“ജീവൻ തിരികെ കിട്ടുമെന്ന് കരുതിയില്ല;” ഇടഞ്ഞോടിയ ആനയുടെ മുന്നിൽപ്പെട്ട് മരണപ്പാച്ചിൽ നടത്തിയ കാറും സ്കൂട്ടറും; തൃശൂരിലെ ഭീതിയുടെ രണ്ട് മണിക്കൂറുകൾ
തൃശൂർ: ഇടഞ്ഞോടിയ കൊമ്പന്റെ മുന്നിൽപ്പെട്ട കാർ കൊമ്പിൽ കോർത്തുയർത്തി പലവട്ടം വീശിയതോടെ മരണത്തെ മുഖാമുഖം കണ്ട അനുഭവമാണ് വീട്ടമ്മയായ സംഗീതയ്ക്ക് ഉണ്ടായത്. കാർ തലകീഴായി മറിഞ്ഞെങ്കിലും അത്ഭുതകരമായി ജീവൻ രക്ഷപ്പെട്ടു. പിന്നാലെ സ്കൂട്ടിയിൽ എത്തിയ മകൾ ശ്രുതിയും തലനാരിഴയ്ക്ക് അപകടത്തിൽ നിന്ന് രക്ഷപ്പെട്ടു.
തിരുവനന്തപുരം സ്വദേശി ശിവദത്തിന്റെ ആനയായ ‘ശിവംലക്ഷ്മി അയ്യപ്പൻ’ ഇന്നലെ രാവിലെ തൃശൂർ നഗരത്തെ രണ്ട് മണിക്കൂറിലേറെ ഭീതിയിലാഴ്ത്തി. ഫോട്ടോഷൂട്ടിനും ക്ഷേത്രച്ചടങ്ങിനുമായി കൊണ്ടുവന്ന ആന തേക്കിൻകാട് മൈതാനത്ത് നിന്ന് വിരണ്ടോടുകയായിരുന്നു.
രണ്ടര കിലോമീറ്ററോളം ഓടിയ ആന വിയ്യൂർ പെരിങ്ങാവിലെ ഗാന്ധിനഗർ ഭാഗത്തെത്തി. ഇടറോഡിലൂടെ പാഞ്ഞെത്തിയ ആനയുടെ മുന്നിലായിരുന്നു സംഗീത സഞ്ചരിച്ച കാർ. ആന വിരണ്ടുവരുന്നതായി നാട്ടുകാർ മുന്നറിയിപ്പ് നൽകിയെങ്കിലും വളവിൽ വാഹനം പിന്നോട്ടെടുക്കാൻ കഴിഞ്ഞില്ല.
മകൾക്ക് മുന്നറിയിപ്പായി ഹോൺ മുഴക്കിയെങ്കിലും അതിനിടെ ആന കാർ കൊമ്പിൽ കോർത്തുയർത്തി. പിന്നീട് ആന അൽപം മാറിയതോടെ നാട്ടുകാർ ചേർന്ന് തലകീഴായി കിടന്ന കാറിൽ നിന്ന് സംഗീതയെ പുറത്തെടുത്തു. ശരീരത്തിൽ ക്ഷതങ്ങളേറ്റെങ്കിലും ഗുരുതര പരിക്കുകൾ ഒഴിവായി. കാർ പൂർണമായും തകർന്നു.
ചെറുതുരുത്തി മുണ്ടയ്ക്കൽ സ്വദേശിനിയായ സംഗീത കിഴക്കുംപാട്ടുകരയിലെ ഒരു സ്വകാര്യ സ്ഥാപനത്തിലെ ജീവനക്കാരിയാണ്. സി.എ പരീക്ഷയ്ക്ക് തയ്യാറെടുക്കുന്ന മകൾ ശ്രുതിയുമായി വിയ്യൂരിലെ വാടകവീട്ടിലേക്കായിരുന്നു യാത്ര.
മൂന്ന് കാറുകളും അഞ്ച് സ്കൂട്ടറുകളും തകർത്തു
പാറമേക്കാവിൽ ചടങ്ങ് കഴിഞ്ഞതിന് പിന്നാലെ ആന ഇടഞ്ഞോടുകയായിരുന്നു. മൂന്ന് കാറുകളും അഞ്ച് സ്കൂട്ടറുകളും തകർത്ത ആന അഞ്ച് വീടുകളുടെ ചുറ്റുമതിലും ടൗൺഹാളിന്റെ മുൻഭാഗവും നശിപ്പിച്ചു.
പരാക്രമത്തിനിടെ ആനയുടെ ചെവിയിലും നെറ്റിയിലും മുറിവേറ്റു. ഒടുവിൽ ഒരു വീടിന്റെ പിന്നിൽ നിലയുറപ്പിച്ചപ്പോഴാണ് പാപ്പാന്മാർ ചേർന്ന് ആനയെ തളച്ചത്.
“ജീവൻ തിരികെ കിട്ടുമെന്ന് കരുതിയില്ല,” എന്ന് സംഗീത പറഞ്ഞു.
English Summary
A woman narrowly escaped death after a rampaging elephant in Thrissur lifted and overturned her car using its tusks. The elephant, brought for a temple function and photoshoot, went out of control and damaged several vehicles and properties before being restrained. The woman and her daughter escaped with minor injuries.
