തിരുവനന്തപുരം: സംസ്ഥാനത്ത് പെന്‍ഷന്‍ മസ്റ്ററിങ് നടത്താത്തത് മൂന്നര ലക്ഷം ഗുണഭോക്താക്കള്‍. ജൂണ്‍ വരെ പെന്‍ഷന്‍ വാങ്ങിയ 63 ലക്ഷം പേരില്‍ 59.5 ലക്ഷം പേരാണ് ആഗസ്റ്റ് 31 വരെ മസ്റ്റര്‍ ചെയ്തത്. മസ്റ്ററിങ് ചെയ്യാത്തവര്‍ക്ക് മസ്റ്ററിങ്ങ് ചെയ്യുന്നതിനായി പിന്നീട് അവസരമുണ്ട്. എന്നാല്‍ ആ മാസം മുതലുള്ള പെന്‍ഷന്‍ മാത്രമേ അവര്‍ക്ക് ലഭിക്കൂ.
2022 ഡിസംബര്‍ 31 വരെ ക്ഷേമ പെന്‍ഷന്‍ ലഭിച്ച ഗുണഭോക്താക്കള്‍ ആഗസ്റ്റ് 31നകം ബയോമെട്രിക് മസ്റ്ററിങ് നടത്തണമെന്നായിരുന്നു നിര്‍ദേശം. ഇതുപ്രകാരം ജൂണ്‍ മാസം വരെ പെന്‍ഷന്‍ വാങ്ങിയ 63 ലക്ഷത്തോളം ഗുണഭോക്താക്കളില്‍ നിന്ന് മസ്റ്ററിങ് ചെയ്തവരാണ് 59.5 ലക്ഷം പേര്‍. 53 ലക്ഷം പേര്‍ നേരിട്ട് മസ്റ്റര്‍ ചെയ്തപ്പോള്‍ 6.5 ലക്ഷം പേരുടെ വീട്ടിലെത്തിയാണ് മസ്റ്ററിങ് പൂര്‍ത്തിയാക്കിയത്. പുതിയ കണക്ക് പ്രകാരം ഗുണഭോക്താക്കളുടെ ലിസ്റ്റിലുള്ള 3.5 ലക്ഷത്തോളം പേര്‍ മസ്റ്റര്‍ ചെയ്തിട്ടില്ല.
അവസാന ദിവസമായ ആഗസ്റ്റ് 31ന് വെറും 4,000 പേര്‍ മാത്രമാണ് മസ്റ്റര്‍ ചെയ്തത്. രണ്ട് തവണ മസ്റ്ററിങ്ങിന് സമയം നീട്ടി നല്‍കിയിരുന്നു. മസ്റ്റര്‍ ചെയ്യാത്ത 3.5 ലക്ഷം പേരെ പെന്‍ഷന്‍ ഗുണഭോക്താക്കളുടെ പട്ടികയില്‍ നിന്ന് പൂര്‍ണ്ണമായും ഒഴിവാക്കാന്‍ സര്‍ക്കാര്‍ നിലവില്‍ തീരുമാനിച്ചിട്ടില്ല. സമയപരിധിക്കുള്ളില്‍ മസ്റ്ററിങ് പൂര്‍ത്തീകരിക്കാത്തവര്‍ക്ക് എല്ലാ മാസവും ഒന്നുമുതല്‍ 20 വരെ മസ്റ്ററിങ് ചെയ്യാം. എന്നാല്‍ മസ്റ്ററിങ് നടത്തിയ മാസം മുതലുള്ള പെന്‍ഷന്‍ മാത്രമേ ലഭിക്കൂ. സംസ്ഥാനത്തെ മരണ നിരക്ക് അടക്കമുള്ള കാരണങ്ങള്‍ പരിഗണിച്ചാല്‍ ഈ 59.5 ലക്ഷം ഗുണഭോക്താക്കളുടെ എണ്ണത്തില്‍ കാര്യമായ വര്‍ധനയ്ക്ക് സാധ്യത ഇല്ലെന്നാണ് ധനവകുപ്പിന്റെ വിലയിരുത്തല്‍.
