കൗമാരകാലത്ത് ഹൃദയത്തിൽ കൊണ്ടു നടന്ന സ്വപ്നം 65-ാം വയസിൽ യാഥാർത്ഥ്യമാക്കി; രശ്മിയെ ജീവിതസഖിയാക്കി ജയപ്രകാശ് ; കട്ടയ്ക്ക് കൂടെ നിന്ന് മക്കളും മരുമക്കളും കൊച്ചുമക്കളും
കൊല്ലം: കൗമാരകാലത്ത് ഹൃദയത്തിൽ ഒളിപ്പിച്ചിരുന്ന ഒരു സ്വപ്നം 65-ാം വയസിൽ യാഥാർത്ഥ്യമാക്കി ജയപ്രകാശ്.
ജീവിതത്തിന്റെ അറുപതുകളിൽ വീണ്ടും മനസിലെ പഴയ പ്രണയിനിയായ രശ്മിയെ ജീവിതസഖിയാക്കി അദ്ദേഹം പുതിയൊരു മാതൃക സൃഷ്ടിച്ചു.
ഏറ്റവും ശ്രദ്ധേയമായത്, ഇരുവരുടെയും മക്കളും മരുമക്കളുമാണ് വിവാഹാലോചന നടത്തി ഈ ബന്ധം സഫലമാക്കിയതെന്നതാണ്.
കൊല്ലം മുണ്ടയ്ക്കൽ മുരളി ഭവനത്തിൽ താമസിക്കുന്ന ജയപ്രകാശിന്, കൗമാരത്തിൽ തന്നെ മുണ്ടയ്ക്കൽ സവിരയിൽ രശ്മിയോടു പ്രണയം തോന്നിയിരുന്നു.
എന്നാൽ അത് തുറന്നു പറയാൻ അദ്ദേഹത്തിന് കഴിഞ്ഞില്ല. പിന്നീട് രശ്മിയുടെ വിവാഹം നടന്നു. അതേസമയം വിദേശത്ത് ജോലി ലഭിച്ച ജയപ്രകാശും മറ്റൊരു വിവാഹജീവിതത്തിലേക്ക് കടന്നു.
ഇരുവരുടെയും കുടുംബജീവിതം സന്തോഷകരമായിരുന്നു.
എന്നാൽ കാലക്രമേണ വിധി ഇരുവരെയും വീണ്ടും ഒറ്റപ്പെടുത്തുകയായിരുന്നു.
രശ്മിയുടെ ഭർത്താവ് പത്ത് വർഷങ്ങൾക്ക് മുമ്പും ജയപ്രകാശിന്റെ ഭാര്യ അഞ്ചു വർഷങ്ങൾക്ക് മുമ്പും മരണപ്പെട്ടു. ജീവിത പങ്കാളിയെ നഷ്ടമായ വേദന മറക്കാൻ രശ്മി കലാരംഗത്ത് സജീവമായി.
അതേസമയം, മക്കളുടെ നിർബന്ധത്തെ തുടർന്ന് ജയപ്രകാശ് പുനർവിവാഹത്തെക്കുറിച്ച് ആലോചിക്കാൻ തുടങ്ങി.
ഇതിനിടയിൽ രശ്മി അഭിനയിച്ച ഒരു ഷോർട്ട് ഫിലിം ജയപ്രകാശ് കണ്ടു. ചിത്രത്തിന്റെ സംവിധായകനിൽ നിന്ന് രശ്മിയുടെ മകളുടെ ഫോൺ നമ്പർ വാങ്ങിയാണ് അദ്ദേഹം വിവാഹാലോചന മുന്നോട്ടുവച്ചത്.
മകളും മരുമകനും പിന്തുണ അറിയിച്ചതോടെ രശ്മി വിവാഹത്തിന് സമ്മതം നൽകി.
അങ്ങനെ ഇരുവരുടെയും മക്കളും മരുമക്കളും ചേർന്ന് വിവാഹം ഉറപ്പിച്ചു.
കഴിഞ്ഞ ഞായറാഴ്ച കൊച്ചിയിൽ ലളിതമായ ചടങ്ങുകളോടെയായിരുന്നു വിവാഹം.
“ഏത് മക്കൾക്കാണ് ഈ ഭാഗ്യം കിട്ടുന്നത്?” എന്ന ഹൃദയസ്പർശിയായ കുറിപ്പോടെ രശ്മിയുടെ മകൾ പങ്കുവച്ച വിവാഹചിത്രം ഇപ്പോൾ സോഷ്യൽ മീഡിയയിൽ വൈറലാണ്.
English Summary
A teenage love story found fulfillment at the age of 65 when Jayaprakash married his long-time love Rashmi in Kollam. What made the wedding special was that their children and in-laws took the initiative to arrange the marriage. After losing their respective spouses years ago, fate reunited them later in life. Their simple wedding in Kochi has now gone viral on social media, symbolizing love beyond age and social conventions.
teenage-love-fulfilled-at-65-kollam-jayaprakash-rashmi-wedding
Kollam News, Love Story, Late Marriage, Viral Wedding, Kerala Human Interest, Second Marriage, Inspirational Story, Social Media Viral
