നാട്ടിലേക്ക് പോകുന്ന പ്രവാസികൾ ശ്രദ്ധിക്കുക! യുഎഇ വിമാനത്താവളങ്ങളിൽ വൻ തിരക്ക് മുന്നറിയിപ്പ്; എമിറേറ്റ്സിന്റെ നിർദ്ദേശങ്ങൾ
ദുബായ്: ബലിപെരുന്നാൾ അവധിയും സ്കൂൾ വേനലവധിയും ഒരുമിച്ചെത്തുന്നതോടെ യുഎഇയിലെ വിമാനത്താവളങ്ങളിൽ വരും ദിവസങ്ങളിൽ വലിയ തിരക്ക് അനുഭവപ്പെടുമെന്ന മുന്നറിയിപ്പുമായി പ്രമുഖ വിമാനക്കമ്പനികൾ.
യാത്രക്കാർ അനാവശ്യ വൈകിപ്പോകലുകളും തിരക്കുകളും ഒഴിവാക്കാൻ മുൻകൂട്ടി തയ്യാറാകണമെന്നും നിശ്ചിത സമയത്തേക്കാൾ നേരത്തെ വിമാനത്താവളങ്ങളിൽ എത്തിച്ചേരണമെന്നും എമിറേറ്റ്സ്, ഇത്തിഹാദ് എയർവേയ്സ്, ഫ്ലൈദുബായ് കമ്പനികൾ നിർദേശിച്ചു.
ഓൺലൈൻ ചെക്ക്-ഇൻ, ഹോം ചെക്ക്-ഇൻ തുടങ്ങിയ ഡിജിറ്റൽ സേവനങ്ങൾ പരമാവധി പ്രയോജനപ്പെടുത്തണമെന്നും വിമാനക്കമ്പനികൾ അറിയിച്ചു.
യുഎഇയിൽ സ്വകാര്യ മേഖലയ്ക്ക് മെയ് 26 മുതൽ 29 വരെയും പൊതുമേഖലയ്ക്ക് മെയ് 25 മുതൽ 29 വരെയുമാണ് ബലിപെരുന്നാൾ അവധി പ്രഖ്യാപിച്ചിരിക്കുന്നത്. മേഖലയിലെ സംഘർഷാവസ്ഥയ്ക്ക് അയവ് വന്നതോടെ വിമാന സർവീസുകൾ സാധാരണ നിലയിലായതും യാത്രക്കാരുടെ എണ്ണം ഉയരാൻ കാരണമായിട്ടുണ്ട്.
എമിറേറ്റ്സ് നിർദേശങ്ങൾ
ദുബായ് അന്താരാഷ്ട്ര വിമാനത്താവളത്തിൽ നിന്ന് യാത്ര ചെയ്യുന്നവർ വിമാനം പുറപ്പെടുന്നതിന് കുറഞ്ഞത് മൂന്ന് മണിക്കൂർ മുൻപ് എത്തണമെന്ന് എമിറേറ്റ്സ് അറിയിച്ചു.
ഇമിഗ്രേഷൻ, സുരക്ഷാ പരിശോധനകൾ എന്നിവയ്ക്ക് തിരക്കേറിയ സമയങ്ങളിൽ കൂടുതൽ സമയം വേണ്ടിവരാൻ സാധ്യതയുള്ളതിനാൽ യാത്രക്കാർ മുൻകരുതൽ സ്വീകരിക്കണം.
വിമാനത്താവളത്തിലേക്കുള്ള റോഡുകളിൽ ഗതാഗതക്കുരുക്ക് ഉണ്ടാകാൻ സാധ്യതയുള്ളതിനാൽ മെട്രോ ഉൾപ്പെടെയുള്ള പൊതുഗതാഗത മാർഗങ്ങൾ ഉപയോഗിക്കാനും നിർദേശമുണ്ട്.
ഇത്തിഹാദ് എയർവേയ്സ് മുന്നറിയിപ്പ്
അബുദാബിയിൽ നിന്ന് യാത്ര ചെയ്യുന്നവർ ലഗേജ് നിയമങ്ങൾ കർശനമായി പാലിക്കണമെന്ന് ഇത്തിഹാദ് എയർവേയ്സ് അറിയിച്ചു.
പവർ ബാങ്കുകൾ, ഇ-സിഗരറ്റുകൾ, മാറ്റാനാകുന്ന ബാറ്ററിയുള്ള സ്മാർട്ട് ബാഗുകൾ എന്നിവ കാബിൻ ബാഗേജിൽ മാത്രമേ അനുവദിക്കൂ. ചെക്ക്-ഇൻ ലഗേജിൽ ഇവ അനുവദിക്കില്ലെന്നും കമ്പനി വ്യക്തമാക്കി.
ഫ്ലൈദുബായ് നിർദേശങ്ങൾ
ഫ്ലൈദുബായ് യാത്രക്കാർ വിമാനം പുറപ്പെടുന്നതിന് നാല് മണിക്കൂർ മുൻപ് വിമാനത്താവളത്തിൽ എത്തണമെന്ന് കമ്പനി അറിയിച്ചു.
വിമാനം പുറപ്പെടുന്നതിന് 60 മിനിറ്റ് മുൻപ് ചെക്ക്-ഇൻ കൗണ്ടറുകൾ അടയ്ക്കും. യാത്ര പുറപ്പെടുന്നതിന് 48 മണിക്കൂർ മുൻപ് മുതൽ 75 മിനിറ്റ് മുൻപ് വരെ ഓൺലൈൻ ചെക്ക്-ഇൻ ചെയ്യാനും സാധിക്കും.
തിരക്ക് ഒഴിവാക്കാൻ ഹോം ചെക്ക്-ഇൻ സംവിധാനവും ഷാർജയിലെ സിറ്റി ചെക്ക്-ഇൻ സൗകര്യവും ഉപയോഗിക്കാമെന്നും കമ്പനി വ്യക്തമാക്കി.
English Summary
Major airlines in the UAE have warned passengers about heavy airport rush during the Eid Al-Adha holidays and school vacation season. Emirates, Etihad Airways, and flydubai advised travelers to arrive early at airports and make maximum use of online and home check-in facilities.
