നമുക്കുണ്ടാവുന്ന ആരോഗ്യപ്രശ്നങ്ങളുടെ ഭാഗമായി ശരീര വേദനയും സ്ഥിരമാണ്. പലർക്കും പലവിധത്തിലാണ് വേദനകൾ ഉണ്ടാകാറുള്ളത്. എന്നാൽ ശരീര വേദനകൾ അനുഭവപ്പെട്ടാൽ ആശുപത്രിയിൽ പോയി ചികിത്സ നടത്തുന്നവർ ചുരുക്കമാണ്. ഒട്ടുമിക്ക ആളുകളും മെഡിക്കൽ സ്റ്റോറുകളിൽ നിന്നും വാങ്ങുന്ന വേദന സംഹാരികളെയാണ് ആശ്രയിക്കാറുള്ളത്. ഇത്തരത്തിൽ ഭൂരിഭാഗം ആളുകളും ഉപയോഗിക്കുന്ന വേദന സംഹാരികളിൽ മുൻപന്തിയിലാണ് മെഫ്റ്റാല്‍.
ആര്‍ത്തവ വേദന, വാതരോഗത്തിന്‍റെ ഭാഗമായുണ്ടാകുന്ന വേദന, പല്ലുവേദന എന്നിവയ്ക്കെല്ലാം വ്യാപകമായി മെഫ്റ്റാല്‍ ഉപയോഗിക്കാറുണ്ട്. എന്നാൽ മെഫ്റ്റാലിന്റെ അമിതോപയോഗം ഗുരുതര പാർശ്വ ഫലങ്ങൾക്ക് കാരണമാകുമെന്നാണ് ഇന്ത്യൻ ഫാര്‍മക്കോപ്പിയ കമ്മീഷന്റെ (ഐപിസി) സ്ഥിരീകരണം. ‘ഈസിനോഫീലിയ, ‘സിസ്റ്റമിക് സിംറ്റംസ് സിൻഡ്രോം’ എന്നീ പ്രശ്നങ്ങളെല്ലാം ഇതിന്റെ പാർശ്വ ഫലങ്ങളാണ്. വൃക്ക, ഹൃദയം, ശ്വാസകോശം, പാൻക്രിയാസ് എന്നിങ്ങനെ പല അവയവങ്ങളെയും ബാധിക്കാൻ കാരണമായേക്കാം. അതുകൊണ്ട് തന്നെ ആരോഗ്യരംഗത്ത് പ്രവര്‍ത്തിക്കുന്നവരും അതുപോലെ മരുന്ന് ഉപയോഗിക്കുന്നവർക്ക് ഇക്കാര്യം ശ്രദ്ധിക്കണം എന്ന മുന്നറിയിപ്പ് നൽകിയിരിക്കുകയാണ് കമ്മീഷൻ.
ഉയര്‍ന്ന പനി, ശ്വാസതടസം, കിതപ്പ്, ചര്‍മ്മത്തില്‍ ചൊറിച്ചില്‍, വയറിന് പ്രശ്നം, വയറുവേദന, വയറിളക്കം, ഓക്കാനം, മഞ്ഞപ്പിത്തം എന്നിങ്ങനെയുള്ള ലക്ഷണങ്ങള്‍ കാണുകയാണെങ്കില്‍ ഉടൻ റിപ്പോര്‍ട്ട് ചെയ്യണം എന്നാണ് നിര്‍ദേശം. അതേസമയം എല്ലാ കേസുകളിലും ഇങ്ങനെ സംഭവിക്കണമെന്നില്ല. എന്നിരുന്നാലും മെഫ്റ്റാല്‍ പോലുള്ള വേദന സംഹാരികളുടെ അമിതോപയോഗം ശരീരത്തിന് ദോഷമാണ്.
Read Also: ഡയബെറ്റിക് നെഫ്രോപ്പതി; പ്രമേഹമുള്ളവർ ഈ ലക്ഷണങ്ങൾ അവഗണിക്കരുത്
