കോഴിക്കോട്: കോഴിക്കോട് മെഡിക്കല് കോളേജ് ആശുപത്രിയില് നാലുവയസുകാരിക്ക് മാറി ശസ്ത്രക്രിയ നടത്തിയ ഡോക്ടറെ സസ്പെന്ഡ് ചെയ്തു. ഡോക്ടര് ബിജോണ് ജോണ്സനെയാണ് അന്വേഷണ വിധേയമായി സസ്പെന്ഡ് ചെയ്തത്. ഡോക്ടര്ക്ക് പിഴവ് പറ്റിയെന്നുള്ള മെഡിക്കല് വിദ്യാഭ്യാസ വകുപ്പ് ഡയറക്ടറുടെ കണ്ടെത്തലിനെ തുടര്ന്നാണ് സർക്കാർ നടപടി.
ശസ്ത്രക്രിയ മാറിയത് സ്വന്തം പിഴവുകൊണ്ടാണെന്ന് സമ്മതിച്ച് ഡോക്ടര് രംഗത്തു വന്നിരുന്നു. ശസ്ത്രക്രിയ കൊണ്ട് കുട്ടിക്ക് ഭാവിയില് പ്രശ്നങ്ങള് ഉണ്ടാകില്ലെന്നും ഡോക്ടര് സൂപ്രണ്ടിന് എഴുതി നൽകിയ കത്തിലുണ്ടായിരുന്നു. കോഴിക്കോട് ചെറുവണ്ണൂര് മധുര ബസാറിലുള്ള ദമ്പതികളുടെ മകളായ നാലു വയസുകാരിക്കായിരുന്നു മാറി ശസ്ത്രക്രിയ നടത്തിയത്.
കുഞ്ഞിന്റെ കൈയിലെ ആറാം വിരല് നീക്കുന്ന ശസ്ത്രക്രിയയ്ക്കാണ് കോഴിക്കോട് മെഡിക്കല് കോളേജ് ആശുപത്രിയിലെത്തിയത്. ശസ്ത്രക്രിയ മാറി നടത്തിയതിന് പിന്നാലെ മറ്റൊരു ശസ്ത്രക്രിയയിലൂടെ കുഞ്ഞിന്റെ ആറാം വിരല് നീക്കം ചെയ്യുകയായിരുന്നു.
