വിശുദ്ധ ഹജ്ജ് കർമ്മങ്ങൾക്ക് തുടക്കമായി. കൊറോണയ്ക്ക് ശേഷം ഏറ്റവും കൂടുതൽ ഹാജിമാർ ഹജ്ജിന് എത്തുന്നുവെന്ന പ്രത്യേകതയും ഇത്തവണയുണ്ട്. വിശ്വാസികളെ സ്വീകരിക്കാൻ ഇത്തവണ വിപുലമായ സൗകര്യങ്ങളാണ് ഒരുക്കിയിരിക്കുന്നത്.
ഇന്നാണ് ഹജ്ജിന്റെ സുപ്രധാന കർമ്മമായ അറഫാ സംഗമം. . പ്രവാചകരും അനുയായികളും ഹജ്ജ് വേളയിൽ ഒത്തുചേരുന്നതിന്റെ ഓർമ്മ പുതുക്കൽ കൂടിയാണ് അറഫാ സംഗമം. മിനായിൽ നിന്ന് മടങ്ങുന്ന ഹാജിമാർ ഇന്ന് സുബ്ഹി നിസ്ക്കാരത്തിന് ശേഷം അറഫയിൽ സംഗമിക്കും. ളുഹ്ർ നിസ്കാരത്തോടെയാണ് അറഫാ സംഗമത്തിന് തുടക്കമാവുക.
ഹജ്ജ് ഏജൻസികൾ ഏർപ്പെടുത്തിയ വാഹനങ്ങളിൽ വ്യാഴാഴ്ച മുതൽ തന്നെ ഹാജിമാർ മിനായിൽ എത്തിയിരുന്നു. പരമ്പരാഗത അറബ് സംസ്കാര തനിമയിൽ ആധുനിക സൗകര്യങ്ങളോടെയാണ് ഈ വർഷം മിനായിലെ തമ്പുകൾ സജ്ജമാക്കിയിട്ടുള്ളത്. രണ്ട് ലക്ഷത്തിലധികം തമ്പുകളിലും മിനായിലെ റസിഡൻഷ്യൻ ടവറുകളിലുമായാണ് ഹാജിമാർക്കുള്ള താമസ സൗകര്യങ്ങൾ ഒരുക്കിയിരിക്കുന്നത്.
ഹജ്ജ് വേളയിൽ തീർത്ഥാടകർ ഏറ്റവും കൂടുതൽ സമയം ചെലവഴിക്കുന്നതും അറഫാ സംഗമത്തിന് ശേഷം കല്ലേറ് കർമ്മങ്ങൾക്കും ബലി കർമ്മങ്ങൾക്കും സാക്ഷ്യം വഹിക്കുന്നതും മിനായിലാണ്. ലോകത്തിന്റെ നാനാദിക്കുകളിൽ നിന്നൊഴുകിയെത്തിയ 20 ലക്ഷത്തിലേറെ വിശ്വാസികളാണ് മിനായിലേക്ക് എത്തിയത്.
