ന്യൂ ഡൽഹി: വീട്ടുമുറ്റത്ത് സഹോദരിക്കൊപ്പം കളിക്കുന്നതിനിടെ ഓടയിൽ വീണ് മൂന്ന് വയസുകാരൻ മരിച്ചു. നോർത്ത് ഈസ്റ്റ് ഡൽഹിയിലെ ഖജൂരി ഖാസ് മേഖലയിലാണ് ദാരുണ സംഭവം ഉണ്ടായത്. 3 വയസ്സുകാരനായ വിശ്വജിത്ത് കുമാർ (3) ആണ് മരിച്ചത്.
സ്വകാര്യ സ്ഥാപനത്തിൽ പ്യൂണായി ജോലി ചെയ്യുന്ന രാംവിലാസ് സിങ് ആണ് കുട്ടിയുടെ പിതാവ്. അപകടം നടക്കുന്ന സമയം കുഞ്ഞിന്റെ മാതാവ് വീട്ടിലുണ്ടായിരുന്നു. പിതാവ് ജോലിക്ക് പോയിരിക്കുകയായിരുന്നു. മകന്റെ മരണ വിവരം ഒരു ബന്ധു വിളിച്ചു പറയുമ്പോഴാണ് താൻ അറിയുന്നതെന്നാണ് രാംവിലാസ് സിങ് പറയുന്നത്.
അപകട വിവരം ലഭിച്ച ഉടൻ തന്നെ പോലീസ് സംഘം സ്ഥലത്തെത്തി കുട്ടിയെ പുറത്തെടുത്ത് ജെപിസി ആശുപത്രിയിലേക്ക് കൊണ്ടുപോയി. എന്നാൽ അവിടെ എത്തുന്നതിന് മുമ്പ് തന്നെ കുട്ടിയുടെ ജീവൻ നഷ്ടമായിരുന്നുവെന്നാണ് ഡോക്ടർമാർ പറയുന്നത്.
ഉച്ചയ്ക്ക് 1.40 ഓടെയാണ് അപകടം നടന്ന വിവരം തങ്ങൾക്ക് ലഭിച്ചതെന്ന് പോലീസ് വ്യക്തമാക്കി. മൂടാതെ ഇട്ടിരുന്ന ഓടയിൽ കുട്ടി അബദ്ധത്തിൽ വീണുവെന്നാണ് സ്ഥലം സന്ദർശിച്ചപ്പോൾ മനസ്സിലായതെന്നും പോലീസ് കൂട്ടിച്ചേർത്തു.
ദീർഘകാലമായി തുറന്നു കിടക്കുന്ന ജലസേചന വകുപ്പിന്റെ ഉടമസ്ഥതയിലുള്ള ഓടയിലാണ് അപകടം സംഭവിച്ചതെന്ന് നാട്ടുകാർ പറഞ്ഞു. മാലിന്യങ്ങൾ നിറഞ്ഞുകിടന്ന ഓട മൂടണമെന്ന ആവശ്യം പലതവണ നാട്ടുകാർ ഉന്നയിച്ചിട്ടും അധികൃതർ അതിന് തയ്യാറായില്ലെന്നും അവർ പറഞ്ഞു. അതേസമയം ജലസേചന വകുപ്പ് അധികൃതർ ഈ വിഷയത്തോട് ഇതുവരെ പ്രതികരിച്ചിട്ടില്ല.
