തട്ടിക്കൊണ്ടുപോകാനുള്ള ശ്രമം പാളിയത് ഒരു അബദ്ധം മൂലം
ഗുരുഗ്രാം ∙ ഹരിയാനയിൽ വിനോദ സഞ്ചാരത്തിനെത്തിയ യുവതിയെ ഭക്ഷണ വിൽപനക്കാരൻ തട്ടിക്കൊണ്ടുപോകാൻ ശ്രമിച്ച സംഭവം.
23 വയസ്സുള്ള യുവതിയെയാണ് സുഹൃത്തിനെ മർദിച്ച ശേഷം പ്രതി വാഹനത്തിൽ കയറ്റിക്കൊണ്ടുപോയത്. എന്നാൽ, പൊലീസിന്റെ സമയോചിതമായ ഇടപെടലിലൂടെ യുവതിയെ സുരക്ഷിതമായി രക്ഷപ്പെടുത്താൻ സാധിച്ചു.
ഞായറാഴ്ച രാത്രി ഏകദേശം 1.30ഓടെയാണ് യുവതി സുഹൃത്തിനൊപ്പം വിനോദ സഞ്ചാര കേന്ദ്രത്തിലെത്തിയത്.
ഇരുവരും കാറിൽ ഇരിക്കുമ്പോൾ പുലർച്ചെ മൂന്നുമണിയോടെ ഗൗരവ് ഭാട്ടിയെന്ന പ്രദേശത്തെ ഭക്ഷണ വിൽപനക്കാരൻ അവിടെയെത്തുകയും യുവാവിനോട് തർക്കത്തിലേർപ്പെടുകയും ചെയ്തു. പിന്നാലെ ഇയാൾ ആക്രമിക്കാൻ ശ്രമിച്ചതായാണ് പരാതി.
തുടർന്ന് യുവതിയുടെ മൊബൈൽ ഫോൺ ഗൗരവ് ഭാട്ടി തട്ടിയെടുത്ത് സ്വന്തം വാഹനത്തിലേക്ക് കയറുകയായിരുന്നു. ഫോൺ തിരികെ നേടാൻ യുവതിയും സുഹൃത്തും ഇയാളെ പിന്തുടർന്നു.
ഈ സമയത്ത് സുഹൃത്തിനെ തള്ളിവീഴ്ത്തിയ പ്രതി യുവതിയെ ബലമായി വാഹനത്തിനുള്ളിലേക്ക് വലിച്ചിഴച്ച് കയറ്റിയ ശേഷം സ്ഥലത്തുനിന്ന് ഓടി രക്ഷപ്പെടുകയായിരുന്നു.
സംഭവം കണ്ട സുഹൃത്ത് ഉടൻ പൊലീസിനെ വിവരമറിയിച്ചു. യുവതിയുടെ ഫോൺ ലൊക്കേഷൻ അടിസ്ഥാനമാക്കി പൊലീസ് അന്വേഷണം ആരംഭിച്ചു.
മൂന്ന് സംഘങ്ങളായി തിരിഞ്ഞ് നടത്തിയ തിരച്ചിലിലാണ് വാഹനത്തിന്റെ സഞ്ചാരദിശ കണ്ടെത്താനായത്.
ആളൊഴിഞ്ഞ വഴികളിലൂടെ വാഹനം കൊണ്ടുപോയ പ്രതി ഒടുവിൽ ചെളി നിറഞ്ഞ പ്രദേശത്തെത്തിയപ്പോൾ ടയർ താഴ്ന്നതിനെ തുടർന്ന് വാഹനം നിശ്ചലമായി.
ഇതോടെ യുവതി നിലവിളിക്കുകയും സഹായം തേടുകയും ചെയ്തു. യുവതിയുടെ നിലവിളി കേട്ടതോടെ പ്രതി വാഹനത്തിൽ നിന്ന് ഇറങ്ങി ഓടിരക്ഷപ്പെടാൻ ശ്രമിച്ചെങ്കിലും സ്ഥലത്തെത്തിയ പൊലീസ് ഇയാളെ പിടികൂടി. യുവതിയെ സുരക്ഷിതമായി രക്ഷപ്പെടുത്തി.
അന്വേഷണത്തിൽ ഗൗരവ് ഭാട്ടിയെ പൊലീസ് അറസ്റ്റ് ചെയ്തു. സുഹൃത്തിന്റെ വാഹനമാണ് യുവതിയെ തട്ടിക്കൊണ്ടുപോകാൻ ഉപയോഗിച്ചതെന്ന് പൊലീസ് കണ്ടെത്തി.
മദ്യം വാങ്ങിവരാമെന്ന വ്യാജേന സുഹൃത്തിന്റെ വാഹനമാണ് പ്രതി ഉപയോഗിച്ചതെന്നും പൊലീസ് അറിയിച്ചു. സംഭവത്തിൽ വിശദമായ അന്വേഷണം തുടരുകയാണ്.
