കൊച്ചി: അമിത വേഗത്തിലെത്തിയ സ്കൂട്ടർ വയോധികയെ ഇടിച്ച് തെറിപ്പിക്കുന്നതിന്റെ സിസിടിവി ദൃശ്യങ്ങൾ പുറത്ത്. ഇന്നലെയാണ് ഫോർട്ട് കൊച്ചി ഡെൽറ്റാ സ്കൂളിന് സമീപം അപകടം നടന്നത്.
ലോട്ടറി വിൽപനക്കാരിയായ വസന്ത ബാബുരാജ് (63) എന്ന വയോധികയ്ക്കാണ് അപകടത്തിൽ പരിക്കേറ്റത്. നോർത്ത് പറവൂർ സ്വദേശിയാണിവർ. സ്കൂൾ പരിസരത്ത് ലോട്ടറി വിറ്റ് ഉപജീവനം നടത്തുന്ന ഇവരുടെ തലയ്ക്കും ഇടുപ്പിനും ഇവർക്ക് പരിക്കേറ്റിട്ടുണ്ട്.
ജോലിക്കിടെ റോഡിന്റെ എതിർവശത്തേക്ക് നടക്കുന്നതിനിടെ അമിത വേഗത്തിലെത്തിയ സ്കൂട്ടർ ഇടിക്കുകയായിരുന്നു. ഇവരെ ഇടിച്ചിട്ട ശേഷം സ്കൂട്ടർ യാത്രികർ നിർത്താതെ പോയി.
പ്രദേശത്തെ വ്യാപാരികളും നാട്ടുകാരും ചേർന്നാണ് ഇവരെ ആശുപത്രിയിൽ എത്തിച്ചത്. അമിത വേഗത്തിലാണ് വാഹനമെത്തിയതെന്ന് സിസിടിവി ദൃശ്യങ്ങളിൽ നിന്ന് വ്യക്തമാണ്.
സ്കൂട്ടർ യാത്രക്കാരെ കണ്ടെത്താൻ സാധിച്ചിട്ടില്ല. സിസിടിവി ദൃശ്യങ്ങൾ കേന്ദ്രീകരിച്ച് പോലീസ് അന്വേഷണം നടത്തുകയാണ്.
