വെളുപ്പിന് എഴുനേറ്റ് ആകാശത്തേക്ക് നോക്കുമ്പോൾ ആകാശം നിങ്ങളെ നോക്കി ചിരിക്കുന്ന കാഴ്ചയാണ് നിങ്ങൾക്ക് കാണാൻ കഴിയുന്നതെങ്കിലോ? എത്ര മനോഹരമായിരിക്കും അത് അല്ലെ? എന്നാൽ ഈ ആഴ്ച അങ്ങനൊരു ഒരു കാഴ്ച കാണാൻ മനുഷ്യർക്ക് അവസരം ഒരുങ്ങുകയാണ്.
ഏപ്രിൽ 25ന് ആകാശത്ത് അപൂർവ ഗ്രഹ വിന്യാസം കാണാൻ സാധിക്കുമെന്ന് റിപ്പോർട്ട്. ’സ്മൈലി ഫെയ്സ്’ എന്നാണ് ഇതിനെ വിളിക്കുന്നത്. മൂന്ന് ആകാശ ഗോളങ്ങൾ തൊട്ടടുത്ത് അണിനിരന്ന് പ്രത്യക്ഷപ്പെടുന്ന ട്രിപ്പിൾ കൺജംഗ്ഷനാണ് ദൃശ്യമാകുക. ശുക്രൻ, ശനി എന്നീ ഗ്രഹങ്ങളുടെയും ഭൂമിയുടെ ഉപഗ്രഹമായ ചന്ദ്രന്റേയും അപൂർവമായ സംഗമക്കാഴ്ച നയന മനോഹരമായിരിക്കും.
ട്രിപ്പിൾ കൺജങ്ഷൻ എന്നറിയപ്പെടുന്ന ഈ പ്രതിഭാസത്തെ ഒരു ചിരിക്കുന്ന മുഖം പോലെയാണ് ഭൂമിയിൽ നിന്ന് നോക്കുമ്പോൾ കാണപ്പെടുക. ലോകത്തെല്ലായിടത്തും തെളിഞ്ഞ കിഴക്കൻ ആകാശത്ത്, ഏപ്രിൽ 25 വെള്ളിയാഴ്ച പുലർച്ചെ ഈ കാഴ്ച കാണാനാകുമെന്നാണ് നാസയുടെ വാനനിരീക്ഷകർ അറിയിക്കുന്നത്.
ഏപ്രിൽ 25 ന് ഇന്ത്യൻ സമയം പുലർച്ചെ 5.30 ന് സൂര്യോദയത്തിന് ഒരു മണിക്കൂർ മുമ്പായി ഈ ഗ്രഹ സംഗമം ആകാശത്ത് കാണാൻ സാധിക്കും. എന്നാൽ തുറസ്സായ കിഴക്കൻ ആകാശം കാണുന്ന പ്രദേശങ്ങളിൽ നിന്ന് മാത്രമേ ഈ കാഴ്ച കാണാനാവൂ.
തെളിഞ്ഞ കാലാവസ്ഥയാണെങ്കിൽ നഗ്നനേത്രങ്ങൾ കൊണ്ട് ശുക്രൻ, ശനി ഗ്രഹങ്ങളെയും ആകാശത്ത് കാണാൻ സാധിക്കും. എന്നാൽ ചിരിക്കുന്ന മുഖം വ്യക്തമായി കാണണമെങ്കിൽ ദൂരദർശിനിയോ ബൈനോക്കുലറോ വേണ്ടി വരുമെന്ന് മാത്രം. ഭാഗ്യമുണ്ടെങ്കിൽ ഈ സ്മൈലി ഫേയ്സിന് താഴെയായി, ബുധനെയും കാണാൻ സാധിക്കും.
രണ്ട് ബഹിരാകാശ വസ്തുക്കൾ ആകാശത്ത് അടുത്തടുത്തായി കാണപ്പെടുന്ന പ്രതിഭാസത്തെയാണ് കൺജങ്ഷൻ എന്ന് ശാസ്ത്രജ്ഞർ വിളിക്കുന്നത്. അത്തരത്തിൽ മൂന്ന് ബഹിരാകാശ വസ്തുക്കൾ ഒന്നിച്ച് കാണപ്പെടുമ്പോഴാണ് ട്രിപ്പിൾ കൺജങ്ഷൻ എന്ന് പറയുന്നത്.
അത്യപൂർവമായി മാത്രമാണ് ട്രിപ്പിൾ കൺജങ്ഷൻ സംഭവിക്കാറുള്ളത്. ഏപ്രിൽ 25 ന് സംഭവിക്കുന്ന ഈ ട്രിപ്പിൾ കൺജങ്ഷനിൽ ശുക്രനും ശനിയും ചിരിച്ചുകൊണ്ടിരിക്കുന്ന ഒരു മുഖത്തിലെ രണ്ട് കണ്ണുകളായും ചന്ദ്രക്കലരൂപത്തിൽ കാണപ്പെടുന്ന ചന്ദ്രൻ ചിരിക്കുന്ന ഒരു പുഞ്ചിരി പോലെയും തോന്നും.
