്കര് പാക്കുകള്.
ഈ മാറ്റങ്ങള് ആപ്പ് ഉപയോഗം കൂടുതല് വ്യക്തിഗതവും ആസ്വാദ്യകരവുമാക്കുക എന്ന ലക്ഷ്യത്തോടെയാണ് രൂപകല്പ്പന ചെയ്തിരിക്കുന്നത്.
എന്നാല് സന്ദേശമയയ്ക്കല്, കോളുകള് തുടങ്ങിയ അടിസ്ഥാന സേവനങ്ങള് സൗജന്യമായി തന്നെ തുടരുമെന്നാണ് റിപ്പോര്ട്ടുകള് വ്യക്തമാക്കുന്നത്. പ്രീമിയം ഫീച്ചറുകള് മാത്രം സബ്സ്ക്രിപ്ഷന് അടിസ്ഥാനത്തിലായിരിക്കും ലഭിക്കുക.
